InfoHub Logo

21 قىركۇيەك كۇنى ق ر پارلامەنت ءماجىلىسىنىڭ وتىرىسىندا دەپۋتات يرينا سميرنوۆا ءبىلىم بەرۋ سالاسىنداعى قارجىلاندىرۋ ماسەلەسىن كوتەرىپ، قازاقستاندىق مۇعالىمدەردىڭ جالاقىسىن مىڭ دوللارعا جەتكىزۋ باستاماسىن كوتەرگەن بولاتىن. وسى ورايدا BNews.kz تىلشىسىنە قازاقستاندىق سالالىق ءبىلىم جانە عىلىم قىزمەتكەرلەرى كاسىپوداعىنىڭ ءتورايىمى مايرا امانتايەۆا وسى ماسەلەگە قاتىستى ءوز پىكىرىن ءبىلدىردى.

«وتە ورىندى، ۋاقىتىندا كوتەرىلگەن باستاما. ارينە، دەپۋتتاتىڭ بۇل ۇسىنىسىن قولدايمىن. مەملەكەت وسى سالاعا كوپتەگەن قارجى ءبولىپ وتىر. نازارىنان تىس قالدىرعان جوق. مەنىڭ ءبىلىم سالاسىندا ەڭبەك ەتىپ جۇرگەنىمە 40 جىل بولدى. بۇل سالادا ءالى دە ءتيىستى شارالار اتقارىلۋى قاجەت. ولقىلىقتار بار. تاۋەلسىز ساراپشىلاردىڭ مالىمەتىنشە، ەلىمىزدە 340 مىڭ ءمۇعالىم بار. ونىڭ 61 مىڭنان استامى 53-60 جاس ارالىعىندا. ال زەينەت جاسىنا شىققان ۇستازداردىڭ سانى 7 مىڭنان اسادى. سوندىقتان ءمۇعالىم ماماندارى قارتايىپ بارا جاتىر دەسەم، قاتەلەسپەيمىن. تاۋەلسىز ساراپشىلاردىڭ ايتۋىنشا، ەلىمىزدە ۇستازداردىڭ تەك 60%-ىنىڭ جەكە باسىندا ءۇيى بار ەكەن. ال قالعاندارى پاتەر جالداپ، ۇي-كۇيسىز ءجۇر. بۇل ماسەلە، كوبىنەسە، جاس مۇعالىمدەرگە بايلانىستى. بۇل – ۇستازداردىڭ الەۋمەتتىك جاعدايىنىڭ تومەن ەكەندىگىن كورسەتەدى. مىسالى، جاس ءمۇعالىمنىڭ جالاقىسى 50 مىڭ تەڭگە. ال ونىڭ بۇل اقشاسى قايدا جەتەدى؟ جالداپ تۇراتىن ءۇيى، كيىمى، تاماعى جانە شىعىندارى بار»، - دەيدى كاسىپوداق ءتورايىمى.

سونىمەن قاتار، مايرا امانتايەۆا جەرگىلىك بيلىك وكىلدەرى مۇعالىمدەردى قوسىمشا جۇمىستارعا تارتاتىندىعىن ايتتى.

«حالىقتىڭ ۇستازعا دەگەن كوزقاراسىن وزگەرتۋ كەرەك. مىسالى، جەرگىلىكتى بيلىك وكىلدەرى مۇعالىمدەردى ستاديونداردى تولتىرۋعا، ءبىر كەرەكسىز كىتاپتاردى الۋعا، گازەت-جۋرنالداردى جازدىرۋعا، ءتۇرلى شارالارعا قاتىستىرۋعا قۇمار. وسىدان كەيىن ءمۇعالىمنىڭ بەدەلى قايدان بولسىن؟ ءتىپتى، پەداگوگيكالىق وقۋ ورىندارىنا دا جاستاردىڭ قۇلشىنىسى از. سەبەبى، بۇل ماماندىققا ۇبت-دان تومەن بالل العاندار عانا بارادى»، - دەيدى ول.

ونىڭ ايتۋىنشا، ەلىمىزدە ۇستازدار مەن دارىگەرلەردىڭ الەۋمەتتىك جاعدايىن قولداۋدى كۇشەيتۋ قاجەت.

«ءبىز دامىعان 30 مەملەكەتتىڭ قاتارىنا كىرۋ ءۇشىن الدىمەن ءبىلىم سالاسىنا ءمان بەرۋىمىز كەرەك. سەبەبى، مەملەكەتتىڭ قۋاتتىلىعى ونىڭ ءبىلىم دەڭگەيىمەن، دەنساۋلىق جانە الەۋمەتتىك جاعدايىمەن ولشەنەدى. بارلىق كاسىپتى وقىتاتىن مۇعالىمدەر. ال بۇگىندە ولاردىڭ ەڭبەكاقىسى وتە تومەن. رەسپۋبليكاداعى ورتاشا جالاقىنىڭ 75%-ى. ءبىلىم سالاسىندا جۇمىس ىستەپ جۇرگەن جانداردىڭ 86%-ى ايەل ازاماتتار. ەر ازاماتتاردىڭ ۇلەسى از. نەگە ولار بۇل سالاعا بارماي جاتىر؟ ويتكەنى، جالاقىسى از. ءبىلىمدى ءمۇعالىمسىز جاڭا يننوۆاسيالىق تەحنولوگيالاردى مەڭگەرمەيمىز، ۇلت جوسپارىن دا جۇزەگە اسىرا المايمىز. سەبەبى، ساۋاتسىز مامان سالانى قۇردىمعا جىبەرەدى. سوندىقتان، مۇعالىمدەر مەن دارىگەرلەردىڭ جاعدايىن جاساۋدى – ءبىرىنشى كەزەكتە تۇراتىن ماسەلەلەردىڭ قاتارىنا قوسۋ قاجەت»، - دەيدى م.امانتايەۆا.

 

---