InfoHub Logo

اقتوبە قالاسى، جاڭاقونىس اۋىلى،
№35 «بالبۇلاق» مدۇ «ايگولەك» توبىنىڭ تاربيەشىسى
دجۋماگالييەۆا ايناش يسپايەۆنا

ءبىلىم بەرۋ سالاسى: قاتىناس. الەۋمەتتىك ورتا. تانىم.
ءبولىمى: ءتىل دامىتۋ.
تاقىرىبى: بىزگە كولىك قالاي جانە قانداي كومەك كورسەتەدى؟
ماقساتى: ا/ بالالارعا كولىك تۋرالى تۇسىنىك بەرۋ، ولاردىڭ تۇرلەرىن اجىراتۋعا ۇيرەتۋ؛ سۋرەت بويىنشا اڭگىمەلەي بىلۋگە ۇيرەتۋ.
ءا/ سوزدىك قورلارىن تولىقتىرۋ، داۋىس ىرعاعىن دۇرىس ساقتاپ سويلەۋلەرىن دامىتۋ.
ب/ ويىنشىقتارىن مۇقيات، ۇقىپتى ۇستاۋعا تاربيەلەۋ.
كورنەكىلىكتەر: ءتۇرلى كولىك سۋرەتتەرى.
سوزدىك جۇمىس: جەڭىل كولىك، جۇك تاسيتىن كولىك، اۆتوبۋس، پويىز.

ۇيىمداستىرۋ كەزەڭى.
– بالالار، ءبارىمىز دوڭگەلەنىپ تۇرىپ، جاقسى تىلەكتەر تىلەيىك..
شاتتىق شەڭبەرى
قول ۇستاسىپ تۇرايىق
ۇلكەن شەڭبەر قۇرايىق
جاڭا شىققان بۇل كۇنگە
ءيىلىپ سالەم قىلايىق

- بالالار، ەندى ءبارىمىز ورنىمىزعا وتىرايىق.
ۇلكەنمىن عوي، مىنە، مەن،
ويىنشىقتاردى جينايمىن.
ماشيناعا مىنەر ەم،
كابيناعا سىيمايمىن.
م. الىمبايەۆ
- مەن نە تۋرالى ولەڭ وقىدىم؟
- بالالار، ايتىڭدارشى، كىمگە قانداي ويىنشىق ۇنايدى؟
- بەك، سەندە قانداي ويىنشىق بار؟

ىزدەنىس - ۇيىمداستىرۋ كەزەڭى.
– بالالار، ءقازىر سەندەرمەن كولىك دەگەن ءسوزدىڭ توڭىرەگىندە اڭگىمە جۇرگىزەمىز، سۇراقتارعا جاۋاپ بەرىپ، جۇمباقتار شەشەمىز.
– كولىك دەگەنىمىز نە؟ ول ادامعا نەگە قاجەت؟
– سەندەر بالاباقشاعا قانداي كولىك تۇرىمەن كەلەسىڭدەر؟
ءقازىر كولىكتىڭ تۇرلەرى وتە كوپ، ولاردى بىرنەشە توپقا بولۋگە بولادى: جەردە جۇرەتىن، اۋادا ۇشاتىن، سۋدا جۇزەتىن جانە جەر استى كولىكتەرى. جەر كولىكتەرىنىڭ ءوزى ەكىگە بولىنەدى: جۇك تاسىمالداۋشى جانە جولاۋشى تاسىمالداۋشى كولىكتەر.
ءبىزدىڭ بۇگىنگى ۇيىمداستىرىلعان وقۋ ءىس - ارەكەتىمىزدە ساياحاتقا شىعامىز.

1 - ايالداما. جۇك تاسىمالداۋشى كولىگى.
بالالارعا سلايد ارقىلى سۋرەتتەر كورسەتۋ.
- مىنا جۇك تاسىمالداۋشى كولىگى دەيدى. بۇل كولىكپەن جۇك تاسيدى.
- ول نە تاسيدى ەكەن؟
- وتكەن وقۋ ءىس - ارەكەتىمىزدە ءۇي جانۋارلارىنا قامقورلىق جاساۋ تۋرالى ايتتىق. ال، بىزدەر ءۇي جانۋارلارىنا قانداي قامقورلىق جاسايمىز. ولار نەمەن قورەكتەنەدى. ولارعا جەم، ءشوپ بەرەمىز.
- بالالار، بۇگىنگى جۇك تاسىمالداۋشى كولىگىمىزگە ءۇي جانۋارلارىنا ارناپ ءشوپ تيەپ جىبەرەيىك.
- جۇك كولىگى گۇرىلدەيدى. «گۇر - گۇر - گۇر»دەگەن دىبىس شىعارادى. كانە، ءبارىمىز قايتالايمىز.
- گۇر - گۇر - گۇر.

2 - ايالداما. اۆتوبۋس.
- بالالار، بىزدەر جۇك تاسىمالداۋشى كولىگى ايالداماسىنان كەلەسى ايالداماعا كەلدىك. بۇل ايالدامادا جۇمباق جاسىرعان ەكەن، سونى شەشەمىز بە؟
جۇمباق شەشۋ:
ارقاسىندا اۋىل ءجۇر،
الا تايىم شاۋىپ ءجۇر.
- بالالار، مىناۋ قانداي كولىك؟
- اۆتوبۋسپەن قايدا بارۋعا بولادى؟
- ول قايدا توقتايدى جانە بالالار وزدەرىن كولىكتە قالاي ۇستايدى؟
- بالاباقشاعا، ۇيگە، بازارعا، اۋرۋحاناعا، ساياباققا، ت. ب.
- ۇلكەندەرگە ورىن بەرەدى، بيلەت الادى، جىلاۋعا، قاتتى سويلەۋگە، كۇلۋگە، تاماق جەۋگە بولمايدى.
اۆتوبۋس العا زۋلايدى
باعىتتان ەش اۋمايدى
زىر اينالار دوڭگەلەك
كولىك بىزگە ەڭ كەرەك.
- اۆتوبۋستان تۇسكەندە قانداي ەرەجەنى ۇمىتپاۋ كەرەك؟
– اۆتوبۋستىڭ ارتقى جاعىنان ءوتۋ قاجەت.

3 - ايالداما. پوەزد.
- بىزدەر كەلەسى ايالداماعا دا كەلىپ جەتتىك.

جۇمباق.
تىزبەكتەلگەن كوك ۇيلەر،
كوشىپ جۇرگەن كوپ ۇيلەر.
- ال مىناۋ قانداي كولىك؟ بۇل - پويىز.
- پويىزدارمەن قايدا بارۋعا بولادى، ول قايدا توقتايدى؟
- پويىز. ول ۆوكزالعا توقتايدى.
- تەپلوۆوزعا قاراشى.
ءتۇتىنى كوك بۇركىگەن
جالعىز ءوزى، ساناشى
نەشە ۆاگون تىركەلگەن؟
1، 2، 3، 4، 5
- ونىمەن ۇلكەن قالالارعا، الىس جەرلەرگە بارۋعا بولادى.

سەرگىتۋ ءساتى: «كولىك».
بالالار وينايدى.
ساپقا تىزبەكتەلىپ تۇرادى.

اۆتوبۋس كەتىپ بارادى
جان جاعىنا قارادى
باعدارشامدا قىزىل جانعاندا
پويىز توقتاپ قالادى.

كولىك كەتىپ بارادى،
جان - جاعىنا قارادى.
باعدارشامدا قىزىل جانعاندا
كولىك توقتاپ قالادى.

- جارايسىڭدار، بالالار، ەندى ورنىمىزعا وتىرا قويايىق.
4 - ايالداما. جەڭىل ماشينا.
- ال مىناۋ قانداي كولىك؟ بۇل كولىكتى جەڭىل كولىك دەيدى.
كولىك جولدا جۇرەدى ۆىن - ۆىن - ۆىن، بيپ - بيپ - بيپ.
بالالار سۋ جانە اۋە كولىكتەرى دە بار.
- بالالار، مىناۋ قانداي كولىك؟
كەمە سۋدا جۇزەدى. ادامدار تاسيدى.
- بالالار، مىناۋ قانداي كولىك؟
ول اۋە كولىگى. اۋەدە ۇشىپ جۇرەدى. ادامدار تاسيدى.
ۇشاق ۇشادى اۋەدە گۋ - گۋ - گۋ.

رەفلەكسيا - تۇزەتۋ كەزەڭى.
ويىن «ماشينەلەر»
بالالار الاڭقايدىڭ كەلەسى شەتىندە تۇرادى. ولار – «ماشينەلەر». كەلەسى بەتتە تاربيەشى تۇرادى، ول جاسىل ءتۇستى جالاۋشانى كوتەرگەندە، بالالار ورتاعا ماشينە بولىپ دىبىستاپ اينالىپ جۇرەدى. سارى ءتۇستى جالاۋشانى كوتەرگەندە، «ماشينەلەر» وزدەرىنىڭ گاراجدارىنا كەلەدى (ورىندارىنا بارادى). ەگەر بالالار قىزىل ءتۇستى جالاۋشانى كورسە، وندا ورىندارىندا تۇرىپ قالادى.
- بالالار، ۇيدە اتا - انالارىڭ، تۋىستارىڭ الىس جولعا شىقسا ءبىر - بىرىنە نە دەپ ايتاتىندارىن بىلەسىڭدەر مە؟ «جولىڭ بولسىن!»- دەيدى.
اتام شىقسا ساپارعا
«جولىڭ بولسىن!»- دەيدى اپام
اپام شىقسا ساپارعا
«جولىڭ بولسىن!»- دەيدى اتام.
«جولىڭ بولسىن!»- دەيدى ولار
ۇلكەنگە دە كىشىگە.
«جولىڭ بولسىن!»- دەيدى ولار
ۇشىراسقان كىسىگە.
وسى سوزدەن بايقادىم
قۋات بارىن، كۇش بارىن
«جولىڭ بولسىن!»- ايتامىن،
الىس جولعا شىقسا كىم.
ساۋ بولىڭىزدار!
جولدارىڭىز بولسىن!