كامپيت
تاڭاتار شەشەسىنىڭ زەينەتاقىسىمەن كۇن كورەدى. كەيدە بۇل زەينەتاقى دا ونى-مۇنىعا جەتە بەرمەيدى.
بۇگىن تاڭاتار اۋلادا زەرىگىپ وتىر ەدى، شۋلاسىپ ويناپ جاتقان بالالارعا كوزى تۇسە كەتتى. سونان سوڭ بالالاردى جانىنا شاقىرىپ الىپ:
- جارىساسىڭدار ما؟ - دەدى.
بالالاردىڭ كوزى جايناپ كەتتى:
- جارىستىراسىز با؟!
- ول ءۇشىن ۇيلەرىڭنەن كامپيت الىپ كەلۋ كەرەك، - دەدى تاڭاتار.
كەيبىر بالالار "مامام ۇرىسادى" دەپ، بارعىسى كەلمەپ ەدى، تاڭاتار ولارعا:
- وندا جارىسقا قاتىسۋ قۇقىعىنان ايىرىلدىڭدار، - دەدى.
ءبىراز بالالار ۇيلەرىنە قاراي شاپقىلاسىپ كەتىپ، ۋىسىن تولتىرىپ كامپيت الىپ شىقتى دا، تاڭاتاردىڭ كۇرەكتەي الاقانىنا سالدى. تاڭاتار الاقانىنداعى كامپيتتەردى جانىندا جاتقان جۇقا تاقتايشانىڭ ۇستىنە ءۇيىپ قويدى. سونان سوڭ بالالارعا قاراپ:
- انەەەۋ تالدى كورىپ تۇرسىڭدار ما؟! - دەدى. - مەن ۇشكە دەيىن ساناعاندا، جۇگىرىپ كەتەسىڭدەر دە، سول تالدى اينالىپ جۇگىرىپ كەلەسىڭدەر.
ءسويتتى دە، تاڭاتار بالالاردى جارىسقا قوسىپ جىبەردى. سوسىن ءوزى تاقتايشانىڭ ۇستىندەگى كامپيتتەردىڭ ءبىرىن الىپ، قاعازىن ارشىدى دا، اۋزىنا جىتىردى. وسىدان كەيىن تاقتايشانىڭ ۇستىندەگى كامپيتتەردى ۋىستاپ الىپ شالبارىنىڭ قالتاسىنا تىقتى. تاعى دا ۋىستاپ الىپ كويلەگىنىڭ قالتاسىنا سالدى. وسى كەزدە تاقتايشانىڭ ۇستىندە ءۇش ءتۇيىر كامپيت قالعان ەدى. تاڭاتار ولاردى الدىڭعى بولىپ جۇگىرىپ كەلگەن ءۇش بالاعا جۇلدە رەتىندە ۇسىنا سالدى. سونان سوڭ ءبىراز-بىراز ماقتاۋ سوزدەر ايتتى. سوسىن شالبارىنىڭ ارتقى قالتاسىنا قولىن سالىپ جىبەرىپ، كىشكەنە، سىنىق قالامساپ الىپ شىقتى دا، الگى ءوزى جەگەن كامپيتتىڭ قاعازىنىڭ اق جەرىنە 3 دەگەن جازۋدى جازىپ، ءۇشىنشى بولىپ كەلگەن كىشكەنە قارا بالانىڭ قولىنا ۇستاتا سالدى. سوسىن قاعازى تاۋىرلەۋ-اۋ دەگەن تاعى دا ەكى كامپيتتى ارشىپ، ۇرتىنا تىقتى دا، قاعازىنا جازىپ جىبەرىپ، تيىسىنشە ەكى بالاعا ۇستاتتى.
- اعا! - دەدى وسى كەزدە كىشكەنە قارا بالا تاڭاتارعا جاۋدىرەي قاراپ. - مىنا قاعاز بىردەڭەگە جارايدى ما؟
- وي، ول بارىنە دە جاراي بەرەدى! - دەدى تاڭاتار داۋسىن قۇبىلتا سويلەپ.
بالا ەندى تاڭاتارعا ۇمىتتەنە قارادى:
- وقۋعا تۇسۋگە دە جارايدى ما؟ مامام وسكەندە وقۋعا تۇسەسىڭ دەپ ايتادى.
- وقۋعا تۇسۋگە دە جارايدى، - دەدى تاڭاتار بۇلك ەتپەستەن. - وسى قاعازبەن باراسىڭ دا، فيزكۋلتۋرا فاكۋلتەتىنە ءتۇسىپ كەتە بەرەسىڭ.
بالا وسىعان قۋانىپ قالدى.
- ەڭ باستىسى، تاڭاتار اعاڭنىڭ جارىسىنىڭ جۇلدەگەرى دەگەن ءسوزدىڭ ءوزى نەگە تۇرادى! - دەپ، تاڭاتار بالانىڭ باسىنان اۋىرتپاي شەرتپەك الدى. وسىدان كەيىن باسقا بالالارعا كوزىن الارتا قاراپ:
- قانە، تاراڭدار! - دەدى.
ءسويتتى دە، ءوزى ۇيىنە كىرىپ، قالتاسىنداعى قالعان كامپيتتەرىمەن شاي ءىشىپ جاتتى.
You Might Also Like
-
قاراعاندى وبلىسىنىڭ احمەت اۋىلىندا ساكەن سەيفۋللين اتىنداعى مەكتەپتىڭ 100 جىلدىق مەرەيتويى تويلانعالى جاتىر، دەپ حابارلادى www.24.kz.
-
احمەت بايتۇرسىنوۆتىڭ ولەڭدەر توپتاماسى «ماسا» دەگەن اتپەن ورىنبوردا 1911 جىلى باسىلعان. جيناققا قويعان اتىنا ول ەداۋىر وي، سالماقتى جۇك ارتقان دەۋگە بولادى.
