وڭتۇستىك تۋرالى ويلار
وڭتۇستىك ءوڭىرى دەسە، جۇرەگىم ەلجىرەپ، ەرەكشە كۇي كەشەمىن. كەڭەس ۇكىمەتىنىڭ قۇدىرەتى ءجۇرىپ تۇرعان كەز. اقىندار ايان مەن تۇرسىناي: «شىمكەنتتە بولماعان ەكەنسىز، بارىپ قايتايىق»، — دەپ قولقا سالدى. «وڭتۇستىكتىڭ حالقى ەرەكشە عوي، شىركىن، وقىرماندارىمىزدىڭ ءبارى سوندا، ادەبيەت، ونەر دەسە، كارى-جاسى ىشكەن اسىن جەرگە قويادى»، — دەپ تالاي اقىن-جازۋشىلاردىڭ تامسانا ايتقانىن ەستىپ جۇرەتىنمىن. وسىنىڭ الدىندا عانا كەنەن اتامىزدىڭ تويىندا كەزدەسىپ قالىپ، بۇرىن الدىندا بولىپ كورمەسەم دە، سالەم بەرگەنىمدە، شىمكەنت وبلىستىق پارتيا كوميتەتىنىڭ سول كەزدەگى ءبىرىنشى حاتشىسى اسانباي اعا:
— سەن فاريزاسىڭ عوي؟ اقىن-جازۋشىلار شىمكەنتتەن شىقپايدى، سەن ءبىر كەلمەيسىڭ، — دەگەنى بار ەدى.
ايان مەن تۇرسىناي 2-3 كۇن ارالاتىپ، حالىقپەن جۇزدەستىردى. تۇركىستاندى دا سول جولى العاش كورىپ ەم. بايدىبەك اتا، دومالاق انا باسىنا كەلگەندە، جانىمىزداعى پارتيا، كومسومول وكىلدەرىنەن سەسكەنىپ، ءبارى سوستيىپ-سوستيىپ تۇرىپ قالدى. مەن شىداماي:
— ال، مەن دۇعا وقيمىن، قول جايۋدان قورقاتىندار، ماشينانىڭ جانىنا بارا بەرىڭدەر، — دەپ تىزەرلەپ وتىرا كەتتىم دە، انام مارقۇمنان قاعازعا جازىپ الىپ جاتتاعان اياتىمدى وقي باستادىم.
تەمىرلاندا، تۇركىستاندا، مەكتەپتەردە وتكەن كەزدەسۋلەر بۇل ەلدەگى ۇلكەن-كىشىنىڭ پوەزيانى استىن سىزىپ وقيتىن، تەرەڭ تۇسىنەتىن بىلگىرلەر ەكەنىن دالەلدەگەندەي اسەر قالدىرىپ ەدى. «ورىس ءتىلىن بىلمەيتىندەر زيالى ادامدار قاتارىنا قوسىلماي جۇرگەندە، انانىڭ ءتىلىن قاستەرلەپ، قازاق جىرىن كيە تۇتقان وڭتۇستىك ءوڭىرى شىنىندا دا ەلدىگىمىزدەن قالعان ەسكەرتكىشتەي قۇيقاسى كەپپەگەن ۋىز ولكە ەكەن-اۋ،» — دەگەن وي كەلدى ماعان. ءار اۋىلىنا بارا قالساڭ، سەنىڭ جاقسى-جامان جازعان-سىزعانىڭدى جاتقا سوعىپ الدىڭنان شىعاتىن جاستاردى، كوپتەن كورمەي، ساعىنىسىپ تابىساتىن اعا-جەڭگەلەردەي ءىش تارتاتىن ۇلكەندەردى كورىپ، بالا شاعىم وتكەن تۋعان اۋىلىمداي باۋىر باسىپ كەتكەن ەدىم.
