InfoHub Logo

Bir kezderi Almatyda Aınash degen qyz ómir súredi. Ol óte meıirban, qoly ashyq, aqkóńil bolatyn. Aınashtyń qıaly da asa ushqyr edi. Ári ol tabıǵat aıasyndaǵy janýarlardy da óte jaqsy kóretin. Bir jyly Aınash 15-ke tolǵan týǵan kúni aldynda qyzyq tús kóredi. Túsinde altyn táj kıgen mysyq kelip:

— Aınash, seniń meıirbandyǵyń úshin men seni Mysyqtar álemi — Máý shaharyna arnaıy shaqyramyn. Bizdiń qurmetti qona­ǵy­myz bol! — deıdi.

Kelesi kúni Aınash dúkennen kele jatyp tú­sinde kórgen my­syqty kezdestiredi. Biraq mysyqtyń basynda altyn táj joq eken. Mysyq Aınashtan qasha jóneledi. Al Aınash sońynan tura qýady. Mysyq qalanyń syrtyna qaraı qashady. Aınash qýa beredi, qýa beredi. Mysyq qala shetindegi bir qarabaıyr úıdiń qorǵany buryshyndaǵy kishirek úıshikke baryp kirip ketedi. Eńbektep baryp Aınash úıshik ishin qarasa, eshkim de, eshteńe de joq. Ol da úıshikke kiredi. Kózin ashyp-jumǵansha bolmaı bir jaqqa ushyp bara jatqanyn baıqaıdy. Endi bir sátte jumsaq shóptiń ústine qulaıdy. Aınalasyna qarasa, kishkentaı saban úıshikter tur. Aınashtyń qasyna kózge oǵashtaý — qyzyq kıingen kishkentaı bala mysyq keledi. Ol Aınashqa:

— Sálem! Meniń atym — Dınko. Seniń atyń kim? — dep suraıdy.

Aınash tańǵalyp:

— Sálem! Meniń atym — Aınash, — dep, oı ústinde turyp óz qo­lyna qarasa, qoly mysyqtyń aldyńǵy aıaǵynan aýmaı qalǵan. Aınash shoshyp, anandaı jerdegi kishkentaı ózenge jaqyndap baryp betin jýaıyn dep sýǵa úńilse, beti de mysyqtyń betine uqsas. Ol janushyra Dınkodan:

— Dınko, aıtshy, biz qaı jaqta turmyz? — dep suraıdy.

Dınko oǵan kúle qarap:

— Biz Mysyqtar áleminiń astanasy — Máý shaharynda turmyz. Bul kórip turǵanyń qalanyń syrty, — dep jaýap beredi.

Dınkomen sóılesip turǵan Aınashty sarbaz mysyqtar gaýhar taspen áshekeılengen úlken saraıǵa ertip keledi. Saraıdyń ishindegi mármár taqta Aınash túsinde kórgen altyn táj kıgen úlken mysyq otyr.

Patsha mysyq oǵan:

— Aınash, meni osynsha kúttirip qoıǵanyń ne? Men — Elfıýs patshamyn. Qasymdaǵy meniń ulym — Mıgel hanzada. Sen qaıy­rymdylyǵyń men meıirbandyǵyń úshin osy Máý shaharynda tu­ratyn bolasyń. Kámelet jasqa tolǵan kezde Mıgelge turmysqa shyǵasyń, — deıdi.

Aınash patshaǵa:

— Han ıem, men sizdiń ulyńyzǵa turmysqa shyǵa almaımyn. Ári Máý shaharynda turǵym kelmeıdi. Meni úıge qaıtarýyńyzdy suraımyn, — dep qarsylyq tanytady.

Elfıýs patsha ashýlanyp, ony túrmege japtyrady. Aınash túr­meniń terezesinen qarap otyryp, Dınkony kórip qalady.

Dınko da ony baıqap, oǵan jaqyndap kelip:

— Seniń menen bizdiń qaı jaqta turǵanymyzdy suraǵanyńdy endi túsindim. Sen basqa álemniń tirshilik ıesi ekensiń. Biraq qaı álemnen kelgenińdi bile almadym, — deıdi.

Aınash óziniń adamdar áleminen kelgenin Dınkoǵa túsindiredi. Ózine hannyń aıtqan sózin aıtyp, muńyn shaǵady.

Dınko:

— Sen bul jerden kún batqansha ketýiń kerek. Ketpeseń, mysyq kúıińde máńgi qalyp qalasyń. Anaý alańǵa qarashy. Ol jerde Elfıýs patshanyń basqa álemderden shaqyryp, Máý shaharyn-da qalýǵa, Mıgel hanzadaǵa úılenýge usynys jasaǵanda qar-sylyq tanytqan jas qyzdardyń bastary naızalarǵa shanshylyp ilingen. Mende bir oı bar. Seniń qolyńa ótkir pyshaq berip ketemin. Ózim saıqymazaq bolyp saraıǵa kirip, hannyń kóńilin aýlap, kúldirýge tyrysamyn. Sen onyń kúlkisin estigen sátte temir torlardy pyshaqpen kesip, syrtqa qash. Sóıtip, meni sha-hardyń syrtynda kút, — dep, oǵan pyshaq berip, ózi saraıǵa kirip ketedi.

Aınash birazdan soń patshanyń kúlkisin estı sala torlardy kesip, syrtqa qasha jóneledi. Temirdiń saqyr etken daýysyn estigen Elfıýs patsha Dınkonyń jelkesinen qysa ustap, mysyq sarbazdarymen birge Aınashty syrtta kútip turady. Dınko ony kóre salysymen:

— Aınash, tez qash! — dep aıqaılaıdy. Ózi Elfıýs patshanyń betine jarmasady. Aınash basqa jaqqa qasha jóneledi. Dınko tistelep júrip patshanyń qolynan sytylyp shyǵyp, Aınashtyń sońynan júgiredi. Ekeýi shahardyń syrtyna shyǵady. Sol jerde Dınko qaltasynan kúmis saqına shyǵaryp:

— Bul Elfıýs patshanyń adamdar álemine esik ashatyn sa­qı-nasy. Biz adamdar álemine kirgen soń, men sóıleı almaı qalamyn. Sen meni óz úıińe aparyp, óz mysyǵyńdaı kút, ósir. Anańa daladan taýyp aldym de. «Óziń qaıda boldyń?» dep surasa, dostarymmen oınadym dersiń, — dep keńes beredi.

Ekeýi adamdar álemine oralady. Uzaq ári baqytty ǵumyr keshken Aınash Dınkony sońǵy demi bitkenshe aıalap kútedi.

---