InfoHub Logo

ۇل تاربيەلەي وتىرىپ، حالىقتى تاربيەلەيمىز،

قىز تاربيەلەي وتىرىپ، ۇلتتى تاربيەلەيمىز

م.اۋەزوۆ

ءبىزدىڭ قازەكەڭدەر قىز بالاسىن قوناق رەتىندە سىيلاپ، تورىنە شىىعارىپ، بەتىنە كەلمەي،نازىك گۇل ەكەندىگىن سەزىندىرە بىلگەن.تال بەسىگىنەن جات جۇرتتىق ەكەندىگىن ءتۇسىندىرىپ، بويىنا اسىل تەكتى قاسيەتتەردى «قىزىم ساعان ايتام، كەلىنىم سەن تىڭدا» قاعيداسىنا سالىپ تاربيەلەپ وتىرعان. تەك دىلىمىزدە عانا ەمەس، دىنىمىزدە قىز بالاسىنىڭ نالاسى مەن ريزىق- نەسىبەسىنىڭ مول بولاتىندىعى، جاقسى قىز اكەسى مەن اعاسىن بىردەي جۇماققا كىرگىزەتىندەگى، ريزا كەيپى سول ءۇيدىڭ بايلىعى مەن بەرەكەسىن ۇيىتاتىنى حاق دۇنيە.

ەڭ الدىمەن «قىز بالاسى» دەگەن ۇعىمعا توقتالىپ وتكەنىم دۇرىس شىعار. مەن ءۇشىن قىز- بولاشاق انا، اياۋلى جار، ۇلگىلى كەلىن. قىز بالانىڭ تاربيەسى تەك ءوزىنىڭ عانا بولمىسىن كورسەتپەيدى. ءدۇيىم جۇرتتىڭ، ءبىر قاۋىم ەلدىڭ، قىرىق ءۇي قارايلاسقان ايالى الاقان مەن ۇلگىلى ونەگىنىڭ بەينەسى. بويعا سىڭگەن قاسيەت ارقىلى سىيى ارتىپ، سىباعاسىن الادى. ءبىر قىزدى تاربيەلەۋ- ءبىر ۇلتتى تاربيەلەۋ. قازاقتا «ايەل -انا»، «ايەل- جار» دەگەن كەرەمەت تىركەستەر قالىپتاسقان. راسىندا، ايەل مەن انا، قىز بەن كەلىن ت.ب اتاۋلاردىڭ قانداي ايىرماشىلىعى بار؟

قىز بالاسى - قىمبات. قازىنا ىسپەتتەس. ءىنجۋدى قورعايتىن سىرتقى قابى سياقتى، بوتەن كوزدەن جاۋھارىمىزبەن گاۋھارىمىزدى الىسىراق ۇستايتىن قورعانىشى بولعانى ابزال. ال، انا بولۋ- ورتاق. انا دەگەن ءمۇعالىم، ۇستاز، ۇيرەتۋشى ءھام مەيىر توگۋشى، تاربيەلەۋشى. انانىڭ تاربيەسى مەن مەيىرىمى بارىنە ورتاق بولۋى ءتيىس. ءوز بالاسىنا دەگەن جۇرەگىنەن جارىپ شىققان سەزىمىنىڭ ءدامىن بارشا ادام بالاسى سەزىنۋى استە دۇرىسىراق. قىز دەگەن اقىلدى، ءبىلىمدى، تاربيەلى، تاكاپپار. وزىنە ءتان تاكاپپارلىعى بار، كورىنگەنگە كوزى تۇسپەيتىن، ەتەگىنە ىلمەيتىن بولۋى شارت. ءبىلىمى تەرەڭ، اقىلى تەلەگەيدەي، تاربيەسى تولىمدى. بويىنا تولعان تاربيەنى اينالاسىنا بەرۋگە دايار بولعانى ابزال. ەكى- ءۇش بالانىڭ ماماسى ەمەس، ءدۇيىم جۇرتتىڭ اناسى بولۋ ءار قىزعا ارنالعان مىندەت. ءبىر قازان ءسۇتتى ۇيىتاتىن ءبىر قاسىق ايران سياقتى، ۇلكەن ءبىر اۋلەتتىڭ داۋلەتى مەن ساۋلەتىن قوسا تۇزەپ، نەسىبەسىن كوبەيتىپ، تامىرىن تەرەڭگە جايعىزىپ، ايرانداي ۇيىتاتىن قىز بالاسى. ەل بولۋ ءۇشىن بەسىكتى تۇزەيتىن، ءبىر قولىمەن الەمدى، ءبىر قولىمەن باۋىرىنداعى بالاسىن تەربەتەتىن-ايەل ادامى. نازىك جاندار. نازىك گۇلدەر.

قورىتا كەلگەندە، قىز دەگەن ارمان بولۋى ءتيىس، قولجەتىمدى زات ەمەس. ايەل دەگەن تومەن بولۋى ءتيىس، زاڭعار تاۋداي بيىك ەمەس. انا دەگەن مەيىرىمدى بولۋى ءتيىس، ايازدا قاتقان مۇزداي ەمەس. قىز دەگەن اقىلدى بولۋى ءتيىس، كورسەقىزار ساۋىسقانداي ەمەس. ايەل دەگەن ادال بولۋى ءتيىس، كورىنگەننىڭ جەتەگىندە كەتەر ۇرعاشى يتتەي ەمەس. انا دەگەن ەلدىكى بولۋى ءتيىس، ءوز تۇقىمىن عانا باساتىن تاۋىقتاي ەمەس.

---