اش، جالاڭاش...
كۇز...
ىزىڭداعان اششى جەل سۋىق لەبىن دەنەگە سوعىپ، تىتىركەندىرەدى. دەنەنى تۇرشىكتىرىپ، قىستىڭ ىزعارىن كوز الدىڭا ەلەستەتەدى:
— قىس كەلەدى، قىس كەلەدى!.. — دەگەندەي بولادى.
قىس، كورىپ جۇرگەن قىس. قىستىڭ سۋىعىنا ۇرىنباۋ ءۇشىن ادام بالاسى ادىستەنىپ ۇيرەنگەن. ءالى كەلگەندەرى:
— وتىن دايارلاپ جاتىر...
— تون-ىشىگىن دايارلاپ جاتىر...
ءالى كەلمەگەندەرى:
— بۇلار نە قىلسىن؟.. نەسىن دايارلاسىن؟!.. جوق قوي، تابارى جوق قوي!
بۇلار — كىم؟ بۇلار — ءۇستى-باسى كىر-كىر، ەكى كوزى عانا جىلتىراپ، كوشە بويىندا بۇرسەڭدەپ جۇرگەن بالالار عوي، ءۇستى-باسى البا-جۇلبا، دەنەسى كورىنىپ تۇر. ەكى كوزى مولدىرەپ، وتكەن-كەتكەنگە سۇقتانىپ قارايدى.
— سەندەر باقىتتىسىڭدار عوي. ءبىزدىڭ اش-جالاڭاش جۇرگەنىمىز مىناۋ! — دەگەندەي بولادى.
قارنى اش، ءۇستى جالاڭاش، دەنەسى كىر-كىر، ءىبىلىس، ناس! قانداي كۇش مۇنى تەنتىرەتىپ ءجۇر؟ اكەسى قايدا؟.. باۋىرى قايدا؟ نەگە قارنىن تويدىرمايدى؟.. نەگە ءۇستى-باسىن جۋىپ، مۇنتازداي قىلىپ كيىندىرىپ قويمايدى؟!
— اي، دۇنيە-اي، دەسەيشى! اكە بولسا، اكەنىڭ قاراسار دارمەنى بولسا، ءبۇيتىپ قويار ما ەدى؟ ىشتەن شىققان بالاسىن كىم جەك كورەدى دەيسىڭ، اتتەڭ دارمەن!..
كەش بولسا، سۋىق لەپ ىزعارىن ۇدەتە تۇسەدى. قويۋ قاراڭعىلىق الەمدى الباستىداي باسىپ، اعاش جاپىراقتارى ءولدىم دەپ سىبدىرلاپ، سىبىرلاعانداي بولادى...
قۇلاعان ەسكى تامنىڭ قۋىسىندا ءبۇرىسىپ جاتقان بىرەۋلەردى كورەسىڭ.
بۇل كىم؟
بۇل الگى اش-جالاڭاش دىردەكتەپ جۇرگەن بالالار! اشتىقتان ءىشى ۇليدى، سۋىقتان دەنە تىتىركەنەدى، ءىشى مەن ءتىسى بىردەي جاي تابا الماي، دوڭبەكشىپ ىڭىرسىعاندا جان بالاسى توزەرلىك ەمەس!.. جالعىز-اق سۋىق جەل عانا ىسقىرۋىن ۇدەتىپ كۇلگەن سياقتانادى...
تاماعى توق، كيىمى بۇتىندەر كوڭىرسىپ ۇيىندە وتىر. جاس بالالار "پاپالاپ"، "مامالاپ"، ەركەلەيدى، ويىنعا ەرىنەدى... وسى كۇيدى جەك كورەتىن ادام بار ما؟ ءوزى سونداي كۇيدە وتىرىپ، باسقالار اش-جالاڭاش قاڭعىرىپ جۇرە بەرسىن دەيتىن ادام تابىلا ما؟
— تابىلماس. باسقا جەردەن تابىلسا دا، ءبىزدىڭ كەڭەس ۇكىمەتىنەن تابىلماس. تابىلۋى دا مۇمكىن ەمەس.
