الماتىدا ءال-فارابيدىڭ 1150 جىلدىعى رەسمي تۇردە باستاۋ الدى
29 قاڭتار كۇنى الماتىدا «الەمنىڭ ەكىنشى ۇستازى» اتانعان ءابۋ ناسىر ءال-فارابي بابامىزدىڭ 1150 جىلدىعى سالتاناتتى تۇردە ستارت الادى. وتكەن جىلى-اق زامانالاردىڭ عۇلاما عالىمىنىڭ مەرەيتويىنا ارنالعان ۇلكەن دايىندىقتى ونىڭ كىندىك قانى تامعان قازاق ەلى باستاپ كەتكەندى.
وسى تۇرعىدان كەلگەندە، دۇنيەجۇزىندە ءال-فارابيدىڭ اتىن يەلەنىپ وتىرعان جالعىز ۋنيۆەرسيتەت – ءال-فارابي اتىنداعى قازاق ۇلتتىق ۋنيۆەرسيتەتىنە دە ارتىلاتىن جۇك از ەمەس.
بىلتىر ۋنيۆەرسيتەتتىڭ تىكەلەي مۇرىندىق بولۋىمەن 2-12 ءساۋىر ارالىعىندا 10 كۇنگە سوزىلعان VI حالىقارالىق فارابي وقۋلارى ءوتتى. شەتەلدىك شىعىستانۋشى عالىمدار فارابي فورۋمىن وتە جوعارى باعالادى. فورۋم بارلىق دەڭگەيدە ءتىل ۇيرەتەتىن شەتەلدىك مامانداردى جينادى.
وسى اۋقىمدى وقيعاعا ازىرلىك بارىسىندا قىركۇيەك ايىندا قازاقستاندىق ارنايى دەلەگاسيا سيريانىڭ داماسك قالاسىنا ىسساپارمەن باردى.
اتالمىش ءىسساپار قازاقستان رەسپۋبليكاسىنىڭ ليۆانداعى ەلشىلىگىنىڭ جانە سيريا رەسپۋبليكاسىنىڭ قازاقستانداعى قۇرمەتتى ەلشىسىنىڭ قولداۋىمەن جۇزەگە استى. وسىلايشا بۇل ساپار ۇلى بابامىزدى زيارات ەتىپ، جاتقان جەرىنە قازاقستان تاراپىنىڭ قارجىلاندىرۋىمەن سالىنعان «ءال-فارابي مادەني تاريحى ورتالىعى جانە كەسەنەسى» قۇرىلىسىنىڭ جاي-كۇيىمەن جاقىننان تانىسىپ، 2020 جىلى ۇلى ويشىلدىڭ 1150 جىلدىعىن وتكىزۋگە دايىندىق شارالارىن جالعاستىردى.
ءال-فارابيدىڭ مەرەيتويى كىندىك قانى تامعان وتىراردى دا اينالىپ وتكەن جوق. وسىناۋ تاعىلىمدىق ءمان-ماڭىزى زور ۇلاعاتتى ىسكە وزىندىك ۇلەستەرىن قوسۋدى نيەت ەتكەن وتىرارلىق ونەرپازدار ماقتانىش تۇتار جەرلەستەرىنىڭ حالىقارالىق اۋقىمداعى مەرەيتويى قۇرمەتىنە وراي، دراماتۋرگ شاحمەت قۇسايىنوۆتىڭ «ءال-فارابي» سپەكتاكلىن ۇسىندى. بىلىكتى رەجيسسەر عازيز ارىنوۆتىڭ ساحنالاۋىمەن ءساتتى شىققان بۇل تۋىندىنى قىزىعى تاماشالاعان كورەرمەندەردىڭ قاراسى كوپ بولدى.
ال 29 قاڭتار كۇنى الماتىدا ءال-فارابي اتىنداعى قازاق ۇلتتىق ۋنيۆەرسيتەتىندە ءال-فارابيدىڭ 1150 جىلدىق مەرەيتويى رەسمي ءارى سالتاناتتى تۇردە باستاۋ الدى. يۋنەسكو قامقورشىلىعىمەن حالىقارالىق اۋىقىمدا كەڭىنەن اتالىپ وتەتىن ءال-فارابيدىڭ مەرەيتويلىق جىلى الەمنىڭ 40-تان اسا ەلىنەن قوناقتاردىڭ باسىن قوستى.
سالتاناتتى شاراعا مەملەكەتتىك حاتشى قىرىمبەك كوشەربايەۆ، ءبىلىم جانە عىلىم ءمينيسترى اسحات ايماعامبەتوۆ، مادەنيەت جانە سپورت ءمينيسترى اقتوتى رايىمقۇلوۆا، الماتى اكىمى باقىتجان ساعىنتايەۆ، مەملەكەت جانە قوعام قايراتكەرلەرى، بۇۇ جانە يۋنەسكو، يىۇ، تۇركسوي، سونىمەن قاتار باسقا دا حالىقارالىق ۇيىمداردىڭ، قازاقستانداعى ديپلوماتيالىق ميسسيالاردىڭ وكىلدەرى، جوو رەكتورلارى، عىلىمي ورتالىقتار مەن عزي جەتەكشىلەرى، تانىمال شەتەلدىك جانە وتاندىق عالىمدار-فارابيتانۋشىلار قاتىستى.
تۇستەن كەيىن مارتەبەلى قوناقتار ءال-فارابي ەسكەرتكىشىنە گۇل شوقتارىن قويدى، سودان كەيىن ستۋدەنتتەر سارايىندا ءال-فارابيدىڭ 1150 جىلدىق مەرەيتويى سالتاناتتى تۇردە اشىلىپ، سوڭى مەرەكەلىك كونسەرتكە ۇلاستى.
ا.پ. جاڭاباي ءال - فارابي اتىنداعى قازۇۋ - دىڭ 2 كۋرس ماگيسترانتى
گ.س. بەدەلوۆا ءال - فارابي اتىنداعى قازۇۋ - دىڭ ت.ع.ك.، اعا وقىتۋشىسى
You Might Also Like
-
جەنت — قىستا دا، جازدا دا بۇزىلمايتىن، ءارقاشان ءوزىنىڭ نارلىلىگى مەن دامدىلىگىن ساقتايتىن، سوندىقتان دا كوشپەلى حالىقتىڭ داستارقانىنان تيەسىلى ورىن العان ۇلتتىق تاعام. ول قازىرگى كەزدە دە ءوزىن...
-
ءبىلىم جانە عىلىم ءمينيسترى اسحات ايماعامبەتوۆ جوعارى وقۋ ورىندارىنىڭ وقىتۋشىلارىنىڭ ايلىعىن ارتتىرۋ جولدارىن اتادى.
