InfoHub Logo

Baıyrǵy zamanda úsh taý bolypty. Birinshi taý jan-ja­ǵyndaǵyny aıap, túsinistikpen qaraıtyn. Ekinshisi — meıir­ban, úshinshisi qatygez de ashýlanshaq bolǵan. Adamdar sol taýlarǵa baryp, syıynatyn. Taýlar adamdarǵa meıirimin tógip, aqyl aıtatyn.

Bir kúni pıǵyly aram adam úsh taýdy bir-birimen shaǵystyrýǵa tyrysty. Ol birinshi taýǵa kelip:

— O, qasıetti taý, sizdi eki dosyńyz maǵan jamandady. Olar sizdi «shekten asqan meıirbansymaq, bárin jalǵan aıaǵysh ári ózi kári maýbas» dep ataıdy eken. Olar sizge dos emes, — deıdi.

Birinshi taý qatty ashýlanady.

Ol endi ekinshi taýǵa keledi.

— O, meıirimdi taý, eki dosyńyz sizdi maǵan jamandady. Sizdi «jalqaý, ótirikshi, erinshek, onyń aıtqandarynyń bári jalǵan» dedi.

Ekinshi taý da yzaǵa býlyǵady.

Adam úshinshi taýǵa keledi.

— O, qudiretti taý, sizdiń dostaryńyz maǵan sizdi jamandady. Sizdi «tym qatygez de ashýlanshaq» dedi. Olar sizdi «malǵun neme» dep balaǵattaıdy. «Ol ońbaǵan durys sóz de aıta almaıdy» deıdi, —
dep, odan saıyn shamyna tıedi.

Úshinshi taý da qatty ashýǵa býlyǵady. Sóıtip, úsheýi tóbelesedi. Meıirban taý eki taýdyń ortasynda turǵandyqtan qatty jábir­lenedi. Tipti olardyń qatty judyryqtasqany sonshalyq — orta­daǵy taý ala-ala bolyp qalady. Sóıtip, úsheýi úsh jaqqa ketedi. Qazir de sol meıirban taýdyń túsi ala-ala. Sondyqtan da ol Alataý dep atalady.