بالىق اۋلاۋعا دەگەن قىزىعۋشىلىق HARLEY-DAVIDSON كومپانياسىن قۇرۋعا سەبەپ بولعان
بيلل حارلي 1880 جىلى ميلۋوكيدە شارۋالار وتباسىندا دۇنيەگە كەلگەن. وتباسى وسىعان دەيىن انگليادان اقش-قا كوشىپ كەلىپتى. بيلل 15 جاسىندا ۆەلوسيپەد جوندەۋمەن اينالىساتىن شاعىن شەبەرحاناعا كومەكشى شەبەر بولىپ جۇمىسقا تۇرادى. ول بوس ۋاقىتىن سەرۋەندەۋگە، سۋرەت سالۋعا ارنايتىن جانە جاراتىلىستانۋ عىلىمىن جەتىك مەڭگەرىپ وسەدى.
ەكى جىل وتكەننەن كەيىن ول شاعىن بولات قۇيۋ زاۋىتىندا سىزۋشى-قۇراستىرۋشى رەتىندە تاجىريبەدەن وتەدى. ءدال وسى بولات قۇيۋ سەحىندا مودەلشى بولىپ ونىڭ مەكتەپ كەزىندەگى دوسى ارتۋر ديەۆيدسون دا جۇمىس ىستەپتى، ونىڭ وتباسى جيىرما جىل بۇرىن شوتلانديادان امەريكاعا كوشىپ كەلگەن.
حارلي شۇبار بالىق اۋلاۋدى ۇناتاتىن، اپتا سايىن ارتۋرمەن بىرگە ميلۋوكي تۇبىندەگى كولگە باراتىن. ولار سول كەزدە ءجاسوسپىرىم بولعان. بىردە شاعىن زاۋىتقا نەمىس كەلىپ، وزىمەن بىرگە Dion كومپانياسىنىڭ بەنزين قوزعالتقىشىنىڭ سىزبالارىن الىپ كەلەدى.
باستاپقىدا جىگىتتەر بالىق اۋلاۋعا ارنالعان قايىققا موتور دايىندايدى. 1900 جىلدىڭ كۇزىندە ولار ۆەلوسيپەدكە موتور سالۋدى ويلايدى. الايدا ۆەلوسيپەد قاڭقاسى ءالسىز بولىپ شىعادى. 1902 جىلى ارتۋر 26 جاستاعى اعاسى ۋولتەردى ءوتىنىپ ءجۇرىپ، وزدەرىنە قوسىپ الادى. اعاسى سول كەزگە دەيىن بىرنەشە تەمىر جول شەبەرحاناسىندا جۇمىس ىستەپ ۇلگەرگەن. 1903 جىلى موتوسيكلدىڭ ءبىرىنشى ءپروتوتيپى دايىن بولادى. جازىق الاڭدا ول ساعاتىنا 37 شاقىرىم جىلدامدىق اسىراتىن بولعان، الايدا ميلۋوكيدەگى قىراتتى جولداردا ءجۇرۋ ءۇشىن پەدالدى تەزىرەك باسۋعا تۋرا كەلدى.
سوندا حارلي موتوسيكلدىڭ اۋىرلاۋ ءارى جاڭالاۋ مودەلىن ويلاپ تابادى. بالاسى حارليدىڭ جاڭا ىسكە دەگەن قىزىعۋشىلىعىن بايقاعان اكەسى ءۇيدىڭ تەرىسكەيىندەگى اۋلاسىندا اۋدانى ءۇش تە ءتورت مەترگە جەتەتىن قورا سالىپ بەرەدى. 1903 جىلى بيلل حارلي كاسىبي دايىندىعىن ارتتىرۋ ءۇشىن تەحنيكالىق كوللەدجگە تۇسەدى. ال 1904 جىلى ۋولتەر ديەۆيدسون ءوزىن موتوسيكل جاساۋعا تولىقتاي ارناۋ ءۇشىن جۇمىسىنان شىعىپ كەتەدى.
1904 جىلى حارلي ديەۆيدسون ءۇش موتوسيكل ساتادى، ءۇش جاعدايدا دا ولار ماتەريال ساتىپ الۋعا قاراجاتى بولۋى ءۇشىن 50 پايىز الدىن الا تولەم الىپ وتىرعان. 1905 جىلى ولار بەس موتوسيكل جاسايدى، ال 1906 جىلى – 49، 1907 جىلى – 152. بۇل كەزدە ولارعا اعايىندى ديەۆيدسونداردىڭ ۇلكەنى ۋيليام قوسىلادى.
1908 جىلى كومپانيادا 36 ادام جۇمىس ىستەگەن، ال شىعارىلاتىن موتوسيكلدەردىڭ سانى 456-عا جەتىپتى. شامامەن 100 جىل وتكەندە، ياعني بۇگىندە Harley-Davidson كومپانياسىندا 6 300 ادام جۇمىس ىستەيدى.
You Might Also Like
-
يسپانيانىڭ تەڭىزدەردى زەرتتەۋ ۋنيۆەرسيتەتىنىڭ وكەانولوگتارى قىزىق جاڭالىق اشتى. تەڭىزدىڭ ەڭ تۇبىنەن، بالەار ارالدارىنىڭ جانىنان الەمدەگى ەڭ الىپ وسىمدىك تابىلعان.
-
رادياسيا، تەمپەراتۋرا، ۆاكۋۋم – بۇلار عارىشتا ادام تاپ بولاتىن قاۋىپتەردىڭ از بولىگى عانا. عارىش اپپاراتتارى جاڭا تەحنولوگيالارمەن جابدىقتالعان، ءبىراق ولار 100 % قاۋىپسىزدىكتى قامتاماسىز ەتە ...
