InfoHub Logo

جۇقا اۋدان اكىمىنە بارىپ ءوزىن قازىلىققا تاعايىنداۋىن ءوتىنىپتى. قازىلىق ورىن بولماعاندىقتان اكىم وعان ءوزىنىڭ دىلگىرلىگىن ءبىلدىرىپتى. سوڭىندا ءۇمىتىن ۇزگەن جۇقا:

— وندا «قالىس قازىلىققا» تاعايىنداساڭىز بولماس پا، كەيبىر قيىن ماسەلەلەردى شەشۋگە كومەكتەسەيىن، — دەپتى.

اكىم بۇعان تولىق قوسىلىپ، جۇقانى قالىس قازىلىققا تاعايىنداپ، وعان قىزمەت كەڭسەسىن دايىنداپ بەرىپتى.

جۇقا جۇمىس ۇستەلى رەتىندە ءبىر اعاش ساندىقتى اكەلىپ ورنالاستىرىپتى دا، ۇستىنە قاعاز-قالامدارىن قويىپتى. پالەندەي ءبىر جۇمىس شىعىپ جاتپاسا دا، ول ءار كۇنى ءوز ۋاعىندا كەڭسەسىنە كەلىپ تۇرىپتى.

ءبىر كۇنى ءبىر ادام باسقا ءبىر ادامنىڭ ۇستىنەن ارىز كوتەرىپ، اكىمنىڭ الدىنا كەلىپتى. داۋگەر:

— ول وتىز ەكى كەنتار وتىن جارادى. ول وتىن جارعاندا مەن قارسى الدىنا وتىرىپ الىپ «سىلتە! سىلتەي ءتۇس!» دەپ داۋىستاپ، وعان دەم بەرىپ وتىردىم، سوندىقتان ول وتىندى تەز ءارى ويداعىداي جارىپ وتىردى. ءبىراق اقى الاتىن كەزدە ماعان ەشنارسە بەرمەدى. ءىس جۇزىندە مەن دە شارشاپ-شالدىقتىم، — دەيدى.

— ونىڭ «سىلتە، سىلتەي ءتۇس!» دەپ دەم بەرگەنى راس پا؟ — دەپ سۇرايدى اكىم وتىن جارۋشىدان.

— راس، — دەپ جاۋاپ بەرەدى وتىن جارۋشى.

اكىم بۇعان پالەندەي دەپ كەسىم جاساي الماي وتىرعاندا كەنەت ەسىنە «قالىس قازى» جۇقا تۇسەدى دە، ولارعا:

— سەندەردىڭ بۇل داۋلارىڭدى قالىس قازى شەشىم ەتسىن، — دەيدى. جامبىل قىزمەتشىلەرى انا ەكەۋىن جۇقانىڭ كەڭسەسىنە ەرتىپ كەلەدى.

جۇقا داۋگەردىڭ ارىز-شاعىمىن ەستىپ بولعاننان كەيىن:

— ارينە، سەن دە اقى الۋعا ءتيىستىسىڭ، ەڭبەگىڭ تەككە كەتسە، قالاي بولعانى؟ — دەيدى.

وتىن جارۋشى دەرەۋ جۇقاعا قاراپ:

— قازى مىرزا، مەن وتىن جارعاندا ول ءبىر شەتتە قىزىق كورىپ قانا وتىرعان، ونىڭ اقى الاتىن قاقىسى نە؟ — دەيدى.

جۇقا وتىن جارۋشىعا بارلىق اقشاڭدى اكەل دەپ بۇيىرادى. ول اقشانى قولىنا العاننان كەيىن بىردەن-بىردەن جەرگە تاستايدى، كۇمىس تەڭگە جەرگە تۇسكەن سايىن «دىڭعىر، دىڭعىر» ەتكەن داۋىس شىعارادى. ول وسىلايشا اقشانى جەرگە تاستاپ بولعاننان كەيىن، وتىن جارۋشىعا:

— سەن اقشاڭدى اكەت! — دەيدى. ال داۋگەرگە:

— سەن سول اقشاڭنىڭ داۋىسىن اكەت! — دەيدى.

---