InfoHub Logo

1 ناۋرىز العىس ايتۋ كۇنىنە ارنالعان
تاقىرىبى: ريزاشىلىق

ماقساتى: بالالاردىڭ «سىيلاستىق» قۇندىلىعى تۋرالى تۇسىنىكتەرىن كەڭەيتۋ
مىندەتتەرى: - ريزاشىلىق پەن العىس تۋرالى تۇسىنىك بەرۋ؛
- ۇلكەن - كىشىگە دەگەن سۇيىسپەنشىلىگىن، سىپايىلىق قارىم - قاتىناسىن دامىتۋ؛
- ادەپتىلىككە، كىشىپەيىلدىلىككە، ىزەتتىلىككە تاربيەلەۋ.
كورنەكىلىكتەرى: وقۋلىق، داپتەر، ساندىقشا

شاتتىق شەڭبەرى
ريزامىن مەن بۇگىنگە،
ريزامىن مەن بۇگىنگە،
ريزامىن مەن بۇگىنگە،
ريزامىن مەن قازىرگە!
ريزامىن، ريزامىن، ريزامىن بۇگىنگە،
ريزامىن، ريزامىن، ريزامىن قازىرگە.
بالالار تىزبەكتەلىپ، ءبىر - بىرلەرىنە تىلەك ءبىلدىرىپ شىعادى.

اڭگىمەلەسۋ
- بالالار، سەندەر كىمدەردى جاقسى كورەسىڭدەر؟
- ولاردى نەلىكتەن جاقسى كورەسىڭدەر؟
- ال وزدەرىڭدى كىمدەر جاقسى كورەدى؟ قالاي جاقسى كورەدى؟
ريزاشىلىق دەگەنىمىز نە؟
العىس دەگەندى قالاي تۇسىنەسىڭدەر؟
- ادام ءوزىنىڭ ريزاشىلىعىن، العىسىن قانداي سوزدەرمەن بىلدىرەدى؟
- سەندەرگە كىم قانداي جاعدايدا العىس ايتتى؟
- وزدەرىڭ قانداي جاعدايدا العىس ايتىپ كوردىڭدەر؟
بالالاردىڭ جاۋاپتارى تىڭدالادى.
سونىمەن، راقمەتكە لايىقتى كىمدەر؟ ءتىزىمدى بىرگە قۇرايىق! باستىسى العىس ايتا ءبىلۋ...
اناعا – ءومىر سىيلاعانى ءۇشىن،
اكەگە – قورعان بولعانى ءۇشىن،
دالاعا – گۇلدەرى مەن كوك شالعىنى ءۇشىن،
سوزگە – جاندى جىلىتاتىنى ءۇشىن،
كۇنگە – شۋاعى مەن نازارى ءۇشىن،
جۇلدىزعا – قاراڭعى تۇندەگى جارىعى ءۇشىن،
دوسقا – قۇشاعى مەن يىعى ءۇشىن،
اجەگە – ىستىق الاقانى ءۇشىن،
سۋعا – تىرشىلىك كوزى بولعانى ءۇشىن،
جەرگە – ماحابباتى مەن بار بولعانى ءۇشىن،
وتقا – جىلۋلىعى ءۇشىن...
ريزاشىلىق - ادامنىڭ باسقا ادامنان كورگەن جاقسىلىعى، كومەگى، كوڭىلى ءۇشىن قاناعاتتانۋشىلىق جانە العىس بىلدىرۋشىلىك سەزىمى.

العىس – ادامنىڭ ادامعا جاساعان جاقسىلىعى، كومەگى، كوڭىلى ءۇشىن ريزاشىلىق ءبىلدىرۋى، سونداي - اق ونىڭ ويى مەن ءىس - ارەكەتىنە، جاساعان ىستەرىنە جوعارى باعا بەرۋى.

