InfoHub Logo

- قىزىڭ ۇيىقتاپ قالدى ما؟ - دەدى ەرەكەڭ ايەلىنە قاراپ. - شىعارما جۇمىسىن جازىپ بەرشى دەپ ەدى.

- نە شىعارما؟ - دەدى ايەلى.

- "XXI عاسىر وتباسىسىنىڭ وزىنە ءتان سيپاتى" دەگەن تاقىرىپتا شىعارما جۇمىسىن جازىپ كەلىڭدەر دەپتى عوي. - سەن جازشى، - دەدى ەرەكەڭ، - مەن ايتىپ وتىرايىن.

ايەلى قالام-قاعازىن دايىنداپ وتىردى.

ەرەكەڭ قولىن ارتىنا ۇستاپ بولمە ىشىندە ارلى-بەرلى ءجۇردى. سوسىن:

- نە جازامىز؟ - دەدى ايەلىنە قاراپ.

- قايدان بىلەيىن؟ - دەدى ايەلى.

- ال جاز وندا، - دەدى ەرەكەڭ. - XXI عاسىردا وتباسى ودان ءارى كۇردەلەنە تۇسەدى.

- ءوزى دە كۇردەلەنىپ كەلە جاتىر عوي، - دەدى ايەلى.

- XXI عاسىر وتباسىسىنىڭ وزىنە ءتان ەرەكشەلىكتەرى بار. بۇل - بۇرىنعى زامان وتباسىلارىنا مۇلدە ۇقسامايتىن جاڭا سيپاتتاعى وتباسى.

ەرەكەڭ ەندى وسىعان نە جازساق ەكەن دەپ يەگىن ۋقالاپ ويلانىپ قالدى.

- جاڭا جولدان باستاپ جاز، - دەدى سوسىن ايەلىنە. - XXI عاسىر وتباسىسىنىڭ وزىنە ءتان سيپاتتارىنىڭ ءبىرى - وتباسىنىڭ نەگىزى ەكى ادامنان قۇرالادى، - دەدى ەرەكەڭ.
- ولار ەر جانە ايەل دەپ اتالادى.
- اكەسى-اۋ، بۇل نە دەگەنىڭ؟ - دەدى ايەلى ەرەكەڭە نارازى كەيىپپەن قاراپ. - قاي زاماندا دا وتباسى ايەل مەن ەركەكتىڭ باس قوسۋىنان تۇرماي ما؟

- تۇرا بەرسىن، - دەدى ەرەكەڭ. - بۇل جەردە اڭگىمە XXI عاسىردىڭ وتباسىسى جايىندا بولىپ تۇر عوي. بۇرىنعى زاماننىڭ وتباسىلارىندا نە شارۋامىز بار. سوندىقتان جازا بەرسەيشى.

- XX عاسىردىڭ اياعىندا، - دەدى ەرەكەڭ داۋسىن سوزا ءتۇسىپ، - ايەل مەن ەر ادامنىڭ قۇقىعىن تەڭەستىرۋ ءىسى تولىق اياقتالىپ بىتكەن ەدى. ەندىگى جەردە XXI عاسىر ايەل ازاماتشالارعا زور سەنىممەن قاراپ، ولارعا مىندەت جۇكتەي الدى. سونداي ۇلى مىندەتتەردىڭ ءبىرى - ومىرگە بالا الىپ كەلۋ مىندەتى ەدى. سەبەبى جاڭا تەحنولوگيالىق ادىس-تاسىلدەرمەن قارۋلانعان ۇستازداردىڭ الدىنا بالا بەرۋ ءىسى XXI عاسىر قوعامىنداعى ماڭىزدى ماقساتتاردىڭ قاتارىنان سانالدى.

- اكەسى-اۋ، - دەدى تاعى دا ەرەكەڭنىڭ ايەلى شىر ەتە ءتۇسىپ. - قاي زاماندا دا بالانى ومىرگە الىپ كەلەتىن ايەلدەر ەمەس پە؟ بالا بولماسا، ءبارىمىز قايدان شىقتىق؟

- جازا بەرسەيشى، نەعىلاسىڭ؟ - دەدى ەرەكەڭ. - ءارى قاراي جاز.

