InfoHub Logo

Jerde jalt-jult etip oıdym-oıdym kólshikter paıda bolyp jatyr. Dalada jańbyr jaýyp tur. Tylsym tabıǵattyń tamashasy kóp qoı. Aspannan sha-qyraıa túsken shaǵyrmaq kún sáýleleri jańbyr tamshylaryna shaǵylysyp, kóz aldymda kempirqosaqqa uqsas, móldir ekran tárizdes perde tartyldy. Áldeqaıdan býryl tulpar mingen, bes saýyty boıynda qazaq batyry shyqty.

— Jekpe-jek, jekpe-jek, — dep aıqaılady ol.

Ar jaǵynan qap-qara sáıgúlik mingen jońǵar batyry kórindi. Eki batyrdyń da artynda qalyń ásker sapta tur.

— Otan úshin, el úshin, jer úshin jan pıda! Qarasaı! Qarasaı!

— Atańa nálet, ıt qalmaq! Ata-babamnyń qany tamǵan jerimnen taıyp tur. Alǵa, baýyrlar!

— Keýdeńe nan pispesin! Kim jeńerin kórermiz áli!

Aıdahar beınelengen bas kıim, dál sondaı qalqan ustaǵan qalmaq qazaq batyryna aqyra umtyldy. Eki jaq aıqasyp ketti. Shaıqasta qalmaq jeńildi.

Qolbasylarynyń jeńilgenin kórgen qalǵan jońǵar áskerleri qasha jóneldi.

— Alǵa! Alǵa! Óshimizdi alaıyq, qalmaqtardan. Qýyńdar, ji­gitter.

Qazaq áskerleri qashqan jaýdy qýalaı júrip soǵysty.

Men kıno kórip turǵandaımyn. Ásirese ortada qylyshy jar­qyldap, erekshe erlik kórsetip júrgen qaharman kózime ottaı basyldy. Ol — qazaqtyń Qarasaıy ǵoı.

Janynda dosy Aǵyntaı batyr júr jaýmen aıqasyp. Jaý jeńildi. Biz jeńdik!

— Alǵa! Tek qana alǵa, Batyrlar!

Tamshydaǵy tarıh kóz aldymda bir páste osylaı qaıtalandy.

---