قونىس تويعا تىلەك، باتا، قۇتتىقتاۋلار
كوپتەن كۇتكەن ۇمىتتەرىڭ اقتالىپ، جاڭا ۇيگە قول جەتكىزىپسىڭدەر، قۇتتى بولسىن! قۋانىشتارىڭا ورتاقتاسۋ ءۇشىن جينالىپ وتىرعان مىنا قاۋىمنىڭ سەندەرگە ايتار تىلەگى مول. جاڭا ۇيلەرىڭنىڭ ىرگەتاسى مىقتى، كەرەگەسى كەڭ، شاڭىراعى بيىك بولسىن! ىشىندە تەك قانا تاتۋلىق پەن بەرەكە، قۋانىش پەن باقىت، قۇت پەن ىرىس سالتانات قۇرسىن! ءوز باستارىڭا باق-بەرەكە دارىپ، بالا-شاعالارىڭ وسىپ-ونە بەرسىن، قىزىعىن كورىڭدەر! شاڭىراقتارىڭدا قۋانىشتى تويلايتىن جيىن كوپ بولسىن! قايعى-مۇڭدارىڭ جوق بولسىن!
*** *** *** ***
ءبىر دانىشپان «كەرەمەت ءۇي بولمايدى، ءۇيدى كەرەمەت ەتەتىن — سول ءۇيدىڭ ايەلى. ال ءۇيدىڭ شاتىرى — ەركەك. ويتكەنى ول سول باسپانانى ىستىقتان، سۋىقتان، جاڭبىردان، قاردان، سەلدەن قورعاپ تۇرادى» دەگەن ەكەن.
قۇرمەتتى ءۇي يەلەرى، مىناۋ جاڭا قونىستارىڭ — باسپانالارىڭ قۇتتى بولسىن!
ءبىرىڭ — قورعانى، ءبىرىڭ — جىلۋى بولىپ، قوناق ۇزىلمەيتىن قۇتتى شاڭىراققا اينالىپ، اق داستارحاندارىڭ تەك قانا تويعا جايىلا بەرسىن! قونىس تويلارىڭ قۇتتى بولسىن!
*** *** *** ***
«وتان — وتباسىنان، وتباسى — وشاق قاسىنان باستالادى» دەگەن ەكەن بابالارىمىز. ال سول وشاقتىڭ يەسى - ايەل، ال وتباسىنىڭ يەسى — سول ءۇيدىڭ ەرى. «ەركەك — شاڭىراقتىڭ يەسى ءارى اسىراۋشىسى» - دەپ بەكەر ايتپاعان عوي.
بۇگىن مىنە، جاڭا ۇيگە قونىس اۋدارىپ، «قونىس تويىن» جاساپ جاتىرسىڭدار. ولاي بولسا ءۇي يەلەرىنە تىلەرىم: وزدەرىڭ تابالدىرىعىن جاڭا اتتاعان جاڭا ۇيلەرىڭ بەرەكەلى، ىرىس مول، قىدىر قونعان ۇلكەن ۇيگە اينالسىن. شاڭىراقتارىڭدا تەك قانا توي بولسىن دەگىم كەلەدى.
قونىس تويعا باتا تىلەك
بەرەتىن اسىڭ بولسىن،
كورەتىن جاسىڭ بولسىن،
باسىڭنان جاقسىلىق كەتپەسىن،
جاماندىق ساعان جەتپەسى
قايىرلى بولسىن ءۇيىڭ،
جاقسى بولسىن كۇيىڭ،
الدارىڭنان شىقسىن ءاردايىم،
كورسەتكەن جۇرتقا سىيىڭ.
توي-دۋمان قۇتتى بولسىن؛
باقىتى مول وتاۋ بولسىن،
ءىشى جانعا تولسىن،
سىرتى مالعا تولسىن.
وزدەرىڭە ۇزاق عۇمىر بەرسىن،
ماڭگى كەتپەس ريزىق بەرسىن،
الدارىڭنان كۇن شىقسىن،
ارتتارىڭنان اي تۋسىن!
*** *** *** ***
ءامين، دەپ قول جايىپ،
باتا بەرەم تولعانىپ.
باسپاناڭدى ءبىتىردىڭ،
ەڭبەگىڭ جانىپ وڭدالىپ.
جيھاز تولسىن ىشىنە،
دوس ءسۇيسىنسىن ىسىڭە.
مەرەيلەنىپ ۇيىقتاڭدار،
جۇماق كىرىپ تۇسىڭە.
بيىك بولسىن توبەسى،
بۋداقتاسىن وڭەشى،
مىقتى ۇستاسىن اعاشى،
ءاربىر قاققان شەگەسى.
باقىت قۇسى ۇيىرىلگەن،
توي كەتپەسىن ۇيىڭنەن.
اسقاقتاي بەر قاشاندا،
وسى جاقسى كۇيىڭمەن.
قوناق كەتپەي ۇيىڭنەن،
مەرەيىڭ تاسىپ ورلەگىن.
وتباسىلارىڭ امان بوپ،
قيىنشىلىق كورمەگىن.
ءامين، اللاھۋ اكبار!
*** *** *** ***
ءورىسىڭ كەڭىپ ءۇي بولدىڭ،
يە بوپ جاڭا پاتەرگە.
قۇلپىرىپ تۇر عوي كوڭىلىڭ،
جۋىلعانداي اق نوسەرگە.
شاتتانا ۇستاپ كىلتىڭدى،
شالقايدىڭ، دوسىم، شات كۇلىپ.
ۇمىت بوپ كۇندەر بىلتىرعى،
جۇلدىز بوپ جاندى ءتاتتى ءۇمىت.
كوڭىلىڭە كۇي كۇمبىرى،
جارىڭ دا جايراڭ قاعادى.
تۇزەلەر ەندى تىرلىگىڭ،
قۋانتتىڭ بالا-شاعانى.
باسپانا بولماي كۇيدە جوق،
قاجىتار كىسى ەسىگى.
دوس-جاران تۇرسىن ۇيگە كەپ،
تەربەتىپ شاتتىق بەسىگىن.
كوڭىلىن تاپقىن كورشىنىڭ،
تۋىستاي بولار جۇپتاسساڭ.
قاناتتى قاققىن سەرپىلىپ،
ەركىڭ بار ەندى باسساڭ.
وركەندەي بەرسىن ورەنىڭ،
ەستىلىپ «ىڭگا» - اسەم ءۇن.
كەڭىسىن كەرەگەلەرىڭ،
قۇت اكەپ جاڭا پاتەرىڭ!
*** *** *** ***
اقىلدى ادام بايىسا،
راحاتىن كورىپ ەڭبەكتىڭ،
ءومىرىن كوركەم گۇل ەتەر –
دۇنيە-بايلىقتى قۇل ەتەر!
اقىماق-قاراۋ بايىسا،
تۋىسىن تەۋىپ كەۋدەدەن،
كوڭىلىن قارا قۇل ەتەر –
دۇنيەسى ونى قۇل ەتەر!
You Might Also Like
-
يادرولىق جاندىرعىش — يادرولىق ەنەرگيانىڭ بوساۋىمەن جۇرەتىن ءبولىنۋ نەمەسە سينتەز رەاكسيالارىنا يادرولارى قاتىساتىن زاتتار. يادرولىق زاريادتارداعى يادرولىق جاندىرعىش — ۋران-235ء-تىڭ جانە پ...