وعان قوسا شىمكەنت ايماعىنداعى سىڭىلىلەرىمىز قانداي ەدى! سايلاۋكۇل، جۇمازيا، ورازكۇل، رسالات، ءنازيرا — ءارقايسىسى ەل باسقارعان، دانالىق پەن نازىكتىكتى بويلارىنا قاتار سىڭىرگەن ارۋلار. ءحانبيبى سەكىلدى اقىنىن، اسحان، زۋحراداي جۋرناليستەردى دە ورتالارىنا الىپ جۇرەدى. كوپ جەرلەردە، ونىڭ ىشىندە مەن تۋعان اتىراۋدا، قىز-كەلىنشەكتەردىڭ باستارى بىرىكپەي، تاۋىققا شاشقان تارىداي ءتۇيىر-تۇيىر بولىپ ءار جەردە جۇرگەندەرىن كورگەندە، كوڭىلىڭ قۇلازيدى.
كەيىن شىمكەنت وڭىرىندە بىرنەشە رەت بولىپ تا جۇردىك.
سوڭعى 5-6 جىلدا ول جاققا جولىم تۇسپەدى. وعان سەبەپ بولعان ءبىر جاعداي بولدى. زاۋىتبەك تۇرىسبەكوۆ باۋىرىمىز وبلىس اكىمى كەزىندە مەنىڭ جارىققا شىققان ءبىر جيناعىمنىڭ ءبىراز داناسىن، الدىن-الا تەلەفون ارقىلى كەلىسىپ الىپ، ءبىر كومپانيادان كولىك سۇراپ، ءوزىم الىپ باردىم. كىتاپ ساتىلعاسىن اقشاسىن تولەۋگە كەلىسىپ جەكە باسپادان شىعارعان ەدىم. ءبىراق «سۋ اياعى قۇردىمعا كەتتىنىڭ» كەرى كەلىپ، ايتەۋىر سوڭعى جاعى سيىر قۇيىمشاقتانىپ تىندى. اپارعانداعى ويىم: «مەنىڭ وقىرماندارىم وڭتۇستىكتە كوپ، اكىمشىلىك وزىممەن بىرەر كەزدەسۋ ۇيىمداستىرىپ، كوڭىل بولسە، ماعان دا، وقىرمانعا دا دۇرىس بولار ەدى».
بۇدان كەيىن كىتاپ جايلى كىمنەن سۇرارىمدى بىلمەي، سۇراۋ سالۋعا ۇيالىپ، اقىرى بۇل ماسەلەگە نۇكتە قويعانمىن.
وتكەن جىلى سارىاعاش اۋدانىنىڭ ورتالىعىندا تولەبي بابامىزعا ەسكەرتكىش اشىلىپ، وڭتۇستىككە تاعى دا جولىم ءتۇستى. ونىڭ ۇستىنە سارىاعاشتىڭ ساۋمال تەكتەس سۋىن ءىشىپ، لاس وي، لايلى تىرلىكتەن كىرلەنگەن ىشكى قۇرلىسىمىزدى جۋىپ-شايۋ جايلى پەندەلىك پيعىل دا جوق ەمەس ەدى.
تولە بابانىڭ تۇلعاسىنا تاعزىم ەتۋگە حالىق ويدان-قىردان كوپ جينالدى. بۇل دا رۋحاني تىرلىك تامىرىنىڭ ءنارى كەپپەگەنىن كورسەتكەندەي.
«قوناق از وتىرىپ، كوپ سىنايدى» (وسى تىركەستەگى «سىنايدىنىڭ» ورنىنا «بايقايدى» دەسە دۇرىس-اۋ) — ەلدىڭ بىرلىك پەن تىرلىك دەڭگەيى وسىنداي ۇلكەن شارۋانىڭ ۇستىندە توسىن كوزگە كوبىرەك كورىنگىش قوي.
