تۇندە مەنىڭ تۇسىمە ءجيى ەنەدى
ساحارانىڭ شۇبىرعان تۇيەلەرى.
تۇيەنىڭ وركەشىندە جىر بوتالاپ،
تۇيەنىڭ بوزداۋىنان كۇي ولەدى.
ۇقسامايدى جاساۋلى كەرۋەنگە،
كورىكبەيدى سەرىلەر پەرىلەر دە.
اسپان، مۇحيت ارقىلى قاتىناسىپ،
كەرۋەننەن ادامدار جەرىگەن بە؟!
كون تابانىن كۇيدىرسىن، ورتەسىن نە،
كونەدى بارىنە ولار جەر توسىندە.
كىم ايتار الگەبرا تۋعان جوق دەپ،
وسىناۋ تۇيەلەردىڭ وركەشىندە.
تۇيەلەر - الىس ساپار جولدىڭ باسى.
(قۇمعا ولاردى يەسىز قور قىلماشى؟!)
تۇيە دەگەن - كوتەرگىش كرانداردىڭ
كوزى ءتىرى كونە ءبىر فورمۋلاسى.
ءسۇتىن ءىشىپ، شۋداسىن كيە ءجۇرىپ،
قاستەرلەيىك تۇيەنى سۇيە ءبىلىپ.
تۇيەلەر...
تۇيەلەردى ءتىرى ۇستايىق،
بارماسپىز بولاشاققا تۇيە ءمىنىپ.
ەكىتالاي كۇندەردە يەلەرى،
ازاپ-سورىن اتانعا تيەپ ەدى،
اتانىنا ارقاسىن سۇيەپ ەدى،
...اتان بايعۇس نەسىنە سۇيەنەدى؟!
سوندىقتان با، تۇسىمە ءجيى ەنەدى
ساحارانىڭ شۇبىرعان تۇيەلەرى.

---