InfoHub Logo

«Universitas21» حالىقارالىق ۋنيۆەرسيتەتتەر جۇيەسى وتكەن جىلعى زەرتتەۋلەردىڭ قورىتىندىسىن شىعاردى. ول قاي ەلدە ءبىلىمدى جاقسى بەرەدى جانە اقىلدى جاستار قاي ەلدە كوبىرەك تۇراتىندىعىن انىقتاۋعا ارنالدى.

امەريكالىق عالىمدار مەن ETS بەيرەسمي ۇيىمى ءبىلىم دەڭگەيى بويىنشا امەريكالىق جاستاردىڭ الدىنا جان سالمايتىندىعىنا قاراماستان قازىرگە جاس ۇرپاقتىڭ ءبىلىمى تايازدىعىن مويىنداپ وتىر. اسىرەسە ولار ماتەماتيكادان ناشار جانە ونى ءوز ومىرىندە قولدانا المايدى.

زەرتتەۋ كورسەتكەندەي، جەر بەتىندە ەڭ پايداسى جوق جاستاردىڭ دەنى امەريكادا وتكەن عاسىردىڭ 80ء-شى جىلدارى دۇنيەگە كەلىپتى. الەمنىڭ 22 ەلىندە، ونىڭ ىشىندە سولتۇستىك امەريكادان ازياعا دەيىنگى ەلدەر قامتىلعان اۋماقتا جۇرگىزىلگەن تالداۋ وسىنى كورسەتكەن. ال، ماتەماتيكانى ومىردە قولدانۋ جاعىنان اقش ارتتا قالىپ قويىپتى. يتاليا مەن يسپانيا دا سوڭعى كورسەتكىشتەردى يەمدەنگەن.

اقش ءبىلىم مينيسترلىگىنىڭ دەرەكتەرىنە قاراعاندا ەلدىڭ ەرەسەك 32 ميلليون تۇرعىنى ساناۋدى مۇلدە بىلمەيتىن كورىنەدى. بۇل ەل حالقىنىڭ 14 پايىزى. وسىلايشا ءاربىر امەريكالىق ادەبي شىعارمالاردى 5 سىنىپ وقۋشىلارىنىڭ دەڭگەيىندە وقيتىن بولىپ شىققان. سوعان قاراماستان الەمنىڭ ونداعان ۇزدىك ۋنيۆەرسيتەتتەرى اقش-تا ورنالاسقانى قىزىق. پرينستون، گارۆارد، ماسساچۋسەتس سەكىلدى ءبىلىم وردالارى ەليتاعا ارنالعان. مىسالى گارۆاردتا وقۋ ءۇشىن جىلىنا 60 مىڭ دوللار قاجەت. بۇل باسقا دا قاجەتتىلىككە جۇمسالاتىن 20 مىڭ دوللاردى قوسپاعاندا. سوندىقتان دا بولار نەسيە الىپ وقيتىندار ءجيى كەزدەسەدى.

ال، ەڭ اقىلدى جاستار جاپونيادا تۇرادى. بۇل ەلدە وقۋ اقىلى، تالاپ باسقا. ءبىلىم الۋ قىمبات بولعانىمەن (ايىنا 7-8 مىڭ دوللار)، سوعان ساي وقيتىن جاستاردىڭ تالابىنا ETS ماماندارى دا تاڭعالعان. جاپوندارمەن جارىسقان فينليانديالىقتار وزگەلەرگە قاراعاندا جاستارعا جاقسىلىق جاساۋدان ايانباي كەلەدى. ويتكەنى - وقۋ تەگىن.

شۆەيساريا مەن دانيادا دا ءبىلىم بەرۋ جاقسى دامىعان. ال قازاقستانداعى ءبىلىم بەرۋدىڭ قانداي دەڭگەيدە ەكەندىگىن وزدەرىڭىز باعالاڭىزدار.