1
Shámil-aý!
Hal-jaıymdy bilseń edi,
Bilmeımin qaıterimdi...
Kim senedi?
On jetimde óshirip alǵan otym,
Qaıter eń qaıta qaryp júrse meni?
Bir dertke ushyradym, bul kúnde men
Qoshtastym saýyǵymmen, kúlkimmenen.
Júregim jerik bolǵan jaǵdaıy bar
Bir pále jatyr bilem búlkildegen.
Yntyǵyp yńqylmenen, kúńkilmenen
Jetkizip aıtý qıyn qur tilmenen,
Búgin maǵan jıyrma kerek bop júr,
Aldynda hor qyzynyń irkilmegen.
Belgili saǵan meniń maýbastyǵym,
Sabyrsyz aýzy kúıgen albastymyn.
Kesemdi aldymenen úrlep alam,
Yssy shaıdy aýzyma almas buryn.
Oılasam, talaı-talaı qyr basyppyn,
Dosym dep, «dońyzben» de muńdasyppyn
...Shámil-aý!
Qalyń dostan qalǵan sen eń,
Qaıtemin?
Ǵashyqpyn men,
Shyn ǵashyqpyn!!!
Ǵashyqpyn!
Ǵashyqpyn dep bildirmedim,
Belgili: bildirgenim - búldirgenim.
Jarq etip, jaıdyń oty shashylǵanda,
Jalt etip, qaraýǵa da úlgirmedim...

2
«Dostardyń» ortasyna túsip qaldym...
Shámil-aý!
Osy meni ushyqtar kim?
Jelderine jeligip pysyqtardyń,
Keshe men mahabbatqa iship bardym.
Bardym-daǵy otyrdym qarsy qarap,
Ol da otyr.
Túri joq hal suramaq.
Suqtanǵan jat kózderden jasqandym da,
Taıyp turdym.
Qashanǵy ál shydamaq.
Til qatyp, tis jarmadym, úndemedim
Bilmeımin bilgenin de, bilmegenin.
...Men degen - saýdam bitken saýdagermin,
Keregim bola qoısyn kimge meniń?!
O, shirkin!
Qaıran kúnder.
Saıran kúnder!
Qanatyn baqyt qusy jaıǵan kúnder.
Jalt burylyp, oqys bir qaraǵanda,
Júzińnen júreksinip, taıǵan kimder.
Sol kúnder ǵoı - júrektiń ańsaǵany,
Soǵan shóldep, aıyzym tamsanady.
Ókinish pe, bilmeımin, qýanysh pa?
Óz-ózinen júregim án salady.
Ánsiz ómir ómir me, qańsymaı ma,
Ózegińdi órtep dert, janshymaı ma.
Mahabbatqa arnap bir án shyǵarsyn,
Shámil-aý!
Shámshi kaıda?
Shámshi qaıda?
Shámshige aıt,
Taǵy da bir tańdandyrsyn,
Jyndandyrsyn júrekti, jandandyrsyn!
Máńgi ólmes Mahabbatym aıta júrer,
Máńgilik ólmeı týǵyn án qaldyrsyn!

3
Mahabbat búgin jáne qaramady,
Qaramady...
Janymdy jaralady.
Shámil-aý!
Bilesiń be?
Shyn mahabbat -
Osylaı qaramaýdan jaralady!
Meıli, ol qaramasyn, túsinbesin,
Osylaı asqaq bolsyn, kishirmesin.
Bastan aýyp baratqan tal túsime,
Taǵdyrym kóleńkesin túsirmesin.
Eskermesin, bilmesin,
Kete bersin.
Bul fánıden alańsyz óte kórsin
Dármensiz meniń mylqaý mahabbatym,
Sirá da, ómirimmen ótelersiń...

4
Shámil-aý!
Kúnder ótti,
Aılar ótti.
Alańsyz qaıran kúnder qaıda ketti?
Mahabbat sáýlesine uryndym men,
Mahabbat ómirimdi oıran etti.
Qazir tún.
Kóktem túni maýjyrap tur.
Otyrmyn jazbaı, syzbaı qaljyrap qur.
Aldynda terezemniń - kári qaıyń,
Kókteı almaı butaǵy saýdyrap tur.
Aq nóser ańyrap kep dúrkin-dúrkin ashylar,
Kári qaıyń kókter bir kún.
Mahabbat meni, sirá, daýalar ma,
Bet alyp burylmasqa ketken, shirkin.
Kóshelerdiń kózinen qan atylyp
Qala jatyr,
Qazir tún.
Dala tunyq.
Mahabbatty kúzetip, kirshik ilmeı,
Búgin jáne otyrmyn tań atyryp.

5
Shámil!
Aınaldym jazylmasqa.
Kúıreıtuǵyn túrim bar, jazym bassam.
Qazir menen saýyq pen saıran qalǵan,
Jaıyna jyr da qalǵan jazylmastan.
Oıǵa óres tappaǵan, tilge - derek,
Oınaqy jyrym meniń kimge kerek?
Týlaıdy tutqyndalǵan aqtıindeı,
Shyǵyrshyqty aınalyp shyr kóbelek.
Joq, Shámil,
Meniń oıym bólek edi,
Basqa jyr, basqa ǵumyr kerek edi...
Qul bolǵam Mahabbatqa, mende erik joq,
Eriksiz ómir maǵan ne beredi?!
Mahabbat túsinbedi, aýlaqtady,
Armanym ketti meni aldap taǵy.
Saıa izdep qur bekerge sabylyppyn,
Tabynypnyn saǵymǵa ar jaqtaǵy.
...Qazir tún.
Syrtta nóser.
Sáýir aıy.
Kóktegen áldeqashan kári qaıyń.
Sálden keıin taǵy da tań atady,
Taǵy da...
Sary ýaıym...
Sary ýaıym...

6
Shámil,
Shámil!
Sharshadym, qaljyradym.
Et júregim ezildi, qan jylady.
Jyrym meniń - naýqastyń sandyraǵy,
Qunym meniń - tazynyń qarǵybaýy.
Temir emes, men-daǵy adammyn ǵoı,
Ańnan emes, adamnan jaraldym ǵoı!
Shámil-aý
Tuńǵıyqqa qamaldym ǵoı!
Qaıtermin?!
Qaıda baryp jazarmyn boı?!
Taǵy tún.
Taǵy menen uıqy qashty.
Qaıtemin qańyraǵan kúıki basty?
...Aldymda mynaý fánı-tyrjalańash,
Shyǵaryp tilin maǵan, sıqyn ashty.
Mahabbat menen ketken,
Bólekte júr.
Men de bir - jasyn túsken terek te bir.
Tirshilik mahabbattan taralǵan ǵoı,
Shámil-aý!
Endi maǵan kerek pe ómir?!

---