InfoHub Logo

بۇگىن قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا نازاربايەۆ ۋنيۆەرسيتەتىندە وتكەن «زياتكەر قازاقستان» اتتى دوڭگەلەك ۇستەل جۇمىسىنا قاتىستى.

دوڭگەلەك ۇستەل جۇمىسىنا مەملەكەتتىك ورگانداردىڭ وكىلدەرى، قازاقستاندىق جانە شەتەلدىك تانىمال عالىمدار، جوعارى وقۋ ورىندارى مەن عىلىمي ۇيىمداردىڭ باسشىلارى، عىلىم سالاسىنداعى قازاقستاندىق ساراپشىلار قاتىستى.

مەملەكەتتىك حاتشى ءوز سوزىندە قازاقستان رەسپۋبليكاسىنىڭ پرەزيدەنتى ن.ءا.نازاربايەۆتىڭ وتاندىق عىلىمنىڭ الەۋەتىن وسىرۋگە ايرىقشا ءمان بەرەتىندىگىن اتاپ ءوتتى. «قازاقستان-2050» ستراتەگياسىندا بەلگىلەنگەن مىندەتتەر ەكونوميكانىڭ عىلىمدى قاجەت ەتەتىن سالالارىن قۇرۋمەن بايلانىستى. جاڭا تەحنولوگيالىق دەڭگەيگە شىعۋ ءۇشىن ەكونوميكانىڭ ءاربىر سالاسى يننوۆاسيالىق قادامداردى قاجەت ەتەدى.

         گ. ءابدىقالىقوۆا مەملەكەت باسشىسىنىڭ «ءبىلىمنىڭ ءۇش بۇرىشى» - ءبىلىم، زەرتتەۋ جانە يننوۆاسيا ەكونوميكانىڭ عىلىمدى قاجەت ەتەتىن سالالارىن دامىتۋدا نەگىزگى ءرول اتقاراتىنىن ۇدايى توقتالاتىنىن اتاپ ءوتتى. مەملەكەتتىك حاتشى بۇكىل الەمدە جاھاندىق باسەكەلەستىكتى قۇرايتىن جوعارى بىلىكتى ماماندارعا جانە عىلىمي زەرتتەۋلەردىڭ ناتيجەلەرىنە، جاڭا تەحنولوگيالارعا دەگەن سۇرانىستىڭ بار ەكەنىنە باسا نازار اۋداردى.

مەملەكەتتىك حاتشى 2010 جىلدان باستاپ قازاقستاننىڭ جاھاندىق باسەكەگە قابىلەتتىلىك  يندەكسى بويىنشا ءوز پوزيسياسىن جاقسارتقانىن ايتتى. ايتالىق، 2015 جىلى «يننوۆاسيالىق الەۋەت» كورسەتكىشى بويىنشا 31 پوزيسياعا (140 ەلدىڭ ىشىندە 112 ورىننان 81 ورىنعا)، عىلىمي-زەرتتەۋ ۇيىمدارىنىڭ ساپاسى بويىنشا يننوۆاسيادا 29 پوزيسياعا (140 ەلدىڭ ىشىندە 101 ورىننان 72 ورىنعا)، عالىمدار مەن ينجەنەرلەرگە قولجەتىمدىلىك كورسەتكىشى بويىنشا 21 پوزيسياعا (140 ەلدىڭ ىشىندە 91 ورىننان 70 ورىنعا) كوتەرىلگەندىگى اتالادى.

دوڭگەلەك ۇستەل بارىسىندا ءۇش پانەلدىك سەسسيا ءوتتى، وندا وتاندىق عىلىمدى ودان  ءارى دامىتۋ جانە قازاقستاندىق عالىمداردىڭ عىلىمي ىزدەنىستەرىن ىلگەرىلەتۋدىڭ وزەكتى ماسەلەلەرى جان-جاقتى تالقىلاندى.

مەملەكەتتىك حاتشى زەرتتەۋدىڭ ىشكى رەسۋرستارىن دامىتۋدىڭ ماڭىزدىلىعىنا،  شەت ەلدەن عالىمداردى، سونىڭ ىشىندە شەت ەلدە عىلىمي جۇمىستارىمەن تانىمال قازاقستاندىق عالىمداردى بەلسەندى تارتۋ قاجەتتىلىگىنە ەرەكشە نازار اۋداردى.

بۇگىندە قازاقستاندا عىلىمدى قاجەت ەتەتىن ەكونوميكانى قالىپتاستىرۋ ءۇشىن ەكى زياتكەرلىك-يننوۆاسيالىق كلاستەر - حايتەك-پارك نازاربايەۆ ۋنيۆەرسيتەتىندەگى «استانا بيزنەس كامپۋس» جانە الماتىدا «الاتاۋ» تەحنوپاركى  قۇرىلدى. ناقتى وندىرىستىك جوبالاردى ىسكە اسىرۋ ءۇشىن كلاستەرلەر بازاسىندا جوعارى تەحنولوگيالىق كومپانيالار، سونىڭ ىشىندە شەتەلدىك كومپانيالار تارتىلاتىن بولادى.

دوڭگەلەك ۇستەل قورىتىندىسى بويىنشا قازاقستان رەسپۋبليكاسىنىڭ مەملەكەتتىك حاتشىسى گ.ن.ءابدىقالىقوۆا مەملەكەتتىك ورگاندارعا قازاقستاندىق عىلىمدى ودان ءارى دامىتۋ بويىنشا ءبىرقاتار ناقتى تاپسىرمالار بەردى. 

---