InfoHub Logo

Bizdiń mysyǵymyzdyń úsh balasy bar. Baýyryn jańa kótergen bala mysyqtar súıkimdi-aq.

Birde mektepten kelsem, osy mysyqtyń eki balasyn bireýler alyp ketipti. Tipti ala mysyqtyń ózin de qolqalaı kelgender boldy.

Kórshi aýylda turatyn Álıa apaı:

— Úlken mysyǵyńdy bere tur, úıimizdi tyshqan basyp ketti, — dep apama buıymtaıyn aıtyp jatty. Árıne, apam onyń kóńilin jyǵa almady.

Alǵashqy kúnderi bala mysyq anasyn izdep, mıaýlaýmen boldy. Ózi júdep ketti.

Arada biraz kún ótti. Biz de edáýir kóndigip qalǵanbyz. Tańerteńgi shaıǵa otyrǵan betimiz edi. Bir mezgilde mysyqtyń mıaýlaǵan úni estilgendeı boldy. Pyryldap jatqan bala mysyq esikke qaraı jan ushyryp ata jóneldi. Esikti shalqaıta ashyp jiberdim. Ar jaǵynda aryp-ashyp kádimgi ala mysyq tur. Ol kirgen bette bala mysyqqa qaraı umtyldy. Kádimgideı baýyryna basyp, jalap-juqtap jatyr.

— Qaıran ana júrek deseńshi?! Zaty mysyq demeseń, bul da ana. Anaǵa balasynan qymbat eshnárse joq eken ǵoı! — Apam bir túrli eljireı ún qatty.

Bul kezde ala mysyq balasymen alańsyz máre-sáre bop jatty.

— Apa, ala mysyqty endi eshkimge bermeıikshi! — dedim men ana men balasynyń qaýyshqan sátin qyzyqtap turyp.

— Jaraıdy, kúnim, balasynan aıyrmaı-aq qoıaıyq, — dedi ol. Sol kúnnen bastap ala mysyq pen balasynyń juby jazylmaıtyn boldy.

---