InfoHub Logo

31 قاڭتار كۇنى 5 - ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋجونىندەگى ديرەكسيا ۆولونتەرلاردى شاقىرۋ بويىنشا جيىن ۇيىمداستىرادى.  

شاراعا استانا قالاسى اكىمدىگى، جاستار ساياساتى ماسەلەلەرى باسقارماسىنىڭ باسشىسى يبرايەۆ سامات سابىر ۇلى جانە 5- ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكسيا باسشىسىنىڭ ورىنباسارى قوندىبايەۆ ابىلاي قانات ۇلى جانە باسقا دا ازاماتتار قاتىسادى. جيىندا ۆولونتەرلىق قىزمەتتىڭ ماڭىزدىلىعى، ەلوردا جاستارىنىڭ ۆولونتەرلىك قىزمەتتى جۇرگىزۋدەگى تاجىريبەسى ت.س. ماسەلەلەر ايتىلادى. سونىمەن قاتار، ويىندى ۇيىمداستىرۋ، وتكىزۋ ەرەجەسى تۋرالى تاقىرىپتار ءسوز بولادى.

ۆولونتەرلارعا قويىلاتىن تالاپتار، ەرەجەلەر، جاس ەرەكشەلىگىنە بايلانىستى كورسەتكىشتەر، ۆولونتەرلاردى تاڭداۋ بويىنشا كەزەڭدەر تۋرالى ديرەكسياسىنىڭ ۆولونتەرلارمەن جۇمىس ءبولىمىنىڭ جەتەكشىسى جاندىلدايەۆ باقداۋلەت بولات ۇلى اقپارات بەرەءدى.  قوناقجايلىلىق مادەنيەتىن كورسەتۋدە ۆولونتەرلار قىزمەتىنىڭ ماڭىزى زور. ۆولونتەرلاردى ىرىكتەۋ كەزىندە  14 - 75 جاس ارالىعىنداعى ۇمىتكەر تاڭدالادى. ۆولونتەرلار ديرەكسيانىڭ ۇيىمداستىرۋ جۇمىستارىنىڭ ءتۇرلى بولىمدەرىنە ارنايى بەكىتىلىپ جۇمىس جاسايتىن بولادى. قوناقتارمەن قاتىسۋشىلاردى كۇتىپ الۋ، اككرەديتتەۋ ورتالىقتارىنا الىپ بارۋ، قوناق ۇيلەرگە جەتكىزۋ، سپورتتىق شارالار وتەتىن كەشەندەردە كومەك كورسەتۋ، مادەني شارالاردى ۇيىمداستىرۋ، ويىن كەزەڭىندە قاتىسۋشىلارعا تاماق جەتكىزۋ ت.ب. باعىتتار بويىنشا قىزمەتتەر اتقارادى. ۆولونتەرلىق قىزمەتكە تىلەك بىلدىرۋشىلەر https://worldnomadgames.kz/  سايتى ارقىلى «ەرىكتى بول»  بولىمىنە كىرىپ ەرىكتىلەرگە ارنالعان ساۋالنامانى تولتىرۋ ارقىلى ءوتىنىش بىلدىرە الادى. تولتىرىلعان ساۋالنامالار ارقىلى ىرىكتەۋ جاسالادى. بارلىق تالاپتاردان سۇرىنبەي وتكەن ۆولونتەرلار اڭگىمەلەسۋگە شاقىرىلادى. Instagram، Tik Tok ءالەۋمەتتىك جەلىلەرىندە @Volunteer_nomadgameskz پاراقشاسى ارقىلى اقپارات الىپ، WhatsApp، Telegram- دا 8 701 841 20 24  بايلانىس نومەرى ارقىلى سۇراقتارىڭىزدى جولداساڭىزدار بولادى.  

انىقتاما ءۇشىن:

2024 جىلدىڭ 8-14 قىركۇيەك ارالىعىندا استانادا وتەتىن 5ء-شى  دۇنيەجۇزىلىك كوشپەندىلەر ويىندارىنا 100-دەن استام مەملەكەتتەن 4000-عا جۋىق سپورتشى قاتىسادى دەپ كۇتىلۋدە.

5ء-شى دۇنيەجۇزىلىك كوشپەندىلەر ويىندارىندا ات سپورتى تۇرلەرى، ۇلتتىق كۇرەس تۇرلەرى، ساداق اتۋ، ءداستۇرلى ينتەللەكتۋالدى ويىندار، ساياتشىلىق ونەر، ساداق اتۋ، جامبى اتۋ، ارقان تارتۋ سىندى ۇلتتىق جانە حالىقتىق ويىنداردىڭ 20 تۇرىنەن جارىس وتەدى. بۇعان قوسا رەسمي باعدارلامادان تىس، ۇلتتىق ونەردىڭ 10 ءتۇرىن تانىستىرۋ ماقساتىندا وتەتىن ارنايى كورسەتىلىم سايىستارى بەلگىلەنگەن.  

«قازانات» يپپودرومى مەن ونىڭ ماڭىندا ورنالاساتىن «كوشپەندىلەر الەمى» ەتنواۋىلىندا ات جارىس، كوكپار، ساياتشىلىق ونەرى مەن ساداق اتۋ جارىستارى وتەدى. جاقسىلىق ۇشكەمپىروۆ اتىنداعى جەكپە-جەك سارايى مەن «الاۋ» مۇز ايدىنىندا» ۇلتتىق كۇرەس تۇرلەرى مەن حالىق ويىندارى، «دۋمان» قوناق ءۇي كەشەنىندە ينتتەلەكتۋالدىق ويىندار سايىسى وتەدى.

5ء-شى دۇنيەجۇزىلىك كوشپەندىلەر ويىندارىنىڭ اشىلۋ سالتاناتى «استانا-ارەنا» ستاديونىندا، جابىلۋى «قازانات» يپپودرومىندا وتەدى دەپ جوسپارلانعان. ءقازىر «قازانات» يپپودرومىندا قايتا جوندەۋ جۇمىستارى ءجۇرىپ جاتىر. تولىق ىسكە قوسىلعاندا يپپودروم 10 مىڭ كورەرمەندى قابىلداي الادى. «استانا-ارەنا» مەن «الاۋ» مۇز ايدىنى» سارايىندا دا جوندەۋ جۇمىستارى باستالدى.

كوشپەندىلەر ويىندارىنىڭ يدەياسىن تولىق اشۋ ءۇشىن ەلىمىزدىڭ بارلىق ايماعىندا «بىرلىك كەرۋەنى» جوباسى ىسكە اسىرىلادى. «قازانات» يپپودرومىنىڭ اۋماعىندا «كوشپەندىلەر الەمى» اتاۋىمەن ەتنواۋىل قۇرىلادى. ەتنواۋىلدا اپتا بويى قازاقستان مەن الەم ەلدەرىنىڭ ۇزدىك قولونەر شەبەرلەرىنىڭ كورمە-جارمەڭكەسى، شەبەرلىك ساباقتارى وتەدى. اقىندار ايتىسى مەن ءتول مادەنيەتىمىزدى پاش ەتەتىن باسقا دا ءىس-شارالار ۇيىمداستىرىلادى. ەتنواۋىلدى ءبىر كۇندە 30 مىڭ كورەرمەننىڭ ارالاۋىنا جاعداي جاسالادى.

5ء-شى دۇنيەجۇزىلىك كوشپەندىلەر ويىندارىنىڭ ۇرانى -

«ۇلى دالا ءدۇبىرى»