InfoHub Logo

Aıbol men Suńǵat bir synypta oqıdy. Ekeýi kórshi turady. Birge oınaıdy. Birde Aıbol Suńǵattyń bulbul daýsy shyǵatyn ysqyryǵyna qatty qyzyqty. Suńǵatqa ony qalada oqıtyn aǵasy ákelip bergen edi.

Bir kúni keshke oınaýǵa barǵan Aıbol tereze aldynda turǵan ysqyryqty bildirtpeı alyp ketti. Úıine júgirip kelip, qaıda baryp ysqyraryn bilmedi. Kózine qoranyń tóbesinde jınaýly turǵan shóp tústi. Tóbege shyǵyp, jınaýly turǵan shóptiń qalqasyna otyryp alyp, armansyz bir ysqyrdy. Bulbul sekildi quıqyljytty. Odan da basqa dybystar shyǵardy. Ne kerek, áıteýir bir qumardan shyǵyp, máz boldy. Osy kezde jumystan kele jatqan ákesi balasynyń qora tóbesinde bir dybys shyǵaryp otyrǵanyn estip, kórip qaldy. Ákesiniń qasyna taıap kelgenin Aıbol ańdamady. Tek jótkirinip qalǵanda selk ete tústi. Ákesi birden:

— Aýzyńdaǵyny qaıdan aldyń?! — dep surady. Qorqyp ketken Aıbol:

— Suńǵat berdi, — dep mińgirledi.

— Suńǵat berse, nege tóbege shyǵyp, tyǵylyp ysqyryp otyrsyń? — dedi ákesi qatýlanyp. Bala úndeı almaı qaldy.

— Júr, aldyma tús! — degen áke Aıboldy Suńǵattyń úıine jetelep alyp bardy da, odan:

— Aıbolǵa myna ysqyryqty óziń berdi be? — dep surady.

Aıboldyń qolynan óz ysqyryǵyn kórgen Suńǵat qýanyp ketti.

— Joq, bergen joqpyn. Sen alǵan ekensiń ǵoı. Ákel! — dep ysqyryqty onyń qolynan julyp aldy.

— Keshirim sura! — dep ákesi balasynan keshirim suratty da, ony qaıta jetelep úıine alyp ketti. Kelgen soń óz bólmesine kirgizip aldy da:

— Endi sen urysyń, — dedi jaı ǵana.

Shoshyp ketken balasynyń:

— Joq, men ury emespin, meniń alǵanym kishkentaı ǵana ysqyryq, urylar aqsha urlaıdy! — degen daýsy qatty shyqty.

— Bireýdiń zatyn suramaı, tyǵyp alatyndardyń bárin urlyqshy deıdi. Meıli ol úlken zat bolsyn, kishi zat bolsyn, báribir, — dedi. — Endi senen dostaryń qashyp júretin bolady. Suńǵat eki bastan erteńnen bastap saǵan jolamaıdy. Ol erteń barady da, synyptastaryńa seni urlyqshy dep aıtady, — dedi ákesi. Shydaı almaı ketken Aıbol úıden shyǵa júgirdi. Artynan ákesi de júgirdi. Balasy dosynyń úıine baryp:

— Suńǵat, men ury emespin. Ysqyryp bolǵan soń ákelip berem dep oıladym, — dep esiktiń aldyna baryp aıqaılady. Suńǵattyń áke-sheshesi Aıboldyń myna qylyǵyna túsinbeı qaldy. Artynan kelgen ákesi balasynyń qylyǵyna keshirim surap, bárin túsindirip berdi.

Osy oqıǵadan keıin Aıbol eshkimniń eshteńesin suraýsyz almaıtyn boldy.

---