ۇلتتى ۇلى كۇشكە، جەڭىلمەيتىن جۇدىرىققا اينالدىراتىن — ونىڭ بىرلىگى. سول بىرلىك پەن ىنتىماقتى تۇتاستىقتىڭ تۋى ەتىپ كوتەرىپ، ءۇش ءجۇزدىڭ ويلىسى مەن ورنىقتىسىن ماڭىنا جيناعان داناگوي بابامىزدىڭ كوزگە ەلەستەر تۇلعاسى بۇرىن-سوڭدى سومدالماعاندىقتان با — ايتەۋىر وڭتۇستىكتىڭ اۋداندارىنان، كورشىلەس ەلدىڭ جەرىندە قالعان اۋىلدارىمىزدان كەلگەن سان جۇزدەگەن كارى-جاستىڭ ىنتىماق-ىقىلاسى وسى تۇستا ايقىن كورىنگەندەي ەدى.
سوڭعى جىلدارى وڭتۇستىك قازاقستان وبلىسى، ونىڭ بۇگىنگى اكىمى بەردىبەك ساپاربايەۆ جايلى كولەڭكەلى كۇڭكىلدەر كوپ ەستىلەتىن بولدى. وتانىمىزدىڭ جەرى شۇرايلى، حالقى شىرايلى ايماعىنا تاعىلىپ جۇرگەن ايىپتار راسىندا شىندىق پا، جوق بولماسا، وبلىس اكىمى بولۋعا كوز سۇققان باسەكەلەس بەلسەندىلەردىڭ «ۇرا بەرسە، قۇداي دا ولەدى — جامانداي بەرسەك، جىعامىز» پيعىلىنان تارالعان جاماۋ-جاماناتتار ما دەگەن وي كەلدى ماعان.
ومىردە جاقسى مەن جامان دەگەن ۇعىمدار سالىستىرمالى تۇردە باعالانادى. وڭتۇستىكتىڭ تىرشىلىك تىنىسىنا ءۇڭىلۋدى ويلادىم. نيەتىم پەرىشتەنىڭ قۇلاعىنا شالىنعانداي، تۇركىستانعا بارۋدىڭ ءساتى تۇسكەنى. كورنەكتى ونەر قايراتكەرى رەجيسسەر رايىمبەك سەيتىمەتوۆ تۇركىستان قالاسىندا تەاتر اشاتىن بولىپ، شەرحان مۇرتازا اعامىز ەكەۋمىزدى شاقىرىپتى.
قازاق ءۇشىن عانا ەمەس، بۇكىل ورتالىق ازيانىڭ مۇسىلماندارى ءۇشىن مەدينە بولىپ ەسەپتەلەتىن تۇركىستان باياعى، بۇدان بىرنەشە جىل كورگەندەگىمدەي ەمەس، شامدارى جارقىراپ، ۇيلەرى ساندەنىپ، ەۆروپانىڭ قالاسىنا ۇقساپ قالىپتى.
قالا اكىمى ءومىرزاق امەت ۇلى العىر ازامات بولسا كەرەك، كوپ سويلەپ كولگىرسۋگە جوق تا، ۇندەمەي ءجۇرىپ ءىس تىندىراتىن سىڭايلى. قازاق-تۇرىك ۋنيۆەرسيتەتىنىڭ وقىتۋشى ماماندارىنا ارنالعان قالاشىق، ورالماندار اۋىلى — وسى اكىمنىڭ كەزىندە سالىنىپتى. بۇرىن اۋدان ورتالىعى بولىپ كەلگەن تۇركىستاندا ەندى كاسىبي دراما تەاترى بوي تۇزەگەن. ارينە، وتكەن جىلعى عاسىر جارىمدىق تۇركىستان تويى قارساڭىندا رەسپۋبليكا وبلىستارى مەن مەكەمەلەرىنىڭ سۇبەلى ۇلەس قوسۋى قالانىڭ بىتىم-بەدەرىن كوركەيتۋگە سەبەپ بولعانى راس. ءبىراق كەلگەن قارجىنى ورىندى پايدالانباي، قاي تيىننىڭ قاي سايعا قۇيىلعانى بەلگىسىز جايلار ءار جەردە ءجيى كەزدەسىپ ءجۇر عوي.
