![جەنتتەن جاسالاتىن ءتاتتى تاعامدار](http://infohub.kz/uploads/thumbnail/20240120082829962_big.jpg)
- 17 اقپ. 2020 00:00
- 302
جەنتتەن جاسالاتىن ءتاتتى تاعامدار
جەنت — قىستا دا، جازدا دا بۇزىلمايتىن، ءارقاشان ءوزىنىڭ نارلىلىگى مەن دامدىلىگىن ساقتايتىن، سوندىقتان دا كوشپەلى حالىقتىڭ داستارقانىنان تيەسىلى ورىن العان ۇلتتىق تاعام. ول قازىرگى كەزدە دە ءوزىنىڭ قۇندىلىعىن جويعان جوق. كەرىسىنشە، كۇندەلىكتى ءسۇيىپ جەيتىن تاعامدارىمىزدىڭ بىرىنە اينالىپ كەلەدى.
دايىنداۋ ەرەكشەلىكتەرىنە قاراي جەنتتىڭ بىرنەشە ءتۇرى بولادى. جەنتتى كەيدە «قازاق شوكولادى» دەيدى. ال ورتا ازيا حالىقتارى ونى «شەربەت» دەپ اتايدى. جەنت سوككە تورتاسىنان ايىرعان سارىماي، قانت، ىرىمشىك قوسىپ، كەلىگە ءتۇيىپ جاسالادى. جىلقى مايى مەن بال، ىرىمشىك ارالاستىرىپ تا دايىنداۋعا بولادى.
كەيدە وعان قوسىلاتىن كومپونەنتتەردىڭ ىشىنە ورىكتىڭ ءدانى مەن مەيىز دە كىرەدى. سوك ورنىنا ونىڭ جارماسىن پايدالانۋعا دا بولادى. ويتكەنى سوكتى قولمەن تۇيگەندە جارمالانىپ كەتكەن داندەرى بولەك ايىرىپ الىنادى. سونى نەمەسە سوكتى ديىرمەنگە ىرىلەۋ ەتىپ تارتىپ، جارمالاپ الىپ قوسۋعا بولادى. سوكتى ديىرمەنگە تارتقاندا ىرىلەۋ ەتىپ جارماقتاۋ ءۇشىن ديىرمەننىڭ ۇستىڭگى بەتىنىڭ ورتاسىنا ورناتىلعان باقالاق اعاشتى ءسال تومەنىرەك (0،5-1،0 مم) ءتۇسىرىپ قويۋ كەرەك. جەنت قوسپاسىنىڭ مولشەرى، دامدىلىگى دايىنداۋشىنىڭ ءوز قالاۋىنا، شەبەرلىگىنە بايلانىستى. جەنتتىڭ قانداي ءتۇرى بولماسىن ءتىل ۇيىرەدى. ونى جەسەڭ تابەتىڭ اشىلادى. ال ەمدىك قاسيەتى بولسا ءوز الدىنا. جەنت كوبىنەسە قىس ايىندا دايىندالادى.
جەنتتى از-ازدان دايىنداۋعا دا، بىردەن كوپ مولشەردە دايىنداۋعا دا بولادى. قوسپانىڭ ەڭ نەگىزگىسى سوك بولعاندىقتان قالعاندارىنىڭ مولشەرىن سوعان بەيىمدەپ قوسۋ كەرەك.
جەنتتى جاساعاندا 100 گرامم سوككە 80 گرامم ىرىمشىك، 80 گرامم قىتىرلاق نان نەمەسە قۋىرما، 80 گرامم بال، 80 گرامم قانت، 350 گرامم سارىماي، 80 گرامم مەيىز نەمەسە كەپكەن ەرىكتىڭ ەتى، 100 گرامم ۇنتاقتالىپ، قۋىرىلعان جاڭعاق نە ورىك ءدانى جانە 100 گرامم قۇرت قوسىپ جانشىلادى نەمەسە كەلىگە تۇيىلەدى.
ەسكەرتۋ: بالدى قىزدىرىپ، سارىمايدى ەرىتىپ تورتاسىنان ايىرىپ قوسۋ كەرەك. دايىن بولعاننان كەيىن جەنت شامالى ۋاقىت سالقىنداتىپ قويىلادى. ويتكەنى، كەلىگە تۇيىلگەن كەزدە قوسپا قىزادى. سالقىنداعاننان كەيىن ونى وڭاي كەسىپ، ىدىسقا سالۋ ءۇشىن پىشاقتى شامالى قىزدىرعان ابزال. جەنتتىڭ باسقا تۇرلەرىن دايىنداعاندا دا قوسپالاردىڭ وسى اراقاتىناسىن ساقتاۋ كەرەك.
قازىجەنت
سوككە جىلقىنىڭ قازىسىن، قانت، ىرىمشىك قوسىپ جانشىپ جاسالادى. ەگەر سوكتىڭ مولشەرى 1-1،5 كگ بولسا، وندا 4 ستاكان ىرىمشىك، 2 ستاكان قازى مايى قوسىلادى.
جانىشپا
جارتى كيلوگرامم سوككە 50-70 گرامم سارىماي، 50 گرامم قانت ارالاستىرىپ، ءبىراز جانشىلادى. سونان سوڭ 3 اس قاسىق قايماق قۇيىپ، تاعى جاقسىلاپ ارالاستىرىلادى. قوناققا بەرىلەر شايدىڭ داستارقانىنا قويىلاتىن مۇنداي وتە ءدامدى جانىشپانى قاجەتتى مولشەردە تەز دايىنداپ الۋعا بولادى.
جانىشپا تالقانعا ىرىمشىك، قاتقان باۋىرساقتىڭ ۇگىندىسىن، جەمىس، بال نەمەسە قانت قوسىپ تا دايىندالادى.
سۇتجەنت
سۇتكە بۇقتىرىلعان سوككە سارىماي، قانت، مەيىز، قىتىرلاق نان، قايماق قوسىپ جانشىپ جاسالادى.
شيكىزات اركىمنىڭ قالاۋىنشا الىنادى.