InfoHub Logo

ۇلتتىق تەستىلەۋ ورتالىعى كوللەدج تۇلەكتەرىنە ەسكەرتۋ جاسادى. 2019 جىلدان باستاپ بارلىق كوللەدج تۇلەگى ۇبت تاپسىرادى، ءقازىر كتا دەگەن جوق. كوللەدج تۇلەگى دە ۇبت-نى جىلىنا 4 مارتە تاپسىرا الادى.

ول ۇبت ۋاقىتى: ناۋرىز، مامىر-ماۋسىم (نەگىزگى ۇبت دەپ اتالىپ، قاتىسۋعا 2 مۇمكىندىك بەرىلەدى) جانە تامىز ايلارى.

29 ساۋىردەن testcenter.kz سايتىندا نەگىزگى ۇبت-نىڭ ءبىرىنشى مۇمكىندىگىنە ءوتىنىش بەرۋ باستالدى.

ول 6 مامىرعا دەيىن جالعاسادى.

ال 7 مامىر ەكىنشى مۇمكىندىككە ءوتىنىش قابىلدانا باستايدى دا، 14 مامىر اياقتالادى.

ەگەر ءسىز كوللەدجدە وقىپ بىتىرگەن ماماندىعىڭىزدى جالعاستىرماي، باسقا ماماندىققا وقۋعا تۇسكىڭىز كەلسە، 5 ءپان (3 مىندەتتى + 2 بەيىندىك) بويىنشا ۇبت تاپسىراسىز.

ول ءۇشىن تىركەلۋ سايتىندا «وتكەن جىلعى مەكتەپ جانە كوللەدج تۇلەكتەرى» تەتىگىن باسا وتىرىپ ۇبت-عا ءوتىنىش بەرەسىز.

- سىزدەرگە تەست تاپسىرمالار سانى – 120؛

- جالپى ۋاقىتى – 4 ساعات (240 مينۋت)؛

- جوعارى بالل سانى – 140.

ەگەر ءسىز كوللەدجدەگى ماماندىعىڭىزدى جالعاستىرىپ، گرانت نەگىزىندە جوو-عا قىسقارتىلعان وقىتۋ مەرزىمىن كوزدەيتىن ماماندىقتارعا تۇسكىڭىز كەلسە، ءوتىنىش بەرۋ بولىمىندە «قىسقارتىلعان وقۋعا تۇسەتىن كوللەدج بىتىرۋشىلەرى» ساناتىن كورسەتەسىز.

ۇبت-نى جالپى كاسىپتىك جانە ارنايى پاندەر بويىنشا تاپسىراسىز.

- تەستىلەۋدىڭ تەست تاپسىرمالار سانى — 60؛

- جالپى ۋاقىتى — 2 ساعات (120 مينۋت)؛

- جوعارى بالل سانى — 70؛

- شەكتى دەڭگەي بالى — 25، «پەداگوگيكالىق عىلىمدار» ءبىلىم سالاسى بويىنشا – 35 بالل. ونىڭ ىشىندە ءار پاننەن 5 بالدان كەم بولماۋى ءتيىس.

ەگەر ءسىز كوللەدجدى شىعارماشىلىق دايىندىقتى تالاپ ەتەتىن ماماندىق بويىنشا ءبىتىرىپ، ارى قاراي وسى ماماندىق بويىنشا گرانت كونكۋرسىنا قاتىسقىڭىز كەلسە، وندا ۇبت-نى ارنايى پاننەن تاپسىراسىز. شىعارماشىلىق ەمتيحان جوو-دا وتەدى.

تەستىلەۋدىڭ جالپى ۋاقىتى — 1 ساعات 20 مينۋت (80 مينۋت).

ەگەر ءسىز كوللەدجدەگى ماماندىعىڭىز بويىنشا اقىلى نەگىزدە جوو-عا قىسقارتىلعان وقىتۋ مەرزىمىن كوزدەيتىن ماماندىقتارعا تۇسكىڭىز كەلسە، ۇبت تاپسىرمايسىز.

قۇجاتتارىڭىزدى جوو قابىلداۋ كوميسسياسىنا وتكىزەسىز.

---