InfoHub Logo

ادام دەنەسىنىڭ ءيىسى بىردەن سەزىلىپ، مۇرىندى جاراتىنداي سيپاتقا يە ەمەس. ال دەنەدەن بەلگىلى ءبىر ءيىس شىعاتىن بولسا، ول تەر بەزدەرىنىڭ بەلسەندىلىگىنىڭ ارتۋىنان، گيگيەنا تالاپتارىن ساقتاماۋدان نەمەسە ءتۇرلى ينفەكسيالار سالدارىنان بولۋى مۇمكىن.

عالىمداردىڭ پىكىرىنشە، ادام ەكىنشى جارتىسىن تاڭداعان كەزدە بەيسانالى تۇردە دەنەسىنىڭ يىسىنە ءمان بەرىپ، سول ارقىلى تاڭدايدى ەكەن. دەمەك ءبىز گەنىمىز ۇقساس جانداردى ءدال وسى ءيىس سەزۋ قابىلەتى ارقىلى تابامىز. سەبەبى ادام اعزاسى قارسى جىنىستى تارتىپ، قىزىعۋشىلىعىن تۋدىراتىن زاتتاردى، ياعني فەرومونداردى بولە الادى. الايدا دەنەمىزدەن شىعاتىن ءيىس ءتۇرلى اۋرۋلار جونىندە بەلگى بەرۋى مۇمكىن. مەديسينا سالاسى قىزمەتكەرلەرىنىڭ پايىمداۋىنا سايكەس، كەي اۋرۋلار وزىنە ءتان يىسكە يە.

ءيىس تۇيسىگى ارقىلى دياگنوز قويۋ

دارىگەرلەر ادام دەنەسىنەن شىعاتىن جاعىمسىز ءيىس ارقىلى ءتۇرلى اۋرۋلاردىڭ العاشقى دياگنوزىن قويۋدى الدەقاشان باستاپ كەتكەن. مىسالى، ادام دەنەسىنەن بالىق ءيىسى شىقسا، زات الماسۋ پروسەسىندەگى كىناراتتى بىلدىرەدى. ول اعزاداعى ءتۇرلى اۋىتقۋلار سالدارىنان ورىن الۋى مۇمكىن.

تەرىمىزدە پايدا بولعان باكتەريالار ونداعى «ساۋ» باكتەريالاردى جويىپ جىبەرەدى. ال جاڭا باكتەريالار قورەكتەنەتىن زاتتارىنىڭ ءيىسى وزگەشە سيپات الادى.

اسەتوننىڭ ءيىسى شىعا ما؟

ەگەر تەردەن اسەتوننىڭ ءيىسى سەزىلسە، مىناداي اۋىتقۋلاردى اڭعارتۋى ىقتيمال:

- سۋسامىرمەن بايلانىستى ءتۇرلى ەندوكريندىك اۋىتقۋلار؛

- اس قورىتۋ جۇيەسىندەگى قيىندىقتار؛

- باۋىر جانە بۇيرەك قىزمەتتەرىنىڭ بۇزىلۋى؛

- ميكروب، باكتەريا جانە ءتۇرلى ۆيرۋستاردىڭ جۇعۋى؛

اتالعانداردىڭ بارلىعى اعزاداعى تەڭگەرىمنىڭ بۇزىلۋىنا الىپ كەلەدى. ال ءوز كەزەگىندە ول ىشكى اعزالاردىڭ قىزمەتىنە اسەر ەتەدى. ادەتتە دەنەدەن اسەتون ءيىسىنىڭ شىعۋىنا ءجيى سەبەپ بولاتىن – سۋسامىر دەرتى. ونى ادام اعزاسىندا ينسۋلين جەتىسپەۋشىلىگى تۋىنداۋىمەن بايلانىستىرادى. گليۋكوزانىڭ ىدىراۋى ناشار ءجۇرىپ، اعزاداعى مولشەرىنىڭ ارتۋى قان قۇرامىنىڭ وزگەرۋىنە، زات الماسۋىنىڭ ناشارلاۋىنا ىقپال ەتەدى. سالدارىنان اعزاداعى كەتوندىق دەنەلەر سانى ارتا باستايدى. اعزامىز ارتىق زاتتاردى تەر ارقىلى دا شىعاراتىندىقتان، نەلىكتەن مۇنداي جاعدايدا اسەتون ءيىسى شىعاتىنى ايتپاسا دا تۇسىنىكتى. مۇنداي احۋال دەنساۋلىعىڭىزداعى قيىندىقتاردان بەلگى بەرەدى. ءتىپتى ديابەتتىك كوماعا دا مەڭزەۋى مۇمكىن.

سونىمەن قاتار اسەتون ءيىسى باۋىر قىزمەتىمەن دە بايلانىستى. مۇنداي جاعدايدا اسەتون يىسىنەن بولەك، ءىسىنۋ، ءزار شىعارۋعا بايلانىستى قيىندىقتار، بەل اۋرۋى بايقالىپ، اۋىزدان اسەتون ءيىسى شىعادى.

ەگەر تابەتىڭىز بولا تۇرا كوپ سالماق جوعالتساڭىز، اشۋشاڭدىق پەن ۇيقىسىزدىقتى بايقاساڭىز، جانە ولار اسەتون يىسىمەن قاتار جۇرسە، ۇيقى بەزىنىڭ قىزمەتى بۇزىلعان بولۋى ىقتيمال.

مىسىق ءيىسى

كەيدە ادام دەنەسىنەن مىسىق ءناجىسىنىڭ ءيىسى شىعۋى مۇمكىن. ول دا اعزادا ورىن العان تومەندەگى اۋىتقۋلاردى اڭعارتادى:

- باۋىر، بۇيرەك اۋرۋلارى

- ەندوكريندىك جۇيەدەگى بۇزىلۋلار

- سەمىزدىك

- اس قورىتۋ جۇيەسى قىزمەتىنىڭ بۇزىلۋى

دەنەدەن مىسىق ءناجىسىنىڭ ءيىسى شىعۋىنىڭ كەڭ تارالعان سەبەپتەرىنىڭ ءبىرى باۋىرمەن بايلانىستى. ەگەر ونىڭ قىزمەتىندە كىنارات پايدا بولسا، بۇكىل اعزاعا اسەر ەتەدى. مۇنداي جاعدايدا دەنەدەن شىققان جاعىمسىز ءيىستى جويۋ مۇمكىن ەمەس. ءتىپتى، دەزودورانتتار دا جاعىمسىز يىسپەن كۇرەسە المايدى.

اقۋىز ىدىراعاندا پايدا بولاتىن زاتتار ماي بەزدەرى ارقىلى شىعارىلاتىندىقتان، اعزادا وسىنداي قيىندىق پايدا بولادى. دارىگەرلەر ونى ۋريسيدوزبەن بايلانىستىرادى. ءوز كەزەگىندە ول بۇيرەكتىڭ سوزىلمالى قابىنۋى، پيەلونەفريت جانە ۋرەمياعا الىپ كەلۋى مۇمكىن.

سىركە سۋ ءيىسى

كەيدە ادام دەنەسىنەن بولىنەتىن تەردەن سىركە سۋ ءيىسى شىعادى. ودان بولەك تەر ءبولىنۋى دە ارتا تۇسەدى. مۇنداي وزگەرىستىڭ تۋىنداۋى تومەندە اتالعان دەرتتەر سەبەپتى بولۋى ىقتيمال:

- ەندوكريندىك بۇزىلۋلار

- D جانە B دارۋمەندەرىنىڭ جەتىسپەۋشىلىگى

- وكپەنىڭ جۇپالى-قابىنبا اۋرۋلارى

- ومىراۋدىڭ سوزىلمالى اۋرۋى

ەگەر ەندوكريندىك جۇيەدە بۇزىلۋلار ورىن السا، اعزادا يود جەتىسپەۋشىلىگى تۋىنداۋى مۇمكىن. ول بىردەن دەنەدە جاعىمسىز ءيىستىڭ پايدا بولۋىنا الىپ كەلەدى. سونىمەن قاتار سىركە سۋ ءيىسى ارقىلى تۋبەركۋلەز دەرتىن اڭعارا الاسىز. سەبەبى بۇل جاعدايدا جوتەل، شارشاڭقىلىق، السىزدىك، دەنە قىزۋىنىڭ كوتەرىلۋى سىندى بەلگىلەر پايدا بولادى. ال ايەلدەردىڭ دەنەسىنەن سىركە سۋ ءيىسى سەزىلسە، بەي-جاي قاراۋعا بولمايدى. ول ومىراۋعا بايلانىستى قيىندىقتارعا مەڭزەۋى ىقتيمال.

وزگە دە نۇسقالار

دەنەڭىزدىڭ ءيىسى وزگەرىپ، ءيىسى ادام توزگىسىز سيپات السا، بىردەن دارىگەرگە قارالعانىڭىز ءجون. سەبەبى يىستەردىڭ ءارقايسىسى اعزامىزداعى ءتۇرلى اقاۋلار مەن دەرتتەرگە مەڭزەۋى مۇمكىن. ال ولاردىڭ كەيبىرىنىڭ ەمدەلۋى قيىنعا سوعىپ، كۇردەلەنۋى ىقتيمال. سوندىقتان مۇنداي جاعدايدا ۋاقىت وتكىزىپ الماعانىڭىز ابزال.

دەنەنىڭ ءيىسى	يىسپەن بايلانىستى بولۋى مۇمكىن اۋرۋلار
بالىق ءيىسى	زات الماسۋىنا بايلانىستى قيىندىقتار
ءتاتتى ءيىس نەمەسە شىرىگەن زات ءيىسى	ديفتەريا
قوي ءجۇنىنىڭ ءيىسى (دىمقىل)	بۇيرەك ءۇستى بەزدەرى قىزمەتىنىڭ بۇزىلۋى
كۇكىرتتى سۋتەك ءيىسى	اسقازان جاراسى، ديسپەپسيي
بۇزىلعان ەت ءيىسى	ونكولوگيالىق قيىندىقتار
كارىلىك ءيىسى	گورموندىق قيىندىقتار
شىرىگەن الما ءيىسى	گيپوگليكەميالىق كوما الدىنداعى احۋال (بىردەن اۋرۋحاناعا جاتقىزىلۋى ءتيىس)

---