جۇرەگىمە جۇك ارتىپ جۇرگەنىمدە،
قاجىدىڭ با، بايعۇسىم، بىلمەدىم بە؟
شايپاۋ ءتيىپ، شارشاتىپ كىم كورىنگەن،
ۋلاندىڭ با، بىلمەيمىن كىرلەدىڭ بە؟
بارى اقيقات ءبىر دەرتتىڭ جۇرەگىمدە،
دارىگەر-اۋ،ارقالاپ جۇرەمىن بە؟
سورلايتىنداي سونشاما كىم ەدىم مەن،
Heگe ايانىش اتاسىڭ ىرەڭىڭنەن؟
ايتىپ ءولتىر،قايتەسىڭ بوسقا ويلانىپ،
جۇرەك دەرتى ولىمگە باستاي ما انىق؟
اداسام با ومىردەن جاستاي قالىپ؟
ەت جۇرەگىم كەتە مە تاسقا اينالىپ؟
Heگe ايتپايسىڭ، تۇرعانشا بوسقا ويلانىپ.
پەرى سوققان پەندەدەي ەسى جارىم،
تامىرىمدا تۋلايدى ەسىل اعىن.
بۇل جۇرەكتىڭ بىلمەيمىن نەسىن الدىم،
نەسى جوعىن بىلمەيمىن، نەسى بارىن؟
قانىم قايناپ بارادى، قانىم قايناپ،
ءبىر امال تاپ، دارىگەر،ءحالىمدى ويلاپ.
الاۋىرتقان اقىننىڭ قولىن بايلاپ،
اكەتپەسىن اجال كەپ، ولىمگە ايداپ.
...جوق!
دارىگەر!
ورناتپا باسقا جۇرەك!
باسقا ءلۇپىل جاساما، باسقا لەپ.
قالاي ايتام، بۇلىنگەن جۇرەگىمدى،
بىلدىرمەي دوعدىر الىپ تاستادى دەپ؟!
وڭگەرىپ وگەي جۇرەك قايدا بارام،
وزگەنىڭ عۇمىرىن قالاي پايدالانام؟
سىيىڭا راحمەت، قايران ادام!
ءوزىمنىڭ جۇرەگىمدەي قايدا ماعان؟
الماستىرام!؟
دەدىڭ-اۋ، الماستىرام!..
ءسىرا، مەنىڭ جۇلدىزىم جانباس بۇدان.
ءوزىمنىڭ جۇرەگىمدى جەرلەپ كەلىپ،
وزگەنىڭ ءومىرىن ءقايتىپ جالعاستىرام؟
تۋلا، جۇرەك!
وكىنەم مەن نەسىنە!؟
تۋعان جۇرەك،ارينە،ولمەسىن بە؟
...جوق!
دارىگەر!
قوزعاما،
دامىلداسىن،
ءاربىر جۇرەك ءوزىنىڭ كەۋدەسىندە!

---