InfoHub Logo

اسان قايعى جەلماياعا ءمىنىپ، جيھان كەزىپ، «جەرۇيىق» دەيتىن نۋ ورماندى، كوكوراي شالعىندى، قوي ۇستىنە بوزتورعاي جۇمىرتقالايتىن جايلى قونىس ىزدەيدى. جۇرگەن جەرىندە جاقسى-جامان قونىسقا باعا بەرىپ وتىرادى.

تۇركىستاننىڭ قاسىندا ەسكى قورعان ساۋراندى كورگەندە: «اتتەگەن-اي، تاقىردىڭ بەتىنە، ءشولدىڭ وتىنە سالعان ەكەن. سارقىراپ اققان سۋى جوق، جايقالىپ تۇرعان نۋى جوق، ءتۇبى تۇراقتى قالا بولا الماس»، — دەگەن ەكەن.

اسان قايعى ماڭعىستاۋعا ءۇش بارىپ، ءۇش قايتىپتى: «تۇبىندە،

مال باققان شارۋاعا ماڭعىستاۋدان جاقسى جەر بولماس»، — دەپتى.

جەتىسۋدى كورگەندە: «مىناۋ جەتىسۋدىڭ اعاشىنىڭ بۇتاعى سايىن جەمىس ەكەن، شارۋاعا جايلى قونىس ەكەن»، — دەپتى.

باياناۋىل تاۋىن كورگەندە: «بايانعا جايماي، قوي سەمىرمەس»، — دەپ، اسان قازىرگى باياناۋىلدى وزىنە جايلاۋ ەتىپتى.

وسى كۇنگى مەرەكە جەرىندەگى اسپارانى كورگەندە: «ەي، اسپارا، كورشىڭمەن تاتۋ بول، شوبىڭە سۋىڭ جەتەر!» — دەپ ءجۇرىپ كەتىپتى.

شۋ ولكەسىن كورگەندە: «ەي، شۋ، اتىڭدى تەرىس قويىپتى! تەگىندە، ءبىر شۋلىعان بولماساڭ، مىناۋ نۋ قامىسىڭ ەلىڭدى جۇتقا بەرمەس»، — دەپتى. شۋدىڭ اياعىندا سارىسۋ ەلى مالعا ءشوپ شاپپاي، شۋدىڭ قامىسىن قىستاپ، جاز ارقانى جايلايدى ەكەن.

اۋليەاتانىڭ شىعىسىندا اققان تالاس، باتىس جاعىندا سارقىراعان كەلەس وزەندەرىن كورگەندە: «ەي، ەكى تالاس، ءبىر كەلەس، مالسىز كۇنىڭ كەنەلمەس، جەرىڭدە جايىلعان مالعا جۇت بولماس!» — دەگەن ەكەن.

جۋالى جەرىندەگى اۋان دەيتىن قارا توپىراقتى ەگىستىك ايماقتى كورگەندە: «ءشوبىڭ سەمىز، قارىڭ مول، توپىراعىڭ ماي ەكەن، ءقادىرىڭدى ەگىن سالعان ەل بىلەر» — دەپتى.

اقمەشىت (قىزىلوردا) تۇسىنداعى سىر ولكەسىن كورگەندە: «ەي، اقمەشىت، جەرىڭ شاڭ ەكەن، سۋىڭ جار ەكەن. ەلىڭ جۇتاماس، مالىڭنىڭ كوزىنە ساق بول!» — دەپتى.

قارساقباي ايماعىن كورگەندە: «اينالاڭ جاپان ءدۇز ەكەن، تاۋىڭنىڭ استى جەز ەكەن، ەكى تاۋىڭ ەل بىتكەندى شاقىرار، باسىنا بايلىق قونار، جۇرتىڭ اشىقپاس!» — دەپ، ءجۇرىپ كەتىپتى.

شىڭعىرلاۋ وزەنىن كورگەندە اسان جەلماياسىنان تۇسە قالىپ، كولىگىن سۋارادى: «جىلقىنىڭ ءوزى وسكەن جوق، شىڭعىرلاۋ، سەن وسىرگەن ەكەنسىڭ!» — دەپ قونىپ كەتىپتى.

ءبىراق اسان قايعى شۇرايلى قونىس، نۋلى ولكە تابا الماي، ۇلىتاۋدىڭ باس جاعىنا كەلىپ دۇنيەدەن كوشىپتى.

---