InfoHub Logo

قاقاعان قىس كۇندەرى ەكەن، جۇقانىڭ كورشىلەرى جۇقاعا وزدەرىن ءبىر رەت قوناق ەتتىرمەكشى بولىپ:

— جۇقا، ءبىز باس تىگىسىپ كورسەك، ەگەر باستە ءوتىپ كەتسەڭىز، ءسىزدى ۇيرەك ەتى جانە مايلى توقاشپەن قوناق قىلساق، ال ءبىز ۇتساق، ءسىز دە سولاي ەتسەڭىز، — دەپتى.

— نەمەنەگە باستەسەتىندىگىمىزدى ايتىڭىزدار، — دەپتى جۇقا.

— ءسىز الاڭدا وت جاعىپ جىلىنباي تاڭ اتقانشا تۇراسىز، — دەپتى كورشىلەرى.

— جارايدى، ءسوز شارتتان جازبايمىن، — دەپتى جۇقا كەسەتىپ.

— جۇقا، جاقسىراق ويلانىڭىز، ءۇسىنىپ قالماڭىز! جامان ايتپاي جاقسى جوق، ءۇسيتىڭىز بولسا، الدە كىمدى الاشاق-بەرەشەگىمىز بولسا ايتىپ كەتىڭىز، — دەيدى ءبىر كورشىسى.

— مەن سەندەرگە قۇرىشتاي بەرىك دەنەمدى، جارتاستاي مۇقالماس جىگەرىمدى كورسەتىپ قويماقشىمىن. مەن قانشالاعان تۇندەردى يەن دالادا مازارلىقتا وتكىزدىم دەسەڭدەرشى، ونىڭ جانىندا ءبىر ءتۇن الاڭدا تۇرۋ نەگە تۇرادى. كوپشىلىككە راحمەت، ايتاتىن وسيەتىم دە جوق، قالتام دا قۇرعاق ءقازىر، — دەيدى جۇقا.

ەكى جاق وسىلايشا كەلىسىپ، جۇقا الاڭدا تۋپ-تۋرا ءبىر ءتۇن تۇرادى. تاڭەرتەڭىندە كورشىلەرى كەلىپ ونىڭ كۇيىن سۇراعاندا، ول كۇلمىڭ قاعىپ:

— مەن تۇندە اعاش جاپىراعىن سامال جەلدىڭ سىلدىرلاتقانىن عانا ەستىدىم، الىستان ءبىر جىلتىرلاعان جارىقتى كوردىم، — دەيدى.

— جۇقا ۇتىلدىڭىز، ءبىز سىزگە وتقا جىلىنبايسىز دەگەن ەدىك قوي، ءسىز سول الىستاعى وتتان جىلىنىپسىز، — دەيدى كورشىلەرىنىڭ ءبىرى. سونىمەن، باسقالارى دا بۇل سوزگە قوسىلا كەتىپ، جۇقانى وزدەرىن قوناق ەتۋگە جىعادى.

— بۇلاردى، سەندەردى قوناق ەتەيىن، — دەيدى جۇقا.

ءبىر كۇنى كەشتە جۇقا كورشىلەرىن تاماققا شاقىرادى. كورشىلەرىنەن ءبىر قاۋىم ادام ونىڭ ۇيىنە بارىپ، استىڭ پىسۋىنە قاراپ اڭگىمەلەسىپ وتىرادى. ءبىراق ولار قانشا توسسا دا، جۇقا الدىلارىنا تاعام اكەلمەيدى، سونىمەن، ىشتەرىندەگى بىرەۋى:

— جۇقا، بىزگە دايىنداعان تاماعىڭىز قايدا؟ قۇرساعىمىز اشىپ كەتتى، — دەيدى.

— ءسال تاقات قىپ تۇرىڭدار، ازىراق تاقات قىلىڭىزدار، — دەيدى جۇقا. ءتۇن جارىم بولعاندا بارىپ جۇقا تاماققا جابدانادى. جۇقا شىعىپ كەتكەننەن كەيىن وتىرعاندار:

— ەي، بۇل قۋ ءبىزدى وتىرعىزىپ كەتپەسىن! — دەپ كۇبىرلەسە باستايدى. ولار وسىنى ايتىپ اسحاناعا شىقسا، ايتقانىنداي-اق جۇقانى كورە المايدى. سونان اۋلاعا كەلىپ قاراسا، جۇقا اعاش باسىنا قازان اسىپتى دا، استىنا ءبىر ماي شام جاعىپ قويىپ، قاننەن قاپەرسىز وتىرىپتى. مۇنى كورگەن كورشىلەرى:

— ەي، قالجىڭنىڭ دا ءوز جولى بار ەمەس پە، ءبىزدى ءبۇيتىپ اشىقتىرعانىڭ قايتكەنىڭ، — دەپ دۇرسە قويا بەرەدى.

— سىزدەرگە تاماق ءپىسىرىپ جاتىرمىن عوي، — دەيدى جۇقا.

— قازاندى اعاشتىڭ باسىنا اسىپ استىنان سىعىرايعان مايشام جاعىپ قويساڭ، قازان قاشان قايناماق؟ — دەپ سۇرايدى كور- شىلەرى. سوندا جۇقا:

— سىزدەر نەتكەن ۇمىتشاق ەدىڭىزدەر؟ ءۇش كۇننىڭ الدىندا مەن ءبىر فەرساح قاشىقتىقتاعى جىلتىراعان جارىقتى كوردىم دەگەندە سىزدەر مەنى سونان جىلىنىپ الدىڭ دەمەپ پە ەدىڭىزدەر، ءبىر فەرساح قاشىقتىقتاعى جىلتىراعان جارىققا ادام جىلىنا الاتىن بولسا، استىندا تۇرعان شامعا قازان قالاي قاينامايدى ەكەن، — دەپ جاۋاپ بەرىپتى.

---