InfoHub Logo

Men keremet tús kórdim. Bizdiń úıdiń terezesi ashyq eken. Balkonǵa shyǵyp qarap turǵanmyn, kenet aspan jap-jaryq bop ketti. Juldyzdar otshashý sıaqty shashyldy. Eki juldyz balkonnyń terezesinen ishke kirip, qalyqtaı qondy. Dál janymnan ádemi saz oınady. Dombyranyń úni keldi qulaqqa. Kádimgi «Balbyraýyn», «Ata tolǵaýy» kúıleri birinen soń biri oınap jatyr. Juldyzdar sulý qyz ben symbatty balaǵa aınaldy. Qazaqtyń ulttyq kıimin kıip alypty. Tek ózderiniń túri de, kıgen kıimi de kúmis tárizdi. Qyzdyń basynda sáýkele, up-uzyn burymyna sholpy taqqan. Kamzolyndaǵy órnekteri bizdiń týdaǵy órnekterimizden aýmaıdy.

— Juldyz bala, juldyz qyz! Sálemetsińder me? Sender qaıdan keldińder? O jaqta da qazaqtar bar ma? Ana tilderińdi umytqan joqsyńdar ma? Mundaǵy qazaqtardyń kóbisi óz tilin umytyp qalǵan.

Olardyń qazaq bolǵanyna qýandym-aý deımin, toqtamaı sóılep jatyrmyn.

— Arsen, sen jaqsy balasyń. Biz seni tanımyz. Seniń óz ultyńdy, tilińdi saqtaǵyń keletinin bilip, ádeıi saǵan ushyp keldik. Ultyn súıetin qazaqtardyń namysy men jigerinen jaralǵan Qurysh qyz ben Qurysh balamyz biz. Qazaq halqynyń kody — bizde. Biz bıikte, jeti qat aspannyń ar jaǵynda ómir súremiz. Jer betinde namysy bar, ultyn, tilin súıetin bir qazaq bolsa, biz tirimiz. Ulttyq ar-namysty aıaqqa taptatpaý úshin kók júzinde samǵaımyz, — dedi Qurysh qyz.

Tańdanyp qarap qalyppyn.

— Arsen, bizben birge ushyp, juldyzdar álemine saıahat jasa, nebir keremetti kórsetemiz, — dedi Qurysh bala.

— Tek kózińdi jumyp al, jaryqtan basyń aınalady. Onsyz da

bárin júregińmen sezesiń, — dedi olar. — Biz tez ushamyz. Kózińdi ashyp-jumǵansha bárin kórip, saıahattap, úıińe qaıtyp kelesiń.

Men kelistim. Kózimdi jumyp, ekeýimen qol ustasyp, kók júzinde ushyp kelemiz.

Ne kórdim deısiz be?

Aspanda bizdiń alyp Qazaqstanymyzdyń kóshirmesi bar eken. Barlyq zamandaǵy ulttyq batyrlarymyz: Qobylandy, Alpamys sıaqty batyrlar, Aıaz bı, Jırenshe sheshen, Qurmanǵazy, Abaı, Jambyl atalarymyz — bári sonda. Óz zamandarynda ómir súrip jatqandaı. Jaıaý Musa deısiń be? Kúlásh apamyz ba? ...Tamyljyta salǵan ánderi qandaı! Ónerli urpaq kóbeıse, óz dástúri, óneri bar el ólmeıdi eken ǵoı. Qazaq degenimiz — ana tilimizde sóıleı bilý, jaı sóılep qoımaı, sheshen sóıleý ekenin, ulttyq án-kúı dástúrimiz ekenin taǵy da óz kózimmen kórip, tereń túsindim. Elime qaıtyp kelip, barlyq balaǵa aıtsam deımin!

Osylaı oılaýym muń eken, áp-sátte ózge álemdi sharlap, úıime qaıtyp keldim. Dostarym meni úıge uzatyp salyp: «Biz taǵy kelemiz! Kóriskenshe qosh bop tur!» — dep kózden ǵaıyp boldy.

— Máńgilik el bolaıyq! — dep aıǵaıladym men! Sóıtip jatyp oıanyp kettim.

---