اڭگىمەلەۋ
"العىس" م. تورەجانوۆ
پەداگوگ بالالارعا ءوزىن جاقسى كورەتىن جاقىن ادامداردىڭ قانشالىقتى قىمبات ەكەندەرىن سەزىنتىپ، ءقادىرىن ۇعىندىرا ءتۇسۋ ماقساتىندا بالالارعا تومەندەگىدەي ماتىندەردى قوسىمشا وقىپ بەرەدى.
"ماقۇلجان" ت. جارقىنبەكوۆا
- تولەۋدى قانداي بالا دەپ ايتا الامىز؟

دايەكسوز
"ادام ءوز ىسىنە قاناعاتتانىپ، سۇيسىنگەن كەزدە ريزاشىلىق سەزىمگە بولەنەدى.
وزىنە جاسالعان جاقسىلىققا ريزاشىلىق ءبىلدىرۋدى العىس دەيمىز"
پەداگوگ بالالارعا "العىسپەن ەل كوگەرەر" دەگەن حالىق ماقالىن بۇگىنگى وقۋ ءىس - ارەكەتتىڭ دايەكسوزى رەتىندە تۇسىندىرەدى. ۇلكەندەردىڭ ايتقان ءتىلىن الۋ، سىيلاستىققا اكەلەدى. سەندەردىڭ كورسەتكەن كومەكتەرىڭە ۇلكەن كىسىلەر العىس ايتادى، ريزاشىلىعىن بىلدىرەدى."العىسپەنەن ەل كوگەرەر"دەگەن ءسوز وسىدان شىققان.

سەرگىتۋ ءساتى
ويىن:"سىمسىز تەلەفون"

تىنىشتىق ءساتى
- بالالار، دەنەلەرىڭدى ءتۇزۋ ۇستاپ، باستارىڭدى جوعارى كوتەرىپ، ىڭعايلانىپ وتىرىڭدار. كوزدەرىڭدى جۇمساڭدار دا بولادى. اۋانى تەرەڭ جۇتىپ، ەركىن تىنىس الىڭدار. وزدەرىڭنىڭ تىنىس الۋلارىڭدى باقىلاپ، باقىتقا، ماحاببات پەن تىنىشتىققا تولى تازا، شيپالى اۋانىڭ تۇلا بويلارىڭا تولعانىن سەزىنىڭدەر. ال ەندى، كوزدەرىڭدى اشساڭدار دا بولادى.
عاجايىپ سوزدەر
جاقسىلىق جاساۋ. العىس ايتۋ. ريزاشىلىق ءبىلدىرۋ. راقمەت.

قورىتىندىلاۋ
- بالالار، جىلى ءسوز، قايىرىمدى ءىس، جاقسى وي، كىرشىكسىز سەزىمدەرىڭدى ەشكىمنەن ەشقاشان اياماڭىزدار. «راحمەت» دەگەن قاسيەتتى ءسوزدى ءجيى ايتىڭدار. ادام العىس پەن ريزاشىلىقتى ەستىگەن سايىن، جاقسىلىق جاساعىسى كەلىپ تۇراتىنىن ەستە ساقتاڭدار. ءومىردىڭ ءاربىر ءساتىن باعالاي بىلۋگە ۇيرەنىڭدەر جانە تابيعات – اناعا مەيىرىمدى كۇنى ءۇشىن، كوڭىلدى جاڭبىرى مەن اق قارى ءۇشىن، جۇمساق اق ۇلپا بۇلتى ءۇشىن، جاقىن ادامدارعا قايىرىمدىلىعى مەن رياسىز ماحابباتى ءۇشىن العىس ايتۋدى ۇمىتپاڭدار.
بۇگىنگى وقۋ ءىس - ارەكەتى سەندەرگە ۇنادى ما؟

ماڭعىستاۋ وبلىسى، قاراقيا اۋدانى، مۇنايشى اۋىلى
"بالاۋسا"بالاباقشاسىنىڭ تاربيەشىسى كاپۋوۆا گۋلشات