InfoHub Logo

وقۋشىلاردى رۋحاني - ادامگەرشىلىك قۇندىلىقتارعا نەگىزدەپ تاربيەلەۋ.
زامان تالابىنا ساي ءبىلىم بەرۋ جۇيەسى ءوزىنىڭ باسىم باعدارىن جەكە تۇلعانىڭ رۋحاني ادامگەرشىلىك تۇرعىدان كەمەلدەنۋىنە نازار اۋدارا باستادى. دەمەك، تۇلعانىڭ ادامدى ادام ەتە تۇسەتىن قاسيەتىن اشىپ كورسەتۋ، ياعني رۋحانيلىعىن دامىتۋ - زامان تالابى. رۋحاني باي تۇلعانى قالىپتاستىرۋ دەپ اتالاتىن جالپى ادامزاتتىق ماسەلە، قازاقستان ءۇشىن ەرەكشە وزەكتى سيپاتقا يە بولىپ وتىر. بۇكىل الەم جۇرتشىلىعى سياقتى جاڭا مىڭجىلدىقتا ءبىلىم بەرۋ مىندەتتەرىن شەشۋگە كىرىسكەن قازاقستان ءارى زامان رۋحىنا، ءارى ءوز حالقىنىڭ دىلىنە ساي كەلەتىن ۇلتتىق ءبىلىم بەرۋ ۇلگىسىن ىزدەستىرۋدە.
ۇلتتى ۇلت رەتىندە تانىتاتىن ءۇش نارسە بار: ءبىرى قاسيەتتى جەر - انا، ەكىنشىسى - ءتىل، ءۇشىنشىسى - قازاقتىڭ ءداستۇرى، ۇلتتىق قۇندىلىقتارىن قالىپتاستىرۋ جولى.

قايىرىمدىلىق، ادالدىق،، ىزەتتىلىك، مەيىرىمدىلىك، قوناقجايلىلىق قۇندىلىقتارى قالىپتاسقان حالقىمىزدىڭ اسىل دا ابىرويلى قاسيەتتەرىن وقۋشىلار بويىنا سىڭىرە ءبىلۋ ءبىزدىڭ پارىزىمىز.
قوعام پەداگوگتىڭ كاسىبي بىلىمىمەن قاتار جەكە تۇلعالىق قاسيەتتەرىنە ەرەكشە تالاپ قويادى. ويتكەنى، پەداگوگ ءوزى وقىتىپ، تاربيەلەگەن شاكىرتتەر ءۇشىن جاۋاپكەرشىلىكتىڭ ءبىراز بولىگىن وزىنە الادى.
ەندەشە، ولاردىڭ تاعدىرىنا نەمقۇرايلى، قالاي بولسا سولاي قاراۋعا ءمۇعالىمنىڭ اۋەل باستان مورالدىق قۇقى جوق. سول سەبەپتەن دە شاكىرتتەردىڭ بويىنداعى ادامگەرشىلىكتىڭ تومەن بولۋىن پەداگوگيكالىق قاتەلىكتىڭ سالدارى دەۋىمىزگە بولادى.

ش. ا. ءاموناشۆيليدىڭ « ءمۇعالىم ءوز ساباعىن سۇيمەسە، وعان ءوزى سۇيسىنە بىلمەسە، ول شاكىرت بويىنا دا سۇيىسپەنشىلىكتى دامىتا المايدى..» دەگەن پىكىرىنەن جەكە تۇلعانىڭ رۋحاني ادامگەرشىلىگىن دامىتا وقىتۋدا ۇستازعا قويىلاتىن تالاپتىڭ ماڭىزدىلىعىن بايقاۋعا بولادى.

№2 كەشكى مەكتەپ پەنيتەنسيارلىق جۇيە بولعاندىقتان، مۇنداعى وقۋشىلاردىڭ جاعدايى، ورتاسى مۇلدەم باسقاشا. ءارتۇرلى جاعدايعا، تاعدىر تالقىسىنا بايلانىستى قوعامنان وقشاۋلانىپ وتىرعانداردىڭ مورالدىق، مىنەز - قۇلىقتارىنىڭ ەرەكشەلىكتەرىن ەسكەرە وتىرىپ، تاربيە جۇمىستارى جۇرگىزىلەدى. بۇلار ءۇشىن رۋحاني - ادامگەرشىلىك ۇعىمىنىڭ ءمانى، ماعىناسى ايرىقشا بولۋ كەرەك، سول باعىتتا ۇجىم بولىپ جۇمىستار جۇرگىزۋ قاجەتتىگى تۋىندايدى. رۋحاني - ادامگەرشىلىك - ول قوعامدىق تالاپقا ساي ىزگىلىكتى، يناباتتىلىقتى، بىلدىرەتىن مورالدىق ۇعىم. ال، ادامگەرشىلىك تاربيەسى - ىزگىلىككە، يناباتتىلىققا باۋلۋدىڭ جولى بولىپ تابىلادى. وسى دەڭگەيگە جەتۋ ءۇشىن وقۋشى ءوزى ناقتى ادامگەرشىلىك قاتىناستار مەن مىنەز - قۇلىقتارىن ەنگىزۋى قاجەت.

تەمىر توردىڭ ار جاعىندا وتىرعان ءاربىر ادامنىڭ تاعدىرىنا تۇسىنىستىكپەن قاراپ، مۇمكىندىگىنشە پسيحولوگيالىق - مورالدىق قولداۋ كورسەتىپ، باعىت - باعدار بەرۋ ءبىزدىڭ پارىزىمىز. ولاردىڭ بويىندا ومىرگە، بولاشاققا دەگەن سەنىمدىلىكتى ۇيالاتۋ، سول ارقىلى ادامگەرشىلىكتى، كىسىلىك پەن كىشىلىكتى تۇسىندىرە وتىرىپ، تاربيەلەۋ مەكتەپ ۇجىمىنىڭ باستى مىندەتى بولىپ تابىلادى.

وقۋشىلاردى اينالاداعىلاردى كورە بىلۋگە ۇيرەتۋ ءبىزدىڭ ماقساتىمىز. ولارعا «الدەكىم سەندەرگە جامان ءسوز ايتسا، سەندەردى ىزالاندىرعىسى كەلسە نەمەسە جابىرلەگىسى كەلسە، وندا بۇل ادامنىڭ سەندەردىڭ سەزىمدەرىڭدى، باقىلاي بىلۋشىلىكتەرىڭدى تەكسەرگەنى. ونىڭ كومەگىنسىز ءبىزدىڭ جەكە باسىمىزدىڭ السىزدىگىن جەڭە بىلەتىن قاجەتتى تاجىريبە بولماعان بولار ەدى. ولاي بولسا، ول سەنىڭ كومەكشىڭ، ول ساعان ءوزىڭدى تاربيەلەۋگە كومەكتەسەدى» - دەپ ءتۇسىندىرۋ قاجەت. مۇنداي تولعانىستار ءبىز تاڭداعان ادامگەرشىلىك قۇندىلىقتار مەن قاعيدالاردى انىقتاپ، ادامگەرشىلىككە لايىقتى شەشىم قابىلداۋدى قاجەتسىنەدى. ومىردە ادامگەرشىلىك قۇندىلىقتاردى تاڭداۋىمىز ءارقايسىسىمىز ءۇشىن ماڭىزدى. ودان ادامنىڭ مىنەز - قۇلقى، تۇلعالىق قاسيەتى داميدى. رۋحاني تانىم مادەنيەتىنىڭ قالىپتاسۋى، وقۋشىلاردىڭ ومىردەگى ءوز ورنىنا سىن كوزبەن قاراۋعا ۇيرەتەدى. وسى ماقساتتا مەكەمە قىزمەتكەرلەرىمەن بىرلەسىپ، ۇيلەسىمدى جۇمىستار جۇرگىزۋ باستى مىندەتتەرىمىز بولىپ تابىلادى.