مەنىڭ تاڭداۋىم
سارى الا كۇزدىڭ كەلبەتى، سارى دالانى سىيقىرلاعانىنا بۇگىن ءتورتىنشى كۇنگە تاياپ كەلەدى. قوعامعا تۇلعا رەتىندە، سارا جولىمنىڭ العاشقى باسپالداعىنا اقىرىن عانا قادام باسىپ كەلەمىن. ادامنىڭ ارمانى شەكسىزدىكپەن توعىساتىن، سانادا جارق ەتەتىن ساف يدەيالار جيىنتىعى ىسپەتتەس. "كۇز كەلبەتىن سالقىن ساناپ، كوپشىلىگىمىزدىڭ جاتسىناتىنىمىز جاسىرىن ەمەس. ءبىراق بىلەسىز بە، كەشە عانا كىرىپ كەلگەن تابيعاتتىڭ بۇل مەزگىلىن العاش رەت سۇلۋ كەلبەتتە كۇتىپ الدىم". قاباعى- قاتۋلى، جاڭبىرىن توگىپ جىبەرەتىن- جىلاۋىق، جاسىل دالانى كۇن كوزىندەي كەلبەتكە وراندىراتىن سارى كۇزدى- مەن جانى نازىكتىك پەن سۇلۋلىققا قۇشتار قىز بالاسىنداي كوردىم.
قاتۋلىلىعى- ەركەك جاراتىلىسىنا وڭايلىقپەن ەرە قويمايتىن قايسار قىزدى ەسكە تۇسىرسە، تولاسسىز جاڭبىرى- سىلاڭ قاعىپ، سىبدىر كۇلكىسىمەن جانىڭدى باۋرايتىن نازىك جاندىلاردىڭ مامىقتاي كوڭىلدەرىنىڭ سۇيكىمدى كەلبەتتە بۇرتيا قالاتىنى، اينالانى التىنعا وراۋى- ايەل تابيعاتىنىڭ قولىنان كەلەتىن قاۋقاردىڭ قانشالىقتى مىقتى ەكەنىن كورسەتۋگە ۇمتىلعىسى كەلەتىندەي. بۇل ويلاردىڭ تۋۋىنا قازاق ۇلتتىق قىزدار پەداگوگيكالىق ۋنيۆەرسيتەتىندە وقىسام، تۇنىپ تۇرعان ءبىلىم مەن تاربيەنىڭ ورداسىنا ەنىپ، 75 جىلدىق تاريحى بار "ۇستازداردىڭ شەبەرحاناسىنا" اينالعان، قازاق قىزدارىنىڭ كيەلى مەكەنى بولعان، قارا شاڭىراقتا ءبىلىم السام دەگەن اسقاق ارمانىمنىڭ ورىندالىپ وتىرعانىندا.
ەلىمىزدە جوعارى وقۋ ورىندارى كوپ. ءبىراق، مەنىڭ تاڭداۋىم نە ءۇشىن قازۇقپۋ؟
- ول جانى مەن ءتانى تازا قازاق قىزدارىنىڭ كەلبەتىن تەرەڭىنەن تانىپ، اپالارىمنىڭ ءىزىن باسىپ، دانالىعى مەن وسيەتتەرىن بويعا ءسىڭىرىپ، قۇندىلىقتارىنا قانىق بولىپ، كەلەشەككە ناعىز باتىر، ءور مىنەزدى، تازالىق پەن سۇلۋلىققا جانى قۇشتار، قازاقيلىق تاربيەگە سۋسىنداپ، باسەكەگە قابىلەتتى، كەز-كەلگەن ورتادا كوشباسشىلىققا لايىقتى رەتىندە، ءوز ءىسىنىڭ ناعىز مامانى اتانىپ، ەلىمە، حالقىما قىزمەت ەتىپ، ۇلكەن كىسىلەردىڭ باتاسىن الىپ، ەل ازاماتتارىن تاربيەلەپ، ءتالىم بەرىپ، ەگدە تارتقاندا ءومىرىمنىڭ بوس وتپەگەنىن سەزىنگىم كەلگەن وسىنداي بولاشاققا قۇرىلعان سۇيكىمدى ارمانىم مەن قيالىمنىڭ جەتەگىندە، اقىل مەن جۇرەك قالاۋى تۇيىسكەن ورتاسىندا تاڭداۋ جاساپ كەلىپ وتىرعان وقۋ وردام- وسى قازۇقپۋ! قاس پەن كوزدىڭ اراسىندا زىمىرايتىن التىن ۋاقىت نەسىمەن ەرەكشە دەگەن ساۋالعا، جاقسى جانداردىڭ ءتالىم مەن تاربيەسى توعىسقان التىن وردادا باس قوسىپ، يگى جاقسىلاردىڭ ىقپالىنان بولاشاق مامان رەتىندە وتكىزگەن كەزەڭىم دەر ەدىم!
ءاربىر عيماراتىنا كىرگەننەن-اق قازاق ءومىرىنىڭ ءيىسى اڭقيدى: مادەنيەتىمىزدىڭ، ۇلتتىق كيىمدەرىمىز بەن بۇيىمدارىمىزدىڭ مۇندا قانشالىقتى اسقاقتاپ، قۇرمەتتەلىپ، ۇلىقتالىپ تۇرعانىن كورىپ كوزىم تويدى. ۋنيۆەرسيتەتتىڭ ءار قابىرعا، ءار بۇرىشتارىندا- ونەگەلىك! ۇلتتىق قۇندىلىقتار دارىپتەلىپ، ناعىز قازاق قىزدارىنىڭ اۋىلى، شاڭىراعى ءتىلسىز سايراپ تۇر.
ارمانىمنىڭ الداماعانىنا كوزىم جەتتى!
مەنىڭ وسىندا وقۋعا تۇسۋدەگى ماقساتىم، ءبىلىم ورداسىندا قازاقى وربيتانىڭ قالىپتاسۋى.! كەڭ ەتەك جايۋى!
مەن بولاشاعىما سەنەمىن!
گۇلدانا بەكبولات
You Might Also Like
-
اقبوكەن — كوپتەن قازاقستان تابيعاتىنىڭ بەلگىسى بولىپ تابىلالى. سۇتقورەكتىلەردىڭ جۇپتۇياقتىلار وتريادى، قۋىس مۇيىزدىلەر تۇقىمداسىنىڭ وكىلى (دەنەسىنىڭ ۇزىندىعى 150 سم، شوقتىعىنىڭ بيىكتىگى 80 سم، ...
-
الماتىلىق وقۋشىلار نورمادان 2-3 ەسە اۋىر سومكە ارقالاپ ءجۇر. بۇل تۋرالى الماتى قالالىق تاۋارلار مەن كورسەتىلەتىن قىزمەتتەر ساپاسى جانە قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىمو...
