نەمەرە تۋعان كۇنىڭ قۇتتى بولسىن!
«بالام — بالىم، نەمەرە — جانىم» دەگەن قازاقپىز عوي، اۋلەتىمىزدىڭ جالعاسى — ءوسىپ كەلە جاتقان كىشكەنە بالاپانىمىز ەلىنىڭ ارقا سۇيەر ۇلكەن ازاماتى بولسىن.
بۇل دۇنيەنىڭ ەڭ قىزىعى نەمەرە
قانات جايىپ وسە بەرسىن كەرەگە
شاڭىراققا ۋىق بولىپ شانشىلىپ
كەلە بەرسىن نەمەرە مەن شوبەرە
ونىڭ ءيىسى ەلدەن ەرەك تاماشا
جۇرەگىڭنىڭ سوعۋى دا جاڭاشا
شايعا سالعان قانت سەكىلدى ەريسىڭ
اتا دەگەن ءبىر سوزىنە بالاشا
سۇراعانىن ىزدەپ تاۋىپ بەرەسىڭ
شارشاساڭ دا ءجۇرشى دەسە ەرەسىڭ
بارعان جەردە قوناقتاردان ۇيالماي
داستارحاننان كامپيتتەردى تەرەسىڭ
ءماز مەيرامسىڭ ونىڭ ءاربىر ىسىنە
ىزدەيسىڭ كەپ كورىنبەسە كوزىڭە
ءومىر بويى ارمانداعان باقىتىڭ
وسى ەمەس پە ىزدەگەنىڭ وزىڭە
ءوز بالاڭنان ىستىق بولار نەمەرە
نەمەرەسى جوق ادامدار سەنە مە؟
شاڭىراققا ۋىق بولىپ قادالىپ
تولا بەرسىن نەمەرە مەن شوبەرە.
You Might Also Like
