تاعدىر
ادام ەسەيىپ، بالالىق شاعىنان جىراقتاعان سايىن، ۇلى مۇحيتقا بەت العان كەمەدەگى كىسىدەي، قول بۇلعاپ قالعان جاعالاۋ — جاستىعى مەن جاس كۇنىن ءجيى-جيى ەسكە الىپ، جان دۇنيەسىن باۋراعان ءبىر سەزىمدەرگە بولەنەدى ەكەن.
ءوزىم تۋىپ-وسكەن الىستاعى ماناش اۋىلى مەنىڭ كوز الدىما ءجيى ەلەستەيتىن بولىپ ءجۇر. جاس شاعىڭدى، اۋىلىڭدى، مۇعالىمدەرىڭ مەن ورتاق تانىستارىڭدى، بالا شاقتاعى ءتۇرلى وقيعالاردى ەسكە الىپ، اڭگىمەلەسەتىن ادامدار دا سيرەپ بارادى. مەن تۋعان اۋىل ءقازىر بۇل دۇنيەدە جوق. ونىڭ ورنى جەر بەتىنەن دە، گەوگرافيالىق كارتادان دا سۇرتىلگەن. ونىڭ ورنىندا بۇگىن ەسكى جۇرتتى كۇزەتكەن مولالار مەن تەڭىز بەتتەن سوعاتىن اپتاپ جەلمەن ارالاسىپ ىزىڭداعان ارۋاقتاردىڭ رۋحى عانا. قازاقتىڭ قانشاما اۋىلى وسىلاي دۇنيەدەن ءوتتى...
جاقىندا ماعان سالەم بەرۋگە قازاقتىڭ اباي اتىنداعى مەملەكەتتىك پەداگوگيكالىق ۋنيۆەرسيتەتىنىڭ دوسەنتى، تالانتتى پريماشى وتەپبەرگەن حامزين كەلدى. ونىڭ دالانىڭ جۋسانىنداي بوزارعان شاشى مەن ساقال-مۇرتى كۇنى كەشە شۇبەرەك سومكەسىن ارقالاپ، مەكتەپتەن قايتىپ كەلە جەتقانىمىزدا سوڭىمىزدان كەلە جاتاتىن ارىقشا، بيداي ءوڭدى، كوپ سويلەمەيتىن بالاعا ۇقساتپاي، ءتىپتى جات ەتىپ جىبەرگەندەي.
مەنىڭ كوز الدىما تاعى دا سۋرەتتەر كەلدى. ەندى ورالمايتىن بالا كەزدىڭ ويى مەن قىرىن ويشا جۇگىرىپ وتكەندەي بولدىم دا، جۇرەگىمدى ەلجىرەتكەن ءبىر سەزىمدەرگە بولەندىم. دۇنيەنىڭ وتكىنشىلىگى، جالعاننىڭ دا، جانداردىڭ دا جالت ەتپەلىگى، عۇمىر دەگەنىمىز جۇلدىزدىڭ اققانىنداي عانا ءسات ەكەنى كوڭىلىمدى قۇلازىتتى.
ءبىزدىڭ ماناش اۋىلىنىڭ وڭتۇستىك جاعى — ادۋىن مىنەزدى كاسپيي تەڭىزى دە، سولتۇستىگى -كەيپىن، كەلبەتىن، ءتىپتى بولمىسىن وزگەرتپەي، ءۇن-تۇنسىز جاتاتىن نارىن قۇمى. كادىمگى ماحامبەت اقىننىڭ:
مەن، مەن ەدىم، مەن ەدىم،
مەن نارىندا جۇرگەندە،
ەڭىرەپ جۇرگەن ەر ەدىم،
يساتايدىڭ بارىندا،
ەكى تارلان ءبورى ەدىم، —
دەيتىن نارىنى.
ءبىزدىڭ اۋىل وسىنداي ەكى دۇنيەنىڭ ورتاسىندا ءتۇراتىن. تەڭىز سۋى اششى، ونىڭ ۇستىنە، ءبىز وسە كەلە جاعالاۋى ءتىپتى جىراقتاپ، اۋىلىمىز وتىرعان جەر سۋسىز شولگە اينالا باستادى. ال قازساڭ، ەكى-ۇش مەتر تەرەڭدىكتەن تۇششى سۋ شىعاتىن نارىن قۇمىنىڭ شەتى اتتىلى، تۇيەلى كىسىگە تۇستىك جول دەۋگە بولادى. كوكتەمنىڭ اياعىندا، مەكتەپ بالالارىنىڭ وقۋى تاراعاسىن، اۋىل جاپاتارماعاي قىرعا كوشىپ، نارىن قۇمىن جايلايدى. ميداي جازىقتا وسكەن ءبىزدىڭ كوزىمىزگە قۇم دەگەن تاۋداي بولىپ كورىنەتىن اق شاعىلداردان تۇرادى. قۇمشەكەردەن ءسال سارعىش، سۋسىلداعان ءاپپاق قۇم. ساي-سالاسىندا مايقاڭباق، قياق، ەركەك، مورتىق، شىرماۋىق، شي وسەدى. اعاش تۇقىمىنان توبىلعى مەن جىڭعىل عانا. قىرعا كوشكەندە، ارينە، بۇكىل اۋىل ءبىر جەرگە قونبايدى. ادەتتە جايلاۋدا ەكى-ۇش ءۇي بولىپ قاتار وتىرادى.
ەل جاز بويى مالدىڭ تۇياعىنان تاپتالعان جايلاۋدى اۋىستىرىپ، بىر-ەكى جەرگە كوشىپ قونادى. ال، كۇزدە «تەڭىزگە تۇسەدى»، ياعني، قىسقى مەكەنگە كوشەدى.
ماناش دەگەن — سول تەڭىزدە، سۋى قاشقان، قاراقوڭىر توپىراقتا بوز جۋسان مەن اششى سوراڭ عانا وسەتىن جازىق جەردە شاشىراپ جاتقان ۇلكەن اۋىل. ول اۋىلدىڭ كوشەسى بولعان ەمەس. قامىس پەن سازدان شەگەندەپ سالىنعان ۇيلەر.
ماناشتاعى اقجال دەگەن توبەنىڭ ارعى بەتىندەگى ءبىر توپ ءۇيلى شاعىن اۋىلدى «اقتىكەن توپ» دەپ اتايتىنبىز. سەبەبى ول جەردە جازدا قاراقات بەرەتىن اقتىكەن دەگەن وسىمدىك كوپ بولاتىن. مەن ناعاشىلارىمنىڭ اراسىندا ءوستىم. ءبىزدىڭ ءۇي اقجالدىڭ بەرگى باۋرايىندا ەدى.
«اقتىكەن توپ» اۋىلىندا حامزا، قابدىعالي، عابباس شوقاي بالالارى دەگەن اعايىندى كىسىلەر بولدى. ولاردىڭ ۇلكەنى حامزا شوقشا ساقالدى، اقسارى ءوڭدى، قۇرىم ەتىك، قاراكول بورىك تىگەتىن، تەمىر سوقسا دا، اعاش جونسا دا، قولىنان جۇرەكتەن شىققان اۋەندەي، تەك اسەم بۇيىم شىعاتىن شەبەر، اسا سۇڭعىلا ادام ەدى. ول ۇيدەگى شەشەمىز قانزيبا بيازى مىنەزدى وتە تازا، تاماقتى ءدامدى پىسىرەتىن، جاۋلىعىن كىرشىك شالمايتىن، بالالى-شاعالى بولسا دا، شەگەن ءۇيدىڭ ءىشى تۇگىلى اينالاسىنىڭ ءوزىن جىلان جالاعانداي ەتىپ ۇستايتىن، ىلعي كۇلىمسىرەپ جۇرەتىن كىسى بولاتىن.
ول ءۇيدىڭ قالامقاس، ءتانزيلا، جۇپار، سامەن، جاڭىلسىن دەگەن قىزدارى بار ەدى. ۇلكەندەرى مەنىڭ اپا-اعالارىممەن زامانداس، بىرگە ءجۇرىپ، بىرگە وسكەن قيماس قۇربىلار ەدى. جاڭىلسىننان كەيىن اتا-انانىڭ جالبارىنعان تىلەگى قۇداي تاعالانىڭ قۇلاعىنا جەتكەندەي ۇيەلمەلى-سۇيەلمەلى الدامبەرگەن، وتەپبەرگەن دەگەن ەكى ۇل حامزەكەڭ اۋلەتىن نۇرلاندىرىپ، ەرەكشە ءسان بەرگەن. مەنىڭ انام: «قۇدايدان تىلەپ العان، حامزەكەڭنىڭ كوزىنىڭ اعى مەن قاراسىنداي ەكى ۇلى عوي»، — دەپ وتىراتىن.
الدامبەرگەن مەنەن بۇرىن وقىدى دا، ال وتەپبەرگەن مەنەن كەيىن وقىدى. ءبىز ونى وتەجان دەيتىنبىز. ەكەۋى دە دومبىرا، موندالين، سكريپكا تارتاتىن ونەرلى، «قۇدايدان سۇراپ العاندارعا» ۇقسامايتىن ۇياڭ، ءتارتىپتى جانە ساباققا ۇزدىك بالالار بولدى، اندرەيەۆ اتىنداعى مەكتەپتىڭ كوركەمونەرپازدار ۇيىرمەسىنە ۇشەۋمىز بىرگە قاتىناساتىنبىز.
جاڭىلسىن حامزينا قازاقتىڭ قىزدار پەداگوگيكالىق ينستيتۋتىنا ءبىزدىڭ اۋىلدان العاش بارعان، اسا زەيىندى، ءبىلىمدار قىز بولدى. ول اۋىلعا كانيكۋلعا كەلگەندە، مەن جاڭىلسىندى كورۋگە كوڭىلىم كەتەتىن.
ەكەۋمىز دوس بولدىق. ماعان «الماتىعا وقى» دەپ اقىل بەرەتىن. ستۋدەنتتىك ءومىر، استاناداعى قۇربى-دوستارى تۋرالى اڭگىمە ايتاتىن. مەن اۋزىمدى اشىپ، ول بەينە ءبىر قيال-عاجايىپ ەرتەگىنىڭ الەمىنەن كەلگەن ادامداي ەلەستەپ، ونى تىڭداي بەرەتىنمىن. اتا-انالارىمىز دا ءبىر-بىرىنىڭ ءقادىرىن بىلەتىن جاندار بولدى. ءبىز، الدامبەرگەن، وتەپبەرگەن، مەن — ۇشەۋمىز دومبىرا، موندالين، سكريپكا تارتىپ، وزىمىزشە انسامبل قۇرىپ، جاڭىلسىن قوسىلىپ ءان سالاتىن. كوپ سويلەمەيتىن حامزەكەڭ ءسۇيسىنىپ، كوزدەرى كۇلىمدەپ، ال قانزيبا شەشەمىز بىزگە ءدامدى تاماق ءپىسىرىپ، ول ۇيدە ىلعي ءبىر وڭاشا، تىنىش، ادەمى ساتتەردى باستان كەشىرەتىنبىز. وسى جاراستىعىمىز كەيىن الدامبەرگەن ۇيلەنىپ، جاڭىلسىن تۇرمىسقا شىققاننان كەيىن دە جالعاسا بەردى. الدامبەرگەننىڭ كەلىنشەگى جاڭىل دا جانى جۇمساق، ونەرلى، ولەڭدى تۇسىنەتىن ادام بولىپ شىقتى.
مەن، تاعدىر ايداپ الماتىعا كەتكەسىن عانا قاتىناسىمىز سيرەدى. قالامقاس اپام مەن جۇپار دا مەنى ءوز تۋعاندارىنداي كورەتىن. جۇپار اپايدىڭ قايىن ءسىڭلىسى قيلان دا مەنىڭ جاقسى كورەتىن دوسىم ەدى. وسىنداي قيماس كوڭىل، جاناشىر سەزىمنىڭ كۇمىس ءتىن ساۋلەلەرىن جىلداردىڭ شاڭ-توزاڭى كومەسكى تارتقىزعانداي بۇگىن ءبالدۋ-بالدۋ ءبارى وتىرىك سەكىلدى.
تالانتتى مۋزىكانت، قۇرمانعازى اتىنداعى كونسەرۆاتوريانىڭ وركەستر ءبولىمىن ۇزدىك بىتىرگەن وتەپبەرگەن حامزين كوپ جىلدار بويى قازاقتىڭ قۇرمانعازى اتىنداعى حالىق اسپاپتار وركەسترىندە پريمادان كونسەرتمەيستەر بولىپ وينادى.
قۇرمانعازى وركەسترى ساحناعا شىققاندا، وتەپبەرگەن تارتاتىن پريمانىڭ ءۇنى ەرەكشە ەستىلىپ، كوركەم ساز بەرىپ وتىراتىن. ونەر — جالپى ادامزات اتاۋلىنىڭ ورتاق بايلىعى، ورتاق قازىناسى. قورقىتتىڭ قوبىزى، قۇرمانعازىنىڭ دومبىراسى بىزگە قانداي قاستەرلى بولسا، پاگانينيدىڭ سكريپكاسى، موسارتتىڭ كۇيساندىعى، ۆ.اندرەيەۆتىڭ پريماسى، يسپاندىقتاردىڭ گيتارى دا ادامزات ۇرپاعى ءۇشىن سونداي كيەلى. ءبىز ىلعي سىڭار ەزۋلەپ جۇرەتىن جانە سونىمىزدىڭ تاقسىرەتىن تارتىپ كەلە جاتقان حالىقپىز. كەيدە دومبىرا مەن قوبىزدان باسقاعا مۇرنىمىزدى ءشۇيىرىپ، مەنسىنبەي قارايمىز. حالقىمىزدىڭ ونەرلى ۇرپاعى تەك دومبىرا مەن قوبىزدى ءبىلىپ قويماي، دۇنيە جۇزىندەگى ۇلتتاردىڭ قاي-قاي اسپابىن بولسا دا جەتىك مەڭگەرسە، مادەنيەتى مەن ەكونوميكاسى ءبىرىن-بىرى تولىقتىرىپ، بۇكىلادامزاتتىق مۇرانى وركەندەتىپ جاتقاندا، بۇل تەك ۇلتىمىزدىڭ العىر دا ونەگەلى ۇرپاقتارىن جەتىلدىرەر ەدى-اۋ. ول ءۇشىن ءبىزدىڭ كونسەرۆاتوريادان باستاپ، مۋزىكا فاكۋلتەتى بار جوعارى وقۋ ورىندارىمىز بەن مۋزىكالىق ۋچيليششەلەرىمىز ءورىسىن، ماماندىق شەڭبەرلەرىن كەڭەيتە تۇسسە، ابزال. وتەپبەرگەن قۇرمانعازى وركەسترىنەن كەتكەلى، ونداي پريماشىنى نەمەسە ول تارتقانداي پريمانىڭ ءۇنىن ەستىگەن ەمەسپىن.
قۇرمانعازى اتىنداعى اكادەميالىق حالىق اسپاپتار وركەسترىندە پريمادان كونسەرتمەيستر بولىپ جۇرگەن جىلدار — وتەپبەرگەننىڭ ءومىربايانىنداعى ەرەكشە ايقىن بەتتەر. ويتكەنى ونەر ادامى ءۇشىن تۆورچەستۆولىق ورتادا، ءوز بويىنداعى كيەلى ساۋلەنىڭ دۇنيەگە شاشىراي توگىلۋىنە اسەر ەتەر ورتادا ءجۇرۋ — ۇلكەن باقىت.
ماسكەۋدىڭ سەزدەر سارايىندا وركەستردىڭ سۇيەمەلدەۋىمەن ول نيكولاي بۋداشكيننىڭ «كونسەرتتىك شىعارماسىن» پريمادا جەكە تارتقاندا، تالعامپاز التى مىڭ كورەرمەن دەمىن ىشىنە تارتىپ تىڭداعان. نەمەسە، قازاقتىڭ كورنەكتى كومپوزيتورى ەركەعالي راحمادييەۆتىڭ مۋزىكا الەمىندە كۇردەلى سانالاتىن سكەرسوسىن وركەستردىڭ سۇيەمەلدەۋىمەن پريمادا جەكە ورىنداۋ ەكىنىڭ ءبىرىنىڭ قولىنان كەلىپ جۇرگەن جوق.
يتاليا مەن فرانسيا، ۆەنگريا مەن پولشا جانە باسقا وزىق مادەنيەتتى ەلدەردىڭ الەمدىك اۋەندەرگە قانىق كورەرمەندەرى قازاق دالاسىنىڭ كەيدە عالامات ەكپىندى، كەيدە جۇرەگىڭدى تومەن تارتقىزار مۇڭدى سازىن ءقۇرمانعازى اتىنداعى وركەستردىڭ قۇدىرەتتى ءۇنى ارقىلى تانىعان بولسا، وندا «مەن بارمىن» دەپ كەۋدەسىن سوقپايتىن، بيلىكتى بەلسەندىلەردىڭ بىرەۋىن اعا، ەكىنشىسىن كوكە دەپ جاقىنداۋدى ىڭعايسىز سانايتىن، كوڭىلىمەن كوك تىرەپ سەمىرمەيتىن، قاپساعاي، سۇڭعاق جىگىتتىڭ جۇرەك قۋاتى مەن ماڭداي تەرى دە بار ەدى.
ول كونسەرۆاتوريادا وقىپ جۇرگەن كەزىندە كورگەن ديريجەر فۋات مانسۇروۆ كوپتەگەن شاكىرتتەردىڭ ىشىنەن ءوز كلاسىنا تاڭداعان شاعىن تىزىمگە وتەپبەرگەن ءحامزيننىڭ ءىلىنۋى دە كەزدەيسوقتىق ەمەس ەدى.
ءبىراق كەشىكپەي فۋات ماسكەۋگە كەتىپ قالدى دا، وزگەلەردىڭ كلاسىنا بارۋعا شاكىرتتىڭ كوڭىلى سوقپادى.
كەيدە ادامنىڭ بىرەۋگە جاسايمىن دەگەن جاقسىلىعى كەرى اسەرىن تيگىزەدى. وتەپبەرگەن ومىرىندە دە وسىنداي ءبىر ءسات بولعان. وركەستر ۇجىمى يتالياعا ساپارعا بارادى. ساردينيا ارالىنىڭ قالالارىندا مۋزىكا ونەرىنىڭ تالعامپاز بىلىكتىلەرىنىڭ سىنىنان سۇرىنبەي وتكەن وركەستردى بۇل ساپارعا قازاق كونسەرۆاتورياسىنىڭ سول كەزدەگى رەكتورى عازيزا جۇبانوۆا باستاپ بارعان ەدى. ءحامزيننىڭ وركەستردىڭ سۇيەمەلدەۋىمەن كلاسسيكالىق كۇردەلى شىعارمالاردى پريمادا جەكە ورىنداعانىنا ريزا بولعان عازيزا جۇبانوۆا تالانتتى مۋزىكانتتى قويار دا قويماي كونسەرۆاتورياعا اعا وقىتۋشى بولۋعا شاقىردى. قازاق مۋزىكا ونەرىنىڭ التىن ۇياسى-كونسەرۆاتوريادا قازاق دالاسىنىڭ ءار تۇكپىرىنەن كەلگەن تالانتتى جاستاردى باۋلۋ — تۇسىنە بىلگەن كىسىگە، بيىك مۇراتتى مارتەبە.
وركەستر باسشىلارىنىڭ قارسىلىعىنا قاراماي، كونسەرۆاتورياعا كەلگەن تالانتتى مۋزىكانت ۇستازدىق قىزمەتتە دە شاكىرتتەرىنىڭ ءىلتيپاتىنا بولەنەدى.
كونسەرۆاتوريادا مۋزىكا ونەرىنىڭ ءتۇرلى پاندەرىنەن ساباق بەرەتىن مۇعالىمدەر جىل سايىن ستۋدەنتتەرگە پەداگوگتىك كونسەرت بەرىپ، ءوز شەبەرلىگىن كورسەتۋ ءتارتىبى جۇيەلى داستۇرگە اينالعان. ءومىر بويى ەكى-ۇش پەسانى قايتالاپ ويناپ بەرەتىندەر دە تابىلادى. ال، كونسەرت بەرۋگە جۇرەكتەرى داۋالامايتىندار جەكەلەگەن شىعارمالاردىڭ نوتاسىن ءوز اسپاپتارىنا ءتۇسىرىپ قۇتىلادى.
وتەپبەرگەن حامزين كونسەرۆاتوريادا ەڭبەك ەتكەن 5-6 جىلدا ءبىرىن-بىرى قايتالامايتىن جۇزدەن استام شىعارمالاردى ورىنداپ، ستۋدەنتتەر قاۋىمىنىڭ ءىلتيپاتىنا بولەنىپ ءجۇردى. جۇمىسىنا وتە جاۋاپتى، وقىتقان شاكىرتتەرى كىم بولسا سول بولىپ قالمايتىن، ءوز ماماندىعىنىڭ شەبەرى اتانعان ول كونسەرۆاتوريانىڭ ۇستازدار قاۋىمىنا «جاقپاي-اق» قويدى. «تالانتتارعا قامقور بولۋ كەرەك، تالانتى جوقتار وزدەرى-اق ءۇيتىپ-بۇيتىپ جول تاۋىپ الادى» دەگەندەي، ادام جانىن، تىرشىلىكتىڭ كۇيبەڭى مەن پەندەلىك ويلاردان تازارتاتىن اۋەن الەمى اقىرى وتەپبەرگەندى كونسەرۆاتوريا قابىرعاسىنان الاستاپ تىندى.
مەن وسى جايدى سىرتتاي ەستىپ عازيزا احمەتقىزىنا ارنايى بارعانىم دا بار.
ادامنىڭ تىم تازا، تالاناتتى بولۋى دا كەي ورتادا ءقاۋىپ توندىرەدى. سوندىقتان ولاردى قورعاپ اراشا ءتۇسۋدى، قارا باس قامى مەن جۇمساق ورىندىعىن ويلايتىن ادامدار اقىماقتىق دەپ ويلايدى. ادامنىڭ، ونىڭ ىشىندە تالانتتىڭ تاعدىرىن بىرەۋلەردىڭ پىكىرى ارقىلى شەشۋ — قىلمىس. سول قىلمىس ءالى جازاسىن تارتپاي، ءومىر ءسۇرىپ كەلەدى. كوكاۋىز قىزعانشاقتاردىڭ ارىزىنان، پىكىر تاراتۋىنان ۇرەيىمىز ۇشادى. ويتكەنى، تالانتتى ادامنىڭ شىنايى قاسيەتىن ءوزىمىز تاني المايمىز.
ءبىز ونەر مەن رۋحاني تاريحىمىزدى جاسايتىن ءار تالانتتى قادىرلەپ، ءوز ورنىندا ۇستاۋىمىز كەرەك. سوندا عانا حالىق بولىپ قالامىز. سوندا عانا ءوز ءومىربايانىمىزدى تاريح بەتىنە قاشاپ قالدىرا الامىز.
ءار تالانتتىڭ تاعدىرى — حالىقتىڭ تاعدىرى. جەر بەتىندا ازايىپ بارا جاتقان جانۋارلار مەن حايۋاناتتار قىزىل كىتاپقا تىركەلىپ، قاداعالانادى، ەرەكشە قامقورلىققا الىنادى. ايتپەسە، ولار كوپ مەرگەندەردىڭ قانجىعاسىندا كەتەر ەدى دە، تۇقىمى ماڭگىلىككە جەر بەتىنەن كوشىپ، اتتارى تاريحتىڭ كەيبىر سارعايعان بەتتەرىندە عانا قالار ەدى. ونەردەگى عانا ەمەس، ءومىردىڭ بارلىق سالاسىندا سيرەك تە بولسا كەزدەسەتىن ءاربىر تالانتتىڭ تاعدىرىنا قامقورلىق جاساپ، ونىڭ بويىنداعى تابيعات بەرگەن دارىندى حالىق مۇراسىنا اينالدىرۋعا قىزمەت ەتۋ ءۇشىن قانداي قوعام ورناتۋ كەرەك ەكەنىن مەن بىلمەيمىن. ايتەۋىر، سونداي قوعام بولۋعا ءتيىس سەكىلدى. ايتپەسە، ونسىز دا شاشىراپ جۇرگەن سانى از حالىق قۇمعا سىڭگەن تامشىداي رۋحاني تىرلىگىن ءۇزىپ، جوعالۋى مۇمكىن.
وتەپبەرگەن حامزين ونەر ساحناسىندا اياق استىنان كورىنبەي كەتكەندە، كونسەرۆاتوريادا ءوزى ءدارىس بەرگەن ستۋدەنتتەرىنەن باسقا، «قۇرمانعازى وركەسترىندە تالانتتى پريماشى بولىپ ەدى — قايدا ءجۇر ءوزى» دەپ ىزدەگەن بىرەۋ بولسايشى.
ادامىنىڭ سۇراۋى جوق قوعامنىڭ عۇمىرى دا ۇزاق بولمايدى. وزىندىك وي-تۇجىرىمى بار، پالەنشە ايتتى ەكەن دەپ پىكىرىن وزگەرتە سالمايتىن ازاماتتار كەڭەس قوعامىنىڭ جۇيەسىندە ىلعي شەتقاقپاي ءجۇرۋى زاڭدىلىققا اينالعان قۇبىلىس بولىپ كەلگەنىن ءبىرازىمىز تۇسىنەمىز.
قۇرمانعازىلار مەن اقانسەرىلەر، مايرالار مەن دينالار قاي زاماندا، قاي قوعامدا بولماسىن قازاق دەگەن از عانا حالىققا كوپتىك ەتپەيدى.
تالانتتار — حالىقتىڭ جال-قۇيرىعى.
قۇيرىق-جالىن جالعىز تالداپ جۇلىپ تاستاپ، ونىڭ ورنىنا جالتىلداعان زەر شاشاقتى قالاي، قانشا تاقسا دا، ول جارقىلداقتار مەن جالتىلداقتار حالىقتىڭ رۋحاني تىرلىگىنە سەبىن تيگىزە المايدى.
تالانت تاعدىرىنىڭ جىڭىشكە سوقپاقتارى قان تامىرلارىنداي تارامدانىپ، بىتقىلدى سايلار مەن جالاڭاش جارتاستى قۇزدارعا ۇرىندىرادى. ونەرگە دەگەن و باستاعى كىرشىكسىز مۇراتىن مەدەۋ ەتكەن جان عانا تالانتىن قامشىلاپ، قارا تەرى تامشىلاپ، شىنايى ونەردىڭ شىڭىنا ورمەلەيدى. ونىڭ دەم بەرۋشىسى دە، جەبەۋشىسى دە، سەرىگى دە — ادالدىق.
مەنىڭ جەل وتىندە عۇمىرىن وتكىزگەن شاعىن اۋىلىمنان شىعىپ، ونەر ورىنە قانات قاققان، قيىندىقتارىنان تايساقتاپ، ادالدىق سوقپاعىنان بۇرىلماعان ءىنىم، ءبىزدىڭ اۋىلدىڭ التىن قازىقتارىنىڭ ءبىرى بولعان حامزا اعامىزدىڭ قۇدايدان سۇراپ العان وتەپبەرگەنى تاعدىر جولىمەن وسىلاي كەلە جاتقانىن ماقتانىش ەتەمىن.
1992
You Might Also Like
-
ءوزىنىڭ جاستىعىنا قاراماي، ادەبيەت قازىناسىنا قوسىپ ۇلگەرگەن شىعارمالارىنىڭ سانى دا تىزىپ-تىركەيتىندەي كوپ بولماسا دا، ادەبي ورتانىڭ تولىق مۇشەسى رەتىندە قابىلداناتىن بىرەن-ساران جاس تالانتتار بولاد...