- وسىناۋ ۇلى مىندەتتى، - دەدى ەرەكەڭ، - ايەلدەرىمىز اسا زور جاۋاپكەرشىلىكپەن اتقارا باستادى. وسىنىڭ ارقاسىندا جاڭا مەكتەپتەر بوي كوتەردى، ولار زامانعا ساي وقىتۋ قۇرالدارىمەن جابدىقتالدى، ۇستازدارىمىزدىڭ جالاقىسى ارتتى، ىزدەنىستەرى جوعارىلادى. ءبىز بۇل جەردە قوعامنىڭ جۇگىن كوتەرۋدە ايەل-انالاردىڭ ەڭبەگى ۇشان-تەڭىز ەكەندىگىن بىلەمىز. ولار بۇل مىندەتتى قوعامدىق قىزمەتىمەن قاتار ۇشتاستىرا الدى.
بۇل XXI عاسىر وتباسىسىندا ءومىر سۇرەتىن ايەل-انالارعا ءتان قاسيەت بولىپ وتىر. وتباسى قۇندىلىعى كەمىگەن جوق.

- جاڭا جولدان باستاپ جاز، - دەدى ەرەكەڭ ايەلىنە. - XXI عاسىر وتباسىسى بالالارىنىڭ وزىنە ءتان ەرەكشەلىكتەرىنىڭ ءبىرى - ولار ومىرگە تيتىمدەي-تيتىمدەي بولىپ كەلەدى.

- اكەسى-اۋ، - دەدى ايەلى تاعى دا نارازى ۇنمەن، - بالا دەگەننىڭ ءوزى ومىرگە قاشاننان-اق كىشكەنتاي بولىپ كەلمەي مە؟

- جازا بەر، - دەدى ەرەكەڭ. - سونىمەن نە دەدىك؟ "XXI عاسىر وتباسىسى بالالارىنىڭ وزىنە ءتان ەرەكشەلىكتەرىنىڭ ءبىرى - ولار ومىرگە تيتىمدەي-تيتىمدەي بولىپ كەلەدى" دەدىك پە؟ ەندەشە، ءارى قاراي جاز. بالالار ءار جىل سايىن بەلگىلى ءبىر جاسقا تولىپ وتىرادى. وسى كەزدە XXI عاسىردىڭ اتا-انالارى ءوسۋ كەزەڭىندەگى جاس پەن جاستىڭ اراسىندا نەندەي جۇمىستاردىڭ اتقارىلعاندىعى تۋرالى ەلگە ەسەپ بەرەدى. بۇرىشى بار ۇستەلدەر ۇيىمداستىرىلىپ، تاعامدار تارتىلادى، الداعى مىندەتتەر سارالانادى. جيىن قوناقتارى تىلەك ايتىپ تارقاسادى. بۇدان بۇرىن دا "بالا - ءبىزدىڭ بولاشاعىمىز" دەگەن ءسوز ايتىلسا، ەندىگى جەردە XXI عاسىر ادامدارى بۇل ءسوزدى "بالا - ءبىزدىڭ باقىتتى بولاشاعىمىز" دەپ نىق سەنىممەن ايتا الدى.
XXI عاسىر وتباسىسى ءوزارا تاتۋ بىرلىكتەگى وتباسى بولىپ تابىلادى جانە ول سونىمەن قاتار ءوزى سەكىلدى وزگە وتباسىلارمەن دە تاتۋلىقتا ءومىر سۇرۋگە ۇمتىلادى. مۇنداي تاتۋلىق پەن تىنىشتىقتى سيپاتتايتىن "قوي ۇستىنە بوزتورعاي جۇمىرتقالاۋ" دەگەن تۇراقتى ءسوز تىركەسىن ەسكە تۇسىرەلىك. ءبىز، XXI عاسىر ادامدارى، ەندىگى جەردە قوي نەمەسە قوي ۇستىندەگى ءجۇن تۋرالى اڭگىمە قوزعاپ وتىرا المايمىز. سوندىقتان XXI عاسىر بوزتورعايلارىنا قويىلاتىن تالاپ تا جوعارى بولماق.

XXI عاسىر وتباسىسى - ءوزىنىڭ ىشكى ساياساتىن بىردەن-بىر دەربەس جۇرگىزە الاتىن، قارتتاردىڭ ارالاسۋىن قاجەت ەتپەيتىن وتباسى. جاڭا عاسىر وتباسىسىندا ايەل مەن ەر ادامنىڭ ءوزارا سىيلاستىق قارىم-قاتىناسىندا، اتا-انانىڭ بالاعا دەگەن قارىم-قاتىناسىندا، ولاردى تاربيەلەپ وسىرۋدە، ەركەلەتۋ، ات قويۋ، تاعى دا باسقا جاعدايلاردا نەگىزىنەن وركەندى دەپ تانىلعان ەلدەردىڭ قۇندىلىقتارى نەگىزگە الىنىپ وتىرادى.

XXI عاسىر وