قازاقستاندا جۇمىسقا قابىلداۋدىڭ جاڭا ەرەجەلەرى كۇشىنە ەندى: ەندى جۇمىس بەرۋشىلەر جەكەلەگەن ساناتتاعى ۇمىتكەرلەرگە جۇمىسقا قابىلداماۋ سەبەپتەرىن تۇسىندىرۋگە مىندەتتى. بۇل تۋرالى infohub.kz سايتى حابارلايدى.
تامىز ايىنان باستاپ قولدانىسقا ەنگەن ەڭبەك كودەكسىندەگى وزگەرىستەرگە سايكەس، باس تارتۋ العان ۇمىتكەرلەر شەشىمنىڭ جازباشا نەگىزدەمەسىن تالاپ ەتۋگە قۇقىلى. اتاپ وتىلگەندەي، جۇمىسقا قابىلداماۋ جۇمىس بەرۋشى تاراپىنان زاڭ بۇزۋشىلىقتى بىلدىرمەيدى، الايدا جەكەلەگەن ساناتتاعى كانديداتتار ءۇشىن قوسىمشا كەپىلدىك پايدا بولدى — باس تارتۋدىڭ شىنايى سەبەبىن ءبىلۋ مۇمكىندىگى.
جازباشا باس تارتۋدى تالاپ ەتۋ قۇقىعىنا جۇكتى ايەلدەر، ءۇش جاسقا دەيىنگى بالالارى بار اتا-انالار، كامەلەتكە تولماعاندار جانە دەنساۋلىعىندا ەرەكشەلىگى بار ۇمىتكەرلەر يە بولدى. زاڭگەر سەرگەي ۋتكين ءتۇسىندىردى: «ەگەر ادامعا ەشقانداي سەبەپ ايتىلماي، وسى ءتورت ساناتقا جاتاتىنى ءۇشىن جۇمىسقا قابىلداۋدان باس تارتىلسا، ول باس تارتۋ سەبەبىن جازباشا تۇردە حابارلاۋدى تالاپ ەتە الادى. ال ەگەر بۇل سەبەپ ونىڭ بالاسىنىڭ بولۋى، جۇكتىلىگى، كامەلەتكە تولماعاندىعى نەمەسە مۇگەدەكتىگى بولسا، وندا مۇنى سوتتا داۋلاۋعا بولادى».
ەڭبەك جانە حالىقتى الەۋمەتتىك قورعاۋ مينيسترلىگى جۇمىس بەرۋشىنىڭ ءۋاجى ماڭىزدى ەكەنىن اتاپ ءوتتى. ەگەر باس تارتۋ لاۋازىمعا، تاجىريبەگە جانە بىلىكتىلىككە قويىلاتىن وبەكتيۆتى تالاپتارعا بايلانىستى بولسا، ول نەگىزدى دەپ تانىلۋى مۇمكىن. الايدا كانديداتتىڭ جەكە جاعدايلارى كەمسىتۋگە سەبەپ بولماۋى ءتيىس. ق ر ەحاقم ەڭبەك جانە الەۋمەتتىك ارىپتەستىك دەپارتامەنتىنىڭ ديرەكتورى ەربولات ابىلحاتين مالىمدەدى: «جۇمىس بەرۋشى جازباشا باس تارتۋدى نانىمدى دالەلدەرمەن عانا بەرە الادى. ەگەر قىزمەتكەر بىلىكتىلىك تالاپتارىنا ساي كەلسە، دەنساۋلىعى جارامدى بولسا، جۇمىسقا قابىلداۋدا شەكتەۋ مەن كەمسىتۋ بولماۋى كەرەك».
قازاقستاندىق رەكرۋتەرلەر بولسا، جاڭاشىلدىقتار جۇمىس بەرۋشى مەن كانديدات اراسىنداعى قارىم-قاتىناسقا ۆاكانسيا ىزدەۋ كەزەڭىندە-اق اسەر ەتۋى مۇمكىن دەپ ەسەپتەيدى. ماركەتينگ جانە PR مەنەدجەرى مۇحامەد باعدات ۇلى اتاپ ءوتتى: «مەنىڭشە، بۇل جۇمىس بەرۋشىلەرگە دە، ۇمىتكەرلەرگە دە وڭ اسەر ەتەدى، ويتكەنى جۇمىس بەرۋشى اشىق بولىپ، باس تارتۋدىڭ ناقتى سەبەپتەرىن ايتقاندا، بۇل ۇمىتكەر ءۇشىن پايدالى. ول ءارى قاراي وزىنە تولىق ساي كەلەتىن پوزيسيالارعا عانا ءوتىنىش بەرەدى. جالپى، ءقازىر ەڭبەك نارىعى اشىق بولا تۇسۋدە».