قاراعاندى وبلىسىندا سوت جۇرگىزۋشىنى قارسى جولاققا شىققانى ءۇشىن اكىمشىلىك جاۋاپكەرشىلىكتەن بوساتىپ، ونىڭ مۇگەدەك اناسىنا كۇتىم جاساۋىن ەسكەردى، دەپ حابارلايدى infohub.kz سايتى.
قاراعاندى وبلىسى سوتتارىنىڭ رەسمي Telegram-ارناسىندا حابارلانعانداي، بۋحار-جىراۋ اۋداندىق سوتى اكىمشىلىك قۇقىق بۇزۋشىلىق تۋرالى كودەكستىڭ 596-بابىنىڭ 3-بولىگىندە (قارسى جولاققا شىعۋ) كوزدەلگەن اكىمشىلىك قۇقىق بۇزۋشىلىق تۋرالى ءىستى قارادى.
سوت انىقتاعانداي، 2026 جىلعى 4 مامىردا ەر ادام «ۆاز-21110» كولىگىن باسقارىپ، قاراعاندى — اياگوز — بۇعاز — تارباعاتاي تاس جولىنىڭ 42-شاقىرىمىندا «باسىپ وزۋعا تىيىم سالىنادى» بەلگىسىمەن بەلگىلەنگەن ۋچاسكەدە باسىپ وزىپ، قارسى باعىتتاعى قوزعالىسقا ارنالعان جولاققا شىققان.
جۇرگىزۋشىنىڭ كىناسى ونىڭ مويىنداۋىمەن جانە ءىستىڭ وزگە دە ماتەريالدارىمەن دالەلدەندى. اقبتك-نىڭ 596-بابىنىڭ 3-بولىگىنىڭ سانكسياسى كولىك قۇرالىن باسقارۋ قۇقىعىنان التى اي مەرزىمگە ايىرۋدى كوزدەيدى.
سونىمەن قاتار، اقبتك-نىڭ 64-1-بابىنا سايكەس، جاسالعان اكىمشىلىك قۇقىق بۇزۋشىلىقتىڭ ەلەۋسىزدىگى كەزىندە سۋديا ادامدى اكىمشىلىك جاۋاپكەرشىلىكتەن بوساتىپ، اۋىزشا ەسكەرتۋمەن شەكتەلۋى مۇمكىن.
قالىپتاسقان جاعدايدى، اتاپ ايتقاندا، جۇرگىزۋشىنىڭ ءبىرىنشى توپتاعى مۇگەدەك اناسىنا تولىق كۇتىم جاساۋىن، سونداي-اق كولىك قۇرالىنىڭ جالعىز تابىس كوزى ەكەنىن جانە ونىمەن اناسىن ەمدەۋگە اپاراتىنىن، ونىڭ ماتەريالدىق جاعدايىن، قۇقىق بۇزۋشىلىقتىڭ سيپاتى مەن ءمان-جايلارىن ەسكەرە وتىرىپ، سوت جاسالعان قۇقىق بۇزۋشىلىقتى ەلەۋسىز دەپ تانىپ، ونى اكىمشىلىك جاۋاپكەرشىلىكتەن بوساتىپ، اۋىزشا ەسكەرتۋمەن شەكتەلدى.
ءىس بويىنشا ءىس جۇرگىزۋ اقبتك-نىڭ 742-بابى نەگىزىندە توقتاتىلدى. سوت قاۋلىسى زاڭدى كۇشىنە ەندى.