— ۇلى توڭكەرىستىڭ ون جىلدىعىن تويلاۋعا ازىرلەنىپ جاتىرمىز. بىرەر جەتىدە توي بولادى. كەڭەس ەلىنىڭ ەڭبەكشىلەرى قىزىل تۋىپ جەلكىلدەتىپ، قاتارىن تۇزەپ، ساليۋت بەرەدى. جاس پيونەرلەر جالىندى ۇرانىن سالىپ، جەر كۇڭىرەنتىپ، قاتارىن تۇزەپ ولار دا شىعادى...
انا اش-جالاڭاش بالالار قايتەر ەكەن؟ ولاردىڭ كيىپ شىعاتىن كيىمى قايدا؟ تويىپ ىشەتىن تاماعى قايدا؟ مۇنى كىمگە ايتادى؟ ۇلى مەرەكەگە قوسىلا الماسا، جاس بۋىنمەن بىرگە ۇن بەرىپ:
— ءبىز دە ءازىرمىز! — دەگەن سەرتىن ايتا الماسا، قاپا بولىپ قالماي ما؟
قىزىلورداداعى ۋەزدىك ايەلدەر ءبولىمى بۇل جۇمىستى قولعا الىپ جاتقان كورىنەدى.
توي قىزمەتىنە اش-جالاڭاش جۇرگەن جەتىم بالالارعا كيىم-تاماق جيماق كورىنەدى.
يگى ءىس. ءبىراق، مۇنداي جۇمىس بىرەر مەكەمەنىڭ قولىنان كەلەتىن جۇمىس ەمەس. بۇعان تولىپ جاتقان كۇش كەرەك. كەڭەس ورىندارىنىڭ مەكەمەلەرىنىڭ، سانالى ازاماتتارىنىڭ كۇردەلى كومەگى كەرەك.
يگى جۇمىسقا باستاۋشى شىقسا، قوستاۋ مىندەتى كوپتىكى. كوپ كومەگىن كورسەتىپ، جۇرتشىلىق مىندەتىن وتەپ، باستالعان جۇمىستا ءا دەگەنشە ورىنداپ تاستاۋ كەرەك!
قورعانسىز بالالار كوپ بولعاندا قانشا دەيسىڭ، ءۇي بولىپ قوڭىرسىپ، بالا ءسۇيىپ، ءماز-مايرام بوپ وتىرعانداردىڭ شەگى جوق. ءبىر بالاعا تويارلىق پۇل بەرۋگە، ءبىر بالانى تويىندىرىپ جىبەرۋگە سولاردىڭ قايسىسىنىڭ ءالى كەلمەيدى؟!..
يگىلىك جۇمىس باستالدى. سانالى ازاماتتار، مەيىرىمدى انالار، انا قورعانسىز بالالارعا قاراس! ەكى كوزى جاۋدىراپ:
— ءبىزدى دە ەسىركەڭدەرشى! — دەگەندەي بوپ تۇر عوي... ءوز بالالارىنداي بالا عوي، كيىندىر، تويىندىر، جاردەمىڭدى بەر، ولار دا قۋانسىن!
جۇرتشىلىق ءوسىپ قالعانىن ولار دا كوزىمەن كورسىن!
You Might Also Like
-
كورنەل ۋنيۆەرسيتەتىنىڭ زەرتتەۋشىلەرىنىڭ قورىتىندىسى بويىنشا الەمدەگى ءولىم-جىتىمنىڭ قىرىق پايىزى اۋا، سۋ، توپىراق لاستانۋىنىڭ كەسىرىنەن بولادى ەكەن. اتموسفەراعا شىعارىلعان ۋلى زاتتار جىل سايىن ءۇش م...
