ءتوراعاسى جايعاستى تورگە بارىپ،
بوس ورىن جوق.
زال ءىشى كومبە-حالىق.
اۋەزوۆتى ءبىر شەشەن ماقتاپ جاتىر،
اراكۇدىك تاماعىن كەنەپ الىپ...
ءبىر بۇرىشقا وتىردىم مەن دە بارىپ.
جۇرت ماقتاۋدا.
ماقتاۋسىز ءسوز بولمادى.
نەلەر شەشەن تايپالتتى-اۋ ءسوز جورعانى.
اق شىراعدان استىندا - ءتوراعاسى،
ءتوراعاسى - اۋەزوۆ، قوزعالمادى...
ەڭبەگىمەن، ەسىمەن باقتى جانعان -
اينالاسى مۇحاڭنىڭ اق شىراعدان.
...ءتوراعانىڭ اۋزىنا قارايدى جۇرت،
قالت جىبەرمەي ايتقانىن قاقشىپ الماق.
قۇتتىقتاۋلار، ماقتاۋلار تىندى-داعى،
زالدىڭ ءىشى ءبىر ساتكە تۇنجىرادى...
ءتوراعاسى ساتىلاپ سويلەپ كەتتى،
ءسال ىرعالىپ ورنىنان تۇردى-داعى.
ەسىمدە جوق. مۇحاڭنىڭ نە دەگەنى،
(جاڭىلىپ، جالعان ايتىپ نە كەرەگى.)
...الدىمدا «ابايداعى» اباي تۇردى
اۋەزوۆ جاساپ بەرگەن كەمەدەگى...
ءارى قاراي وكەتتى ەلەس مەنى،
شىراق ءسوندى...
بەلگىسىز نەگە وشكەنى؟!
(مۇحاڭ ماعان الىستان ەلەستەدى...)
سۇراعىم...
سۇراعىم بار ەمەس پە ەدى؟
شىراق قايدا؟!
جاڭاعى جارىق قايدا!؟
كيمەلەپ ۇمتىلادى حالىڭ قايدا؟!
شىنىمەن اۋەزوۆكە ماڭىتپاي ما؟!
مىنا اعىن بارا جاتىر الىپ قايدا؟!..
(قالقيىپ، قاراۋىلداپ تۇرامىن با؟)
مەن-داعى قارسى ءجۇزدىم بۇل اعىنعا.
تولقىننان كەۋدەمدى الىپ،
ايعاي سالدىم:
- و، مۇحا!
سۇراعىم بار! سۇراعىم بار!..
الىستان ايعايلاپ مەن قويماعاسىن،
ايالداپ، انداپ، شولىپ اينالاسىن.
اعىنمەن ارپالىسقان مەنى كورىپ:
- ايت،- دەدى - سۇراعىڭدى،
قاي بالاسىڭ؟..
سۇراق تا، جاۋاپ تا مەن قايتارمادىم،
تىمقۇرسا اتىمدى دا ايتا المادىم...

---