InfoHub Logo

قايناعان سۋداعى باقا سيندرومى. ءبىزدىڭ كۇشىمىزدى سارقىلتاتىن نە نارسە؟

وليۆە كلەركتىڭ قايناعان سۋداعى باقا تۋرالى مىسالى كوپشىلىككە ءمالىم شىعار.

بۇل شىنايى تاجىريبەمەن راستالعان ءومىر شىندىعى. ەگەر سۋدى مينۋتىنا 0،02 گرادۋسقا كوتەرە وتىرىپ، بىرتىندەپ قىزدىرا باستاساق، وندا سۋدا وتىرعان باقا ومىرىنە ءقاۋىپ تونگەنىن سوڭعى مينۋتتا عانا سەزەدى ەكەن. ءبىراق بۇل كەزدە سۋدان سەكىرىپ كەتۋگە كۇش-قۋاتى قالماي، السىرەپ قالادى. ال ەگەر سۋدى بۇدان تەزىرەك قىزدىرسا، وندا ول ءقاۋىپتى بىردەن سەزىپ، سۋدان سەكىرىپ كەتەر ەدى. 

قايناعان سۋداعى باقا سيندرومى

ادامنىڭ باسىنان دا قاتەلىكتى تاقالعان كەزدە عانا سەزەتىن جاعداي بولىپ تۇرادى. قايناق سۋداعى باقا سيندرومى – بۇل ادام ءومىر قيىندىقتارىمەن بەتپە-بەت كەلە وتىرىپ، ءبىراق ولاردان قۇتىلۋ ءۇشىن ەشقانداي ارەكەت جاساماي، بىرتىندەپ ەموسيونالدى كۇيدە ءوزىن-وزى جەگىدەي دەپ قۇرتۋ ءۇردىسى. ول تەك ءبارىنىڭ سوڭى نەمەن اياقتالاتىنىن كۇتىپ وتىرا بەرەدى. وسىلايشا، ءوز ءومىرىن ۋلاعان ۋلى ورتادا جىلدار بويى ارەكەتسىز قاراپ وتىرادى.

ازداعان وزگەرىستەرگە قارسىلىق كورسەتۋ كەرەك دەپ ويلامايمىز.  سوندىقتان، «قايناعان سۋدان قارعىپ شىعۋعا» ارەكەتتەنبەيمىز.

ناتيجەسىندە، ادام «جانىپ كەتەدى». جامان ورتاعا تۇسكەن ادام سول ورتانىڭ جامان ادەتتەرىنە ەتى ۇيرەنىپ كەتەدى دە، مورالدىق جانە سانالىق جۇتاڭدىققا ۇشىراپ، قارسىلاسۋعا قاۋقارسىز قالادى.

قايناعان سۋداعى باقا بىردەن سەكىرىپ كەتە الاتىن ەدى. ءبىراق، ولاي ىستەمەدى.

ەگەر، سۋ اۋەل باستا ىستىق بولعاندا، ەڭ بولماسا 50 گرادۋسقا دەيىن كوتەرىلگەندە، باقا ءومىرىن ساقتاپ قالۋ ءۇشىن سۋدان سەكىرىپ كەتەر ەدى. الايدا، سۋ جىلىمشى عانا بولىپ، ومىرىنە ءقاۋىپ توندىرمەگەندىكتەن، ول ىدىستان سەكىرىپ كەتۋدى ويلاعان دا جوق. ايتارلىقتاي جايسىزدىقتى سەزىنبەگەندىكتەن، ول ءوز دەنەسىنىڭ تەمپەراتۋراسىن وزگەرتە وتىرىپ، جىلى ورتاعا بەيىمدەلە بەرەدى. ءبىراق، ومىرىنە ءقاۋىپ توندىرەتىن ءسات جاقىنداعان كەزدە، باقا سۋدان سەكىرىپ كەتە المايدى. ويتكەنى،ونىڭ كۇشىنىڭ ءبارى سارقىلعان ەدى. ول قۇتقارىلۋعا ەش ارەكەت جاساماستان قايناق سۋدا تىرىدەي ءپىسىپ كەتەدى.