كوپ ادام اكىم بولۋعا ۇمتىلادى. بۇگىنگى ەكونوميكاعا تىزگىندەلگەن زاماندا شارۋاشىلىقتان حابارى بولماسا دا، ايتەۋىر بايۋ ءۇشىن، حالىققا بولىنگەن قارجىنى قىمقىرىپ قالتاسىنا سالۋ ءۇشىن ۇمتىلادى.
ەلدىڭ تۇرمىسىنا ەلۋ پايىز ارناپ، وزىنە ون پايىز قالدىراتىن اكىمگە ەسكەرتكىش ورناتۋعا بولار ەدى.
ءار اكىم، ءاربىر باسشى اۋىلداستارى مەن رۋلاستارىن جانىنا جيىپ الىپ، وزگەلەردى وڭمەنىنەن يتەرىپ تاستايتىن «ءداستۇر» شىعاردى. تۇركىستاننىڭ اكىمى ماڭايىنا ىسكەر، ەڭبەكقور جانداردى جيناۋعا تىرىسادى ەكەن. ال، قازاق-تۇرىك ۋنيۆەرسيتەتىندە جاعداي ءتىپتى دە ولاي ەمەس. وعان بىزگە، پارلامەنت دەپۋتاتتارىنا، كەلىپ جاتقان حاتتار كۋا...
وڭتۇستىكتىڭ قاي اۋدانىنا بارساڭ دا، كوسىلىپ سالىپ، قول جايىپ وتىرعان جاندى كورمەيسىڭ: جاسى دا، كارىسى دە تىربانىپ تىرشىلىك ەتىپ جاتادى، بۇلار اسپاننان اقشا جاۋمايتىنىن ەرتە تۇسىنگەن، ەڭبەك ەتۋگە ەرىنبەيتىن كونبىس ەل.
ءتىلىنىڭ دە، ءدىنىنىڭ دە ءتىنىن تارقاتپاعان، شۇكىرشىلىكتەن تانباعان، قازاقى مىنەزىن، حالقىمىزدىڭ سالتى مەن ءداستۇرىن بويىنا سىڭىرگەن ەل.
وڭتۇستىكتە باستى ءبىر پروبلەما بار. ول — رۋ-رۋعا ءبولىنىپ، جىكتەلىپ-جىلىكتەنىپ، «انا رۋدىڭ ازاماتى اتقا ءمىندى، ءبىز نەگە قالىپ قويدىق» دەيتىن اتالاستىقتىڭ اۋرۋى.
ول اۋرۋدىڭ ۆيرۋسىن تاراتاتىن قاراپايىم حالىق ەمەس، بيلىكتىڭ بيىگىنە كوز الارتاتىن اتقامىنەرلەر. بۇل ايماقتاعى «دت» مەن «قت» تارتىسىن وسى تاڭدا بۇكىل رەسپۋبليكا جۇرتى ەزۋ تارتىپ مىسال ەتىپ ايتاتىن بولدى. ليۆەنسوۆ مىرزانىڭ باسشىلىق ەتكەن تۇسىنان ۇلى ءجۇز (دۋلات، قاڭلى، سىرگەلى، شانىشقىلى) بەن قوڭىرات رۋىنىڭ وكىلدەرىن باسشى قىزمەتكە تالاستىرىپ قويىپ، كىم اقشانى كوپ بەرسە، مايلى ورىندى سوعان بەرۋ «ءداستۇرى» باستالعان. ال، تاۋكە حانعا دەيىن قوڭىرات قاڭلىنىڭ ءىنىسى بولىپ كەلگەنى كوكىرەگىنىڭ كوزى بار ادامعا تاريحنامادان بەلگىلى. ەكى اعانىڭ يتجىعىس كۇرەسىنە جالتاڭداعان كىشى ءجۇزدىڭ بالالارى (ولار دا وبلىس حالقىنىڭ 30 پايىزىن قۇرايدى) «بالانىڭ كىشىسى بولعانشا، ءيتتىڭ كۇشىگى بولدىڭ» كۇنىن كەشەدى.
ال، بۇگىنگى اكىم ساپاربايەۆتان ءمىن ىزدەپ، قالايدا كىنا تابۋعا تىرىسۋ، الاساپىران كەزدە الا الماعان اقشانى تىلگە تيەك ەتىپ، ايەلدەردىڭ ءبىر توبىن ايقايلاتىپ استاناعا جىبەرۋ — سول باياعى داۋدىڭ جالعاسى.
وڭتۇستىك — قازاق ەلىندەگى ەڭ باي، ەڭ شۇرايلى ءوڭىر. بايلىعى — الدىمەن ەكى ميلليونعا جۋىق حالقى. شۇرايلىسى — ءبىر ءتۇيىر ءدان ەكسەڭ، ون ءتۇيىر ءونىم بەرەتىن قۇنارلى توپىراعى.
وڭتۇستىك — قازاق جەرىنىڭ مولتەك كورىنىسى سەكىلدى: الاتاۋ، قاراتاۋ، تۇلكىباس، قازىعۇرتتاي تاۋلارى، بايدىبەك، وتىرارداي جازىق دالاسى، سوزاق پەن شارداراداي قۇمدى ءوڭىرى، سايرام، ورداباسى، ماقتارال سەكىلدى سۋارمالى جەرى — قازاقستان دەگەن بايتاق ەلدىڭ كىشىرەيتىلگەن كارتاسى ىسپەتتى.
وتكەن جىلى وڭتۇستىك وڭىرىندە 150 مىڭ توننا ماقتا تالشىعى ءوندىرىلىپتى. ونىڭ ءبىر تونناسىن 800 دوللاردان ەسەپتەگەننىڭ وزىندە 120 ميلليون دوللار تۇسەدى ەكەن.
تەرىسكەيدە جاتقان سوزاق بويىنداعى ۋراننىڭ ءوزى اۋداندى ەمەس، وبلىس حالقىن ون جىل اسىراي الادى.
تۇلكىباستان ءتۇرلى ءتۇستى سەمەنتىنىڭ ءوزى نەگە تۇرادى!
سايرامنىڭ باۋ-باقشاسى مەن كوكونىسى قازاقستاننىڭ ءشوپ وسپەيتىن باتىسىندا جاتقان، اسقاباق پەن قاۋىندى اجىراتا المايتىن اعايىندارعا دا جەتىپ جاتقان جوق پا؟!
شىمكەنت قالاسىنداعى دارى-دارمەك، سەمەنت، «شنوس»، ەكسكاۆاتور، ستانوكتار شىعاراتىن ونداعان اكسيونەرلىك قوعامداردى قوسپاعاندا، اۋدانداردىڭ مۇمكىندىگى ەلدىڭ مۇرتىن بالتا شاپپايتىنداي ەتىپ اسىراۋعا جەتەدى.
ارينە، شەشىلۋگە ءتيىستى پروبلەمالار بۇل ايماقتا جوق دەۋدەن اۋلاقپىن.
ەل باسشىلارىنىڭ ءىزى تۇسە بەرمەيتىن سوزاق جەرىندەگى بۇرىن ەسكى ادىسپەن ءوندىرىلىپ كەلگەن ۋراننىڭ اشىق قالعان شاحتالارى تىرشىلىككە وتە زياندى رادياسيا تاراتىپ جاتىر. ول — حالىقتىڭ دەنساۋلىعىنا قاتتى زيان كەلتىرىپ تۇنشىقتىرىپ جاتقانى بەلگىلى.
تۇلكىباستىڭ باسقا جەردە كەزدەسپەيتىن اك، سەمەنت بايلىقتارىن ءتيىمدى پايدالانۋ ءۇشىن ونى وڭدەيتىن زاۋىت تەحنولوگياسىن جاڭارتۋ، جەتىلدىرۋ وبلىس ەكونوميكاسىن ارتتىرارى انىق.
ال، سايرام اۋدانىنداعى باۋ-باقشا، كوكونىس ءوندىرۋ ءداستۇرىن سۋارمالى اۋدانداردىڭ بارىنە ەنگىزسە، ەڭبەكقور ەلدىڭ العىستان باسقا ايتارى جوق.
اقجارقىن، ەڭبەك دەسە بالا-شاعاسىنا دەيىن باس تارتۋدى بىلمەيتىن وسىنداي حالقى بار، بايلىعى تۇنعان جەرى بار ەلدە رۋ-رۋعا، اتا-اتاعا ءبولىنۋ اۋزىن اشقان ارىستانداي مەملەكەتتەردىڭ قورشاۋىندا وتىرعان قازاق سەكىلدى حالىقتىڭ تۇتاستىعىن، باۋىرمالدىعىن ءمۇجيدى. تامىر-تامىرىمىزدى كەۋلەپ كەلە جاتقان نارىق زامانىندا جۇرتشىلىق تىعىز ورنالاسقان ايماقتا قيىنشىلىق ارتا تۇسەدى، جۇمىسسىزدىققا جول اشىلادى. وسى رەتتە اتا-اتاعا ءبولىنىپ ىدىراماي، كاسىپتەستىك، ۇندەستىك پەن ۇيلەسىمدىلىك جاعىنان باس قوسىلسا، بىرىكسە، ەلدىڭ مەرەيى وسەر ەدى. ەلدەگى اقساقالدار رۋدىڭ اقىلگويى ەمەس، ۇلتتىق بىرلىكتىڭ داناگويى بولسا، ۇرپاققا ونەگە بولارى انىق.
بەردىبەك ساپاربايەۆ مىرزانى ءبىلىم، عىلىم مينيسترلىگىندە قارجى ءبولىمىن، كەيىن مينيسترلەر كابينەتىنىڭ قارجى سالاسىن باسقارعان كەزىنەن جاقسى بىلەمىن: قازاق مەكتەپتەرىنىڭ، بالالارعا ارنالعان باسىلىمداردىڭ كۇردەلى ماسەلەلەرىن شەشۋدە ۇلتقا جاناشىر، ۇياتى، مەيىرىمى كەتپەگەن ازامات ەكەنىن كورگەنبىز. كرەسلونىڭ بيىكتەۋىنە كوتەرىلسە بولدى، كوكىرەكتەرىنە نان ءپىسىپ شىعا كەلەتىن باسشىلاردان ەمەس، قاي سالادا، قاي وڭىردە ىستەسە دە، كۇن-تۇن دەمەي ەلدىڭ مەرەيىن وسىرەم دەپ دامىل كورمەيتىن ازاماتتى رۋ مەن جۇزگە جىلىكتەپ كىنا ارتۋعا تىرىسۋ نەگىزسىز جانە ەلگە ابىروي بەرمەيتىن جاي.
ارينە، تابيعاتىنان قازاقى جۇمساق مىنەزدى ول كادر تاڭداۋدا رۋ باسىلارىنىڭ كوڭىلىن جىقپايتىن بۇرىنعى سۇرلەۋدەن بۇرىلا الماي جۇرگەن سەكىلدى. اۋدان اكىمى — ەلدىڭ تاعدىرىن شەشەتىن ءىرى تۇلعا. ونىڭ ىسكەرلىگىنە، حالىققا جاناشىرلىعىنا، ادامگەرشىلىگىنە قاراي قاراۋىنداعى قارا حالىقتىڭ تىرشىلىك جاعدايى وسەدى نە وشەدى. اۋدان، قالا اكىمدەرىنە كىرۋ، جاعدايىن ايتۋ قاراپايىم كىسى ءۇشىن ەل باسىنا كىرۋدەن قيىن. بۇل — وڭتۇستىكتە عانا ەمەس، بۇكىل ەلدە ءورىس الىپ وتىرعان كولەڭكەلى كورىنىس.
وڭتۇستىكتىڭ اۋداندارىنداعى اكىمدەردىڭ ىشىندە العىرلىعىمەن، ۇيىمداستىرۋ قابىلەتىمەن، جاڭا داۋىردە جاڭاشا جول ىزدەيتىن كادرلاردى تاني ءبىلۋ، تاڭداي ءبىلۋ قاسيەتىمەن كوزگە تۇسەتىندەرى نەكەن ساياق.
باستىقتاردى كورسە، باس كيىمىن الىپ، «ءلابباي، تاقسىر!» — دەپ جالپاڭداپ، تومەنگىلەردى كورسە، توبەسىنە تۇكىرەردەي قۇلىقپەن قارايتىن اكىمدەر بۇگىنگىدەي قيىن-قىستاۋ زاماندا ەل تاعدىرىن شەشىپ جارىتپايتىنى بەلگىلى.
ءبىر اۋداندا سان جاعىنان ءبىر وبلىستىڭ حالقى تۇراتىن ماقتارال، سارىاعاش اۋداندارى ءبىر كەزدەگى ۇر دا جىق ساياسات جۇيەسىمەن بىرىكتىرىلىپ، ەكى بولمەلى قالا پاتەرىندە ءۇش ۇرپاقتىڭ ەرلى-زايىپتى ءۇش جانۇياسى تۇرعانداي كۇي كەشىپ وتىر.
تۇرعىندارى تىعىز ورنالاسقان، ءارقايسىسىندا 260-230 مىڭ ادام تۇراتىن وسى ەكى اۋداندى رەتىمەن ءتورت اۋدانعا ءبولۋدى شەشۋ دە — كۇن تارتىبىندەگى ماسەلە.
ەكى ميلليون، ياعني رەسپۋبليكا حالقىنىڭ تورتتەن ءبىر بولىگى تۇراتىن وڭتۇستىك قازاقستان — بايلىعىمەن دە، حالىقتىڭ تاربيەلىلىگىمەن دە، مۇمكىندىگىمەن دە ۇلگى-ونەگە تاراتار ايماق. بۇل ايماقتىڭ ابىرويى، كەمشىلىگى مەن كولەڭكەلى تۇستارى قازاق ەلىنىڭ ءار ازاماتىنا ورتاق دەپ ويلايمىن.
مەن شىمكەنتتە تۋعانىم جوق، ساپاربايەۆ تا باۋىرىم ەمەس. ءبىراق «وڭتۇستىك»، «شىمكەنت» دەگەن سوزدەر ايتىلعاندا، جۇرت مىسقىلدى كەيىپپەن ەزۋ تارتىپ، «رۋ تالاسىنىڭ وردالى ءوڭىرى» دەگەندەرىن ەستىگەندە، جانىم اۋىرادى.
بابالارىمىز ەگەمەندىك پەن تۇتاستىقتىڭ قازاق تاريحىنداعى العاشقى تۋىن تىككەن ايماقتىڭ ابىرويى — ءبارىمىزدىڭ ورتاق ابىرويىمىز.
2001
You Might Also Like
-
ادام بالاسى كوزى تىرىسىندە ءبىر-بىرىن قادىرلەي الماۋدان ءومىر بويى وپىق جەسە دە، قورىتىندى شىعارمايدى. بىر-بىرىنە دەگەن ەنجارلىقتىڭ زاردابى جاناشىرلىق پەن مەيىرىمنىڭ ءنارىن سورىپ ازايتۋعا قالدى. ءبىراق...
-
«بىرەۋ ولمەي، بىرەۋ كۇن كورمەيدى» دەپ، جارىقتىق اتا-بابامىز تابيعاتتا ولشەۋسىز، كەزدەيسوق ەشتەڭە بولمايتىنىن قاراپايىم ناقىلمەن ايتىپ كەتىپتى. بايقوڭىردان اسپانعا ۇشىپ جاتىرمىز، دۇنيەنى...
