InfoHub Logo

تورايعىر مەن شوڭ — ارقاداعى سۇيىندىك ەلىنىڭ ازۋلى بيلەرى، ايتۋلى شەشەنى بولعان، حح عاسىردا ءومىر كەشكەن اعايىندى ادامدار. تۇيەنىڭ ەكى  وركەشىندەي اعايىندىلاردىڭ شەشەندىك داڭقى، شونجار، شىنجىربالاق-شۇبارتوستىك اتاقتارى، بيلىك-بەدەلدەرى ورتا جۇزگە جايىلعان ەكەن.

اعايىندى ەكەۋى ءبىرىن-بىرى كۇندەپ، ءبىر اتىم ناسىبايداي نارسەدەن وكپەلەسىپ، ءبىرىنىڭ الدىنا ءبىرى كىشىرەيىپ، باس ۇرۋدى نامىس ساناعاندىقتان، وكپەلەرى ۇلعايىپ كەتەدى.

ەلىنە ەكى بيدەن مىسىن اسىرار، سوزگە الىمدى ەشكىم بولماعاندىقتان، اعايىن ارا تۇرىپ، ەكەۋىن تاتۋلاستىرۋعا ارەكەتتەنگەنمەن بەتتەرى قايتىپ، تاۋلارى شاعىلادى.

بارلىقتان باسى اينالىپ، كەۋدەلەرى بايلىقتىڭ بۋىنا پىسكەن، بىرىنە-بىرى كىشىرەيسە، اتاق-دارەجەلەرىنە نۇقسان كەلەتىندەي كورىنىپ، بويلارىن  كەسەلگە، ويلارىن استامشىلىققا جەڭگىزگەن ەكى ءبيدىڭ كوڭىلدەرىنە جىبىمەستەي توڭ بايلانىپ، مۇلدە كورىسىپ، بىتىسپەۋگە اينالادى. شوڭ ءبۇيتىپ  قىرعيقاباق كۇن كەشكەنشە، ەلىنە ءبىرجولا كەتپەككە بەكىنىپتى. ول ۇيلەرىن جىعىپ، جۇرتىن تاستاپ، كوشىن باستاپ باعانالى-نايمانداعى  ناعاشىسى بابىرعا جەتپەك بوپ جولعا شىعادى. جۇرتىنان قوزىكوش جەر ۇزاپ شىققاندا تورايعىردىڭ قويىن جايىپ جۇرگەن تازشا بالا شوڭعا  سالەم بەرىپ، وعان بىلاي دەپ تاقپاقتاتا جونەلگەن ەكەن:

— بۇل بارعاننان بارارسىڭ
باعانالى-قۇلنياز بابىرعا.
وزىڭدە جەيتىن بار بولسا،
سىباعاڭا تارتادى
ءبىر سىدىرعى قابىرعا.
ات-ايعىرىڭ كوپ بولسا،
بارىمتاسىنا جارارسىڭ.
قىز-قاتىنىڭ سۇلۋ بولسا،
بوزبالاسىنا جاعارسىڭ.
ەل كوشكەندە تۇڭلىگىڭە ءبىر قارارسىڭ،
مۇنداعى تورايعىر-شوڭ دەگەن،
بۇل اتتان دا ايىرىلىپ قالارسىڭ.

بالانىڭ ءسوزى شوڭ ءبيدىڭ كوكەيىنە قونا كەتەدى. اتىنىڭ باسىن تارتىپ، ويعا قالعان شوڭ اعايىن اراسىنداعى وكپەگە بولا تۋىپ وسكەن ەل-جۇرتىن تاستاعانمەن، جات ەلگە بارىپ وپا تاپپايتىنىنا كوزى جەتىپ، كوشىن قايتارعان دەيدى.

ءسويتىپ، تاپقىر بالانىڭ تابىندى دا تاباندى سوزىنە ەشكىمگە يلىكپەگەن ايگىلى بي ەرىكسىز يلىگىپ، قاتەسىن مويىنداپ، رايىنان قايتىپتى. «داۋ سوزگە توقتايدى» دەگەن وسى بولسا كەرەك.

---