InfoHub Logo

ادامداردىڭ اراسىندا كومەككە ەڭ مۇقتاج بولعاندار — تۋىلا سالىپ جالعىز جانە مۇقتاج بولىپ قالعان جەتىم بالالار. ولارعا قامقور بولۋ، قاجەتتىلىكتەرىن ورىنداۋ، مۇسىلمانداردىڭ نەگىزگى مىندەتتەرىنىڭ ءبىرى بولىپ تابىلادى. مۇنداي جەتىم قالعان بالالار — اللاھۋ تا’الانىڭ بارشا قۇلدارىنا امانات. جاقىن تۋىستارىنان باستاپ بۇكىل مۇسىلماندارعا بۇل اماناتتى قورعاۋ مىندەت رەتىندە جۇكتەلگەن. بۇل مىندەتتى ورىنداعاندار اللاھۋ تا’الانىڭ جانە ونىڭ سۇيىكتى پايعامبارى مۇحاممەد الەيھيسسالامنىڭ رازىلىعىنا قاۋىشادى.

سۇيىكتى پايعامبارىمىز: «جەتىمدەرگە كومەكتەسىپ، ولارعا قامقور بولعان ادام، مەيلى ول تۋىستارىنان بولسىن نەمەسە بوتەن بىرەۋ بولسىن، مەنىمەن ول ءجانناتتا مىنا ەكى ساۋساقتاي جاقىن بولامىز» دەگەن. مۇنى ايتقاندا پايعامبارىمىز ورتاڭعى ساۋساعى مەن سۇق ساۋساعىنىڭ اراسىن ءبىراز اشىپ كورسەتكەن ەدى.

سونىمەن قاتار جەتىمدەرگە قاراپ، ولارعا باس-كوز بولۋ سۇيىكتى پايعامبارىمىزعا دەگەن بورىشىمىز بولىپ تابىلادى. ويتكەنى پايعامبارىمىز دا ءارى اكەسى، ءارى شەشەسى جوق جەتىم بولىپ وسكەن. جەتىمدى قۋانتۋ وتە ۇلكەن ساۋاپ. ادامدى ءجانناتتاعى جوعارى دارەجەلەرگە قاۋىشتىرادى. اللاھۋ تا’الا «نيسا» سۇرەسىنىڭ 10-اياتىندا بىلاي دەگەن: «جەتىمدەردىڭ مال-مۇلىكتەرىن ادىلەتسىز تۇردە جەگەندەردىڭ جەيتىن نارسەلەرى تەك قانا وت بولادى جانە جاقىندا جالىنداپ جانىپ تۇرعان وتقا تۇسەدى».

قانشاما قالالاردىڭ باتىپ كەتۋىنە، سارايلاردىڭ قۇلاۋىنا جەتىمدەردىڭ لاعنەتى (قارعىسى) سەبەپ بولعان. پايعامبارىمىز بىلاي دەگەن:

«جەتىمدى ۇرعان كەزدە ونىڭ جىلاۋىنىڭ سەبەبىنەن ارش دىرىلدەيدى جانە اللاھۋ تا’الا پەرىشتەلەرىنە بىلاي دەيدى:

— ەي پەرىشتەلەرىم، اكەسى توپىراققا كومىلگەن جەتىمدى كىم جىلاتتى؟»ونى كىم جىلاتقانىن ءوزى جاقسى بىلسە دە، جەتىمنىڭ ابىرويىن كوتەرۋ ءۇشىن سولاي سۇرايدى. پەرىشتەلەر:

— اللاھۋ تا’الا ەڭ جاقسىسىن بىلەدى، — دەيدى.

— ەي پەرىشتەلەرىم، سەندەر كۋا بولىڭدار، كىم سول جەتىمدى قۋانتسا، مەن دە ونى قيامەت كۇنى قۋانتامىن!

---