بۋراباي اۋداندىق سوتىندا ششۋچينسكىدەگى «پلوۆ ورتالىعى Loft» مەيرامحاناسىندا بولعان جارىلىسقا قاتىستى ءۇش ايىپتالۋشىعا قاتىستى ۇكىم جاريالاندى، دەپ حابارلايدى infohub.kz سايتى.
سوت الدىندا مەيرامحانانىڭ جالعا الۋشىسى، اۆتوگاز قۇيۋ ستانسياسىنىڭ ديرەكتورى جانە گاز جەتكىزۋشى تۇردى. جالعا الۋشى قازاقستان رەسپۋبليكاسى قىلمىستىق كودەكسىنىڭ 292-بابىنىڭ 3-بولىگى (ءورت قاۋىپسىزدىگى تالاپتارىن بۇزۋ، ەكى ادامنان ارتىق ادامنىڭ قازاسىنا اكەپ سوققان) بويىنشا كىنالى دەپ تانىلىپ، 7 جىلعا باس بوستاندىعىنان ايىرىلدى. اگقس ديرەكتورى ق ر قك 306-بابىنىڭ 3-بولىگى (قاۋىپسىزدىك تالاپتارىنا ساي كەلمەيتىن قىزمەت كورسەتۋ، ابايسىزدا ادام ولىمىنە اكەپ سوققان) بويىنشا دا 7 جىلعا سوتتالدى. گاز جەتكىزۋشى وسى باپ بويىنشا 6 جىلعا باس بوستاندىعىنان ايىرىلدى. ۇكىم زاڭدى كۇشىنە ەنگەن جوق.
ەسكە سالايىق، 26 اقپاندا ششۋچينسكىدەگى ءبىر قاباتتى مەيرامحانادا جارىلىس بولدى. الدىمەن التى ادام قازا تاۋىپ، 20 ادام جاراقات العانى حابارلانعان ەدى. جارىلىس ءساتى بەينەعا تۇسىرىلگەن. «پلوۆ ورتالىعىنىڭ» ديرەكتورى تراگەديادان كەيىن ۇستالىپ، كەيىن مەيرامحانا يەسى ەكى ايعا قاماۋعا الىندى. 18 ساۋىرگە قاراي قۇرباندار سانى 12-گە جەتتى. ماۋسىمدا اقمولا وبلىسىنىڭ ارنايى پروكۋرورلارى قىلمىستىق ءىستىڭ تەرگەۋىن اياقتادى. سوت پروسەسى بارىسىندا ايىپتالۋشىلار كەشىرىم سۇرادى، ءبىراق كىناسىن مويىندامادى. قىركۇيەكتىڭ باسىندا ولار سوڭعى ءسوز سويلەدى.