InfoHub Logo

بىردە جانتايلاق باتىر مەن جانتاي باتىر ىرگەلەس تورعاۋىتتان قارىمتا قايىرىپ، كوپ جىلقىسىن قۋىپ اكەتەدى. قايتار جولىندا قالجىر وزەنى بويىنداعى توعان قازۋشىلارعا ايالدايدى. قولعابىس كورسەتىپ ايداپ كەلە جاتقان جىلقىسىنان بەرەدى. كەيىن سول توعان «جانتايلاقتىڭ تەرىس اققانى» اتالىپ كەتەدى.

وسى كوپ جىلقىنىڭ حابارى قارا ەرتىس بويىنداعى الديار باتىرعا جەتەدى. مۇنىڭ سالدارىنان تورعاۋىتتارمەن ىرگەلەس جاتقان كەرەيلەرگە دە ءزابىرى ءتيۋى مۇمكىن ەدى. سونى ويلاپ الديار باتىر ءبىر توپ ادامىمەن سوڭىنان قۋادى. مول ولجاعا كەنەلمەك بولادى. بوكەنباي تاۋىنىڭ كۇنباتىس ەتەگىندە قۋىپ جەتەدى. استىندا جويقىن قاراجورعاسى، قولىندا ۇزىن نايزاسى بار الديار باتىر ءوز ادامدارىنان ۇزاڭقىراپ شىققان بويىندا: «با-تىر بولساڭ، جەكە شىق!» — دەپ داۋىستايدى. جانتايلاقتىڭ قارتايعانىن ەسكەرىپ، جانتاي باتىر جەكپە-جەككە شىعادى. ول ءوزىنىڭ قۋلىعى مەن ايلاكەرلىگىنە سالىپ، مىنگەن اتىنىڭ ەكپىنىمەن الديارعا جاقىنداي بەرە اتىنىڭ باسىن تەجەپ تۇرا قالىپ: «باتىر! جەكەڭ جەكە، ال ارتىڭداعىڭ نە؟» — دەيدى. الديار ارتىنا بۇرىلىپ قاراي بەرگەندە، جانتاي باتىر لىپ ەتىپ شولاق نايزاسىن ساعاعىنان قاداپ جىبەرىپ، اتىنان اۋدارىپ تۇسىرەدى. باسقا قۋعىنشىلار ەكى باتىرعا قاتتى قارسىلىق كورسەتە المايدى.

جانتايلاق باتىر قيىن شاقتا توڭىرەكتەپ، ازۋلى جاۋلارى- مەن ايقاسا ءجۇرىپ، ەلدى بوسقىندىقتان قۇتقارۋدىڭ ءبىر جولى وسى دەپ رۋلاستارىن ەگىنشىلىككە تارتادى. جانتايلاق باتىر تۇسىندا مالىن باعىپ، ەگىنىن سالىپ وتىرعان ەلدىڭ شىرقىن ۇرانحايلار مەن تورعاۋىتتار بۇزا بەرەدى. ولاردىڭ باسىنعاندىعى سونشالىق — «جانتايلاق تۇراتىن جەرىن ايتسىن، سوعىسامىز!» دەپ حابارشىسىن جىبەردى. جانتايلاق بۇرىننان ارالاس- قۇرالاس بولىپ جۇرگەن، قىسىلعاندا بىر-بىرىنە كومەكتەسەتىن ەلگە شاپقىنشىسىن جىبەرەدى. ءبىراق ول جاق كومەككە كەلمەي قالادى. دەگەنمەن جانتايلاق باتىر سەرىكتەرىمەن ءارقاشاندا جاۋلارىنا تويتارىس بەرىپ وتىرادى.

باتىردىڭ تۋعان جەرىندە «جانتايلاق توعانى»، «جانتايلاق وتكەلى» دەگەن جەر اتاۋلارى قالعان.

وقۋعا كەڭەس بەرەمىز:

ءجالاڭتوس باتىر

ەلشىبەك باتىر تۋرالى

ەر جاۋعاش

---