ايتساڭشى، كوكە-اۋ، قاي ماڭدا،
ورنى مەنىڭ ءۇيىمنىڭ؟
قانىپ ەڭ تالاي ايرانعا،
قولىنان اجەم تيىننىڭ.
ورنى قايدا ءۇيىمنىڭ؟
ايتسايشى، كوكە-اۋ، قاي ماڭدا،
مەكەنى تۋىس، باۋىردىڭ؟
اتتانعان ءوزىڭ مايدانعا،
ورنى قايدا اۋىلدىڭ؟
قاي ماڭدا، كوكە-اۋ، قاي ماڭدا،
كورسەتشى ءبىزدىڭ كوشەنى؟
...پىشەنى پىسكەن جايلاۋدا،
ساپ-سالقىن سامال ەسەدى.
جۇرتتارىن ىزدەپ قاۋىمنىڭ،
ۋاقىت ءبىراز تەككە ءوتتى.
ورنىنا ەسكى اۋىلدىڭ،
جوڭىشقا شىعىپ، كوكتەپتى.
اتىزدارعا ارىق بوپ،
وزگەرىپ كەتكەن جىلعا دا.
وزگەرىستەرگە قارىق بوپ،
وزگەرمەي تاۋ تۇر ءبىر عانا.
قاي ماڭدا ەدى؟!
قاي ماڭدا؟!
(ەكەۋمىز بىردەي اڭىردىق)
ەسكى جۇرت - ءقازىر جايلاۋ دا،
جان-جاعى شالعىن، شابىندىق...

---