قايناعان سۋداعى باقا سيندرومى باسىمىزعا شىن ءقاۋىپ تونگەنگە دەيىن بارلىق قيىندىققا شىداپ جۇرە بەرۋگە يتەرمەلەيدى. كۇتپەگەن جەردەن قيىندىقتار مەن ساتسىزدىكتەرگە تاپ كەلگەن كەزدە، ءبىزدىڭ تۇيسىگىمىزدەگى ءوزىمىزدى قورعاۋ ارەكەتتەرى ىسكە قوسىلىپ، ءبىز جاعدايدى تۇزەتۋدىڭ بارلىق جولدارىن قاراستىرا باستايمىز. ومىردەگى كەيبىر نارسەلەردىڭ جيناقتالۋ اسەرى بار – ياعني، ءبىز ءوزىمىزدى اقىرىنداپ ۋلاپ جاتقانىن اڭعارماستان ۋىتتى اۋامەن تىنىس الىپ جۇرە بەرەمىز. 

قايناق سۋداعى باقا – بۇل وڭ وزگەرىستەرگە ناقتى سەبەپتەر جوق بولسا دا، ءۇمىتىن ۇزبەگەن ادامنىڭ جاعدايى.

ءسىز ءالى دە جۇمىسىڭىزداعى باستىققا، دوسىڭىزعا نەمەسە ارىپتەسىڭىزگە كەرەكپىن دەپ ويلايسىز. وسى ويدىڭ ءوزى قىراعىلىق سەزىمىن تۇنشىقتىرىپ، ءبىز ومىردەن شىن مانىندە نەنى قالايتىنىمىزدى تۇسىنبەي قالامىز.

وليۆە كلەركتىڭ قايناعان سۋداعى باقا تۋرالى مىسالى – ءوز تاڭداۋىمىز تۋرالى وقيعا

باسقا ادامدار تاراپىنان بولعان مازاقتارعا، سىناۋلارعا، رەنىشتەرگە جىلدار وتكەن سايىن ادامنىڭ بويى ۇيرەنىپ كەتەدى. سوقىر بەيىمدەلۋ بۇل نارسەلەردىڭ ءبارىن ءومىرىمىزدى قۇرتىپ جاتسا دا، «قالىپتى» دەپ قابىلداپ، كوندىگىپ جۇرە بەرەدى. ال ەندى، باقانى ەسىڭىزگە ءتۇسىرىڭىزشى: ول جاعدايعا بەيىمدەلۋگە تىرىسىپ كوردى. ءبىراق، ول بۇعان كومەكتەسپەدى.

ادام بارىنە كونىپ جۇرە بەرسە، قىراعىلىعى باسىلا بەرەدى. ناتيجەسىندە، جىلدار وتە كەلە، ول ءوزىنىڭ ومىردەن نەنى قالايتىنىن تۇسىنبەيتىن دارەجەگە جەتەدى.

ەگەر ءسىز وسى مىسالدىڭ ءوز ومىرىڭىزگە دە قاتىسى بار ەكەنىن تۇسىنسەڭىز، وندا ءوزىڭىزدىڭ نەگە ۇمتىلىپ جۇرگەنىڭىزدى، نەنى قالايتىنىڭىزدى جانە ءسىز ءۇشىن نەنىڭ ماڭىزدى ەكەنىن تۇسىنۋگە تىرىسىپ كورىڭىز. اشىق بولىڭىز، ءوزىڭىز ءۇشىن ءمانى بار نارسەلەر تۋرالى ۇمىتپاڭىز. تەك سولاي عانا ءسىز ءوزىڭىزدى السىرەتىپ جۇرگەن جاعدايلاردى انىقتاي الاسىز. جانە ونى تۇزەتەتىن مۇمكىندىككە دە قول جەتكىزەسىز.

اينالاڭىزداعى ادامدار ءسىزدىڭ اياق استىنان ەركىندىككە ۇمتىلعانىڭىزدى، قيىندىق شىنجىرىن ءۇزىپ، ەركىن ادام بولۋعا دەگەن تالپىنىسىڭىزدى بىردەن تۇسىنبەۋى مۇمكىن. ءبىراق، شەكارادان اسپاي، ءوز دەگەنىڭىزدە تابان تىرەپ تۇرۋىڭىز «قايناق سۋدا ءپىسىپ كەتپەۋگە» مۇمكىندىك بەرەدى. 

ەگەر تولىققاندى ءومىر سۇرگىڭىز كەلسە، وندا كەيبىر كەزدەردە «جەتەر!» جانە «جوق!» دەگەن سوزدەردى دە ايتا الۋ كەرەك. ادام تەك قيىندىق كورىپ، سىنالعان كەزدە عانا شىڭدالادى.

---