InfoHub Logo

ءۇي يەسى ايەل قوناقتارىنىڭ كوزىنشە قولىنداعى تەلەفونىمەن تاعى دا سويلەسە باستادى.
قوناقتار بۇل ۇيگە ءتۇس الەتىندە جينالعان ەدى. ايەل سودان بەرى تەلەفونىمەن قوناقتارىنىڭ كوزىنشە بىرنەشە مارتە الدەكىمدەرگە ءوزى قوڭىراۋ شالىپ سويلەستى. قوناقتار مۇندايدا ەرىكسىز ءتارتىپتى بالاداي بولا قالاتىن. ايەل ۇيدە بەينە ءبىر جالعىز جۇرگەندەي-اق، تەلەفونىمەن ەمىن-ەركىن، ارلى-بەرلى ءجۇرىپ ساڭقىلداي سويلەسەدى. كەيدە سول كۇيىمەن انا بولمەگە ءوتىپ كەتىپ، قايتادان قوناقتارى وتىرعان بولمەگە كىرەدى. ايەلدىڭ قىزىلشىرايلانعان ءجۇزى تەلەفونمەن سويلەسكەن سايىن كۇلىمسىرەي ءتۇسىپ، كوزدەرىنىڭ قيىعىن وتىرعان قوناقتارىنا كۇلىمدەگەن كۇيى اۋدارا كەتۋدى دە ۇمىتپايدى. ايەل ءار سويلەسكەن سايىن ءوزىنىڭ جەكە شارۋاسىنا بايلانىستى وتىنىشتەرىن تەلەفوننىڭ ارجاعىنداعى الدەكىمدەرگە وزىمسىنگەن ۇنمەن قاداي تاپسىرىپ جاتادى. ايەلدىڭ سويلەسكەن داۋىس ىرعاعىنا قاراپ-اق، بۇل وتىنىشتەردىڭ قاپىسىز ورىندالاتىندىعىنا قوناقتارىنىڭ ءوزى دە كۇمانسىز سەنگەندەي ەدى. ول ءار سويلەسۋىن اياقتاپ بولعاننان كەيىن قوناقتارىنا تۇتقانىڭ ارجاعىنداعى جاننىڭ كىم ەكەندىگىن، قانداي ماماندىق يەسى ەكەندىگىن بايىپپەن تۇسىندىرە باستايتىن. سونان سوڭ ءۇي يەسىنە ءتان ادەتپەن جاعالاي وتىرعان قوناقتارىنا بايەك بولعانسىپ، استان الىپ وتىرۋىن وتىنەدى.
- مىنا تەلەفوننىڭ ىشىندە، - دەيدى ايەل وسىنداي كەزەكتى ءبىر سويلەسۋىن اياقتاپ بولىسىمەن قوناقتارىنا قولىنداعى تەلەفوندى كورسەتىپ. - بارلىق ماماندىق يەلەرىنىڭ تىزىمدەرى ەنگىزىلگەن. ءبارى دە شارۋاعا كەرەكتى ادامدار. ءتىپتى دۇكەنشى قىزدىڭ دا ەسىمى بار. تەك ءبىر عانا ماماندىق يەسى ەنگىزىلگەن جوق.
قوناقتار "بۇل كىسىگە ءقادىرى كەم بوپ تۇرعان ول قانداي ماماندىق يەسى بولدى ەكەن؟" دەگەندەي بىر-بىرىنە قاراستى.
- قانەكي، اس الىڭىزدار، - دەدى ايەل جايدارىلانا كۇلىپ. - استان الىپ وتىرىڭىزدار.
كەنەت ايەلگە داستارقان باسىندا وتىرعان ءساندى كيىنگەن ءبىر ەر ادام سۇراق قويدى:
- كەشىرىڭىز، - دەدى ول ايەلگە قاراپ وتىرىپ. - الگىندەگى ءسىز ايتقان ماماندىق يەسى قانداي ماماندىق بولدى ەكەن دەپ ويلانىپ وتىرعانىم.
ايەل قوناعىنىڭ سوزىنە سىڭعىرلاي كۇلىپ الدى.
- مىنا تەلەفوننىڭ ىشىندە، - دەدى سونان سوڭ ايەل قولىنداعى تەلەفوندى سىلكىلەي ۇستاپ. - شارۋا تاپسىرۋعا جارارلىق كەرەكتى ماماندىقتاردىڭ ءبارى دە ەنگىزىلگەن، تەك ءمۇعالىم عانا جوق.
ايەلدىڭ مىنا سوزىنەن كەيىن وتىرعان قوناقتار تاعى دا بىر-بىرىنە قاراستى.
- مۇعالىمگە، - دەدى ايەل سوسىن تاعى دا ءبىر سىڭعىرلاي كۇلىپ الىپ، - ءتايىرى، قانداي شارۋا تاپسىرا قويماقسىز؟
ءبىراق سۇراق بەرۋشى قوناق ايەلمەن بىرگە قوسىلا كۇلگەن جوق جانە بىلاي دەدى:
- وندا ءسىز قوعامداعى ەڭ ماڭىزدى شارۋامەن اينالىسىپ وتىرعان ماماندىق يەلەرىن ۇمىت قالدىرعان ەكەنسىز.
ايەلدىڭ جۇزىندەگى الگىندەگى كوڭىلدى كۇلكىسى لەزدە جويىلىپ، قوناعىنا اڭتارىلعان كۇيىندە قاراپ قالدى.

---