قاسقىر ەكەن دەسەم...
بايجان — ورتا شارۋا، جاسىنىڭ ۇلكەندىگىمەن بىرگە ءوز اۋىلىنا، كورشىلەس اۋىلدارعا دا يناباتتى ادام.
بىردە ول، كۇندەگى ادەتىنشە، ەرتە تۇرىپ نامازىن وقىدى دا، مال جايعاستىرۋعا شىقتى. كەنەت، ونىڭ قىراعى كوزى قورادان شىعىپ بارا جاتقان قاسقىردى كوردى. دەرەۋ كوك ايعىرعا ىرعىپ ءمىنىپ، قولىنا سويىلشاسىن الدى دا، كوكجالدى قۋا جونەلدى. تاڭ سارىدە ونى سوعىپ الىپ، كەزدەيسوق ولجاعا باتا قالماق. كوكجال پارمەنىمەن قارىشتاي جۇگىرىپ قاشسا دا، كوك ايعىر ونىڭ ادىمىن اشىرمادى. اۋىل سىرتىنداعى قىرقادان قايىرا قۋىپ، قوراعا اكەلىپ تىقتى. ابدەن شارشاپ سىلەسى قاتقان كوكجال «ەندى نە ىستەسەڭ دە، ەركىڭ» دەگەندەي قارسى قاراپ، ءتىلىن سالاقتاتىپ، جۇرەسىنەن جاتا قالدى. كوك ايعىردىڭ اق كوبىگىن اعىزىپ، بايجەكەڭ دە كەلىپ جەتتى.
بۇل كەزدە ۇيدەگى ادامدار دا تۇرىپ، مال جايعاستىرا باستاعان ەدى. وزدەرىنىڭ اسىراندى ءيتى كوك توبەت ءتىلى سالاقتاپ، ەكى ەزۋىنەن سىلەمەيى شۇبىرىپ جاتىر، ايانىشتى تۇردە اركىمگە جاۋتاڭداپ قارايدى. كوك ايعىر دا تەرگە مالشىنعان، بۋى بۇرقىراپ تۇر.
— اي، اتا، مۇنىڭىز قالاي، مىناۋ ءوزىمىزدىڭ كوك توبەت ەمەس پە؟! — دەستى قاقپا الدىندا تۇرعاندار.
بايجەكەڭ اتىنان ىرعىپ تۇسە قالدى. قاسقىرعا جەتەر-جەتپەس بولىپ، ۇمتىلا شاۋىپ جۇرگەن كەزدە استىنداعى توقىمنىڭ ءتۇسىپ قالعانىن دا سەزبەپتى، شالبارى مەن كۇپىسىنىڭ ەتەگى تەرگە مالشىنىپتى.
— قاسقىر ەكەن دەسەم، ءوزىمىزدىڭ كوك توبەت ەكەن عوي، — دەپ قىنجىلا سويلەپ، ۇيگە كىردى «اڭشى» وتاعاسى.
You Might Also Like
-
تاشپەمبەت — ەسى دە، اقىلى دا ءبۇتىن، ءبىراق قالاي بولسا سولاي سويلەي سالاتىن اڭقاۋ، پارىقسىز ادام. ونىڭ ءسوزىن ول ماڭداعى ەلدىڭ ۇلكەنى دە، كىشىسى دە كەك تۇتپايدى، قانداي ءسوز سويلەسە دە، ونى قىزى...
-
ماحانبەتتىڭ ورتانشى ۇلى جانايداردىڭ ەسى ەدى، اقىلى دا ءبۇتىن، ءبىراق وتە اڭقاۋ بولاتىن. ءبىر ۇيدە ءبىرسىپىرا ادام قوناق بولدى. سىپايى قوناقتارعا لايىقتى تاعام قويىلدى. قولدىڭ مايىن جەڭىلدەتسىن دەپ اس ا...
