Qońyr úırek
Jazdyń tamyljyǵan kúnderiniń biri bolatyn. Kókem ekeýimiz shóp shabýǵa bardyq. Shabyndyqtyń shóbi qalyń eken. Kókem atty doǵaryp, shalǵy shyńdaýǵa kiristi. Men atty tusamaq bolyp, belýardan keletin kók shóptiń arasymen kele jatqam. Dál aldymnan pyr etip úırek usha jóneldi. Men shoshyp kettim. Jetelep kele jatqan atym da eleń etip, qulaǵyn qaıshylap tura qaldy.
— Kóke! Kóke! Uıada úırektiń jumyrtqalary jatyr, — dedim daýystap.
— Qustardyń jumyrtqa basatyn kezi, balam. Uıasyna jolama! Bezip ketedi,— dep aıǵaı saldy kókem.
Men úırekti aıap kettim. Tamaq ákep bergim keldi. Ony kókeme aıta almadym. Erteńinde qos ýystaı bıdaıdy qaǵazǵa orap ala keldim. Úırektiń uıasyna jaqyndaı bergenimde, qońyr úırek taǵy da pyr etip usha jóneldi.
— Uıanyń qasyna barma degenim qaıda? — dep ákem aıǵaılap shaqyryp aldy.
— Endi barmaımyn. Úırekke jem ákep edim, — dep shynymdy aıttym. Kókem úndegen joq.
Arada biraz kún ótti. Daıyndaǵan shóbimizdi tasýǵa kiristik. Úırektiń uıasyn kórgim keldi. Baryp qarasam, uıa bos jatyr. Jumyrtqanyń shashylǵan qabyǵynan basqa eshteńe joq. Balapandaryn shyǵaryp áketken ǵoı dep oıladym. Ózenge baryp, atymdy sýaryp jatqanymda úırektiń barq etken daýysy shyqty. Jalt qarasam, baldyrly qara qoǵanyń arasynda quıtaqandaı balapandaryn ertip, qonyr úırek júzip júr eken.
— Kóke! Kóke! Qońyr úırekti qara, balapandaryn shyǵarypty. Tez kelshi! Kórshi! — dep aıǵaı saldym. Kókem qasyma kelip, basymnan sıpap turyp:
— Anada sen jumyrtqasyn alsań ǵoı, myna balapandar dúnıege kelmegen bolar edi. Kórdiń be, jan-janýar, qurt-qumyrsqa, jándik ataýlynyń bári tirshilik úshin kúresedi. Sen olarǵa járdemshi pana bola bil, balam, — dedi úırek jaqqa qarap. Qońyr úırek úrpek bas balapandaryn ertip, ózenniń betin qaq jaryp, arǵy jaǵalaýǵa júzip bara jatty. Anda-sanda biz jaqqa moınyn buryp, qarap qoıady.
You Might Also Like
