InfoHub Logo

"ۇلتتىق تاربيە - ۇلت بولاشاعى"
بولاشاق ۇرپاعىمىزدى تاربيەلەگەندە، ولارعا جاستايىنان يماندىلىق پەن ۇلتتىق قاسيەتتەردى سىڭىرە بىلسەك، سوندا عانا ءبىز ۇلتتىق رۋحى دامىعان، وتانىنىڭ گۇلدەنۋىنە ۇلەس قوسا الاتىن ازامات وسىرە الامىز
ەلباسى ن. ءا. نازاربايەۆ
بالاباقشا – بالانىڭ جۇيەلى تۇردە ءبىلىم – تاربيە الاتىن ەڭ العاشقى قوعامدىق وشاعى. ءبىلىم قازىناسىن بالاباقشاداعى تاربيەلەنۋشى بۇلدىرشىندەردىڭ بويىنا ءسىنىرىپ، ولاردىڭ بولاشاقتارىنا يگى ىقپال ەتۋ نەگىزگى مىندەتىمىز. ەلوردامىزدىڭ تورىندە ورنالاسقان №71 «ءمولدىر» بالاباقشاسى بۇل – مەيىرىمگە تولى بولەك الەم. بالاباقشامىزدا ءار بالانىڭ جان دۇنيەسىن سەزىنىپ، ونى ايالاۋعا، باعالاۋعا، قۇرمەتتەۋگە ۇيرەتەمىز.
بالاباقشامىزدىڭ باستى مىندەتى ۇلت ءومىرىن وركەندەتۋشى سانالى دا سالاۋاتتى، ۇلتجاندى، رۋحى بيىك، اقىل – پاراساتى مول، مادەني عىلىمي ءورىسى كەڭ ۇرپاقتى تاربيەلەۋ. بۇل مىندەتتى، ارينە، بالا تاربيەسىنە جاۋاپتى تاربيەشىلەرىمىز جۇزەگە اسىرادى. جاس ۇرپاققا سانالى تاربيە جانە ساپالى ءبىلىم بەرۋ دەڭگەيى ەڭ الدىمەن پەداگوگتىڭ دايارلىعىنا، ونىڭ ءىس - تاجىريبەسىنىڭ قالىپتاسىپ، شىڭدالۋىنا بايلانىستى.
قازىرگى ءبىلىمنىڭ بولاشاعى مول فاكتورلارىنىڭ ءبىرى – پاتريوتتىق تاربيە. ءبىزدىڭ باقشامىزدا ۇلتتىق پاتريوتتىق تاربيەنىڭ باستى مەكەنى دەپ ايتا الامىز.
بالاباقشامىزدا اشىلعان جىلدان باستاپ ۇلتتىق تاربيەگە باسىم باعىت بەرىلگەن. الاش زيالىلارىنىڭ وي - تولعامدارىنان تۋىنداعان ن. ورازاحىنوۆانىڭ «ساتىلاي كەشەندى وقىتۋ» تەحنولوگياسى ءبىزدىڭ تاجىريبەلىك الاڭىمىزدا جاس ۇرپاققا تاربيە بەرۋمەن قاتار ۇلتتىق تاربيەنىڭ نەگىزىن قالاپ كەلەدى. وسى تەحنولوگيانى «بالالارعا رۋحاني - ادامگەرشىلىك تاربيە بەرۋ ارقىلى ۇلتتىق پاتريوتيزمگە تاربيەلەۋ» كلاستەرى ارقىلى بۇلدىرشىندەرىمىزدىڭ بايلانىستىرىپ سويلەۋ ماشىعىن قالىپتاستىرۋ ماقساتىندا قالالىق سەمينار ۇيىمداستىرىلدى.
كلاستەر بويىنشا سەرىكتەس №24 «اينالايىن»، №6 «كوكتەم»، №13 «تۇلپار»، №58 «وركەن» بالاباقشالارىمەن تىعىز ءىس - شارالار جۇرگىزىلىپ كەلەدى.
ۇلتتىق تاربيەنىڭ باستاۋى بالاباقشامەن قاتار وتباسىندا دا جۇزەگە اسۋى ءتيىس. سوندىقتان دا سەمينارعا بۇلدىرشىندەرىمىزبەن قاتار اتا - انالارىمىز دا بەلسەنە قاتىسىپ اباي قۇنانباي ۇلىنىڭ 175 جىلدىعىنا وراي «ۇلىلاردىڭ ۇلىسى - اباي» اتتى ادەبي سايىستا ابايدىڭ مۇراسىن ناسيحاتتاۋعا ءوز ۇلەستەرىن قوستى.
مۇنداعى ماقسات: ۇلتتىق بايلىعىمىزدى يگەرۋ، ۇلتتىق سانامىزدى دامىتۋ ءۇشىن بالاباقشا، اتا - انا، قوعام بىرلەسە وتىرىپ، جاس ۇرپاقتى ءتىلىن، سالت - ءداستۇرىن، تاريحىن، قۇرمەتتەيتىن تۇلعا ەتىپ قالىپتاستىرۋ.
يننوۆاسيا تەحنولوگيا ادىسكەرى: دوموۆا ا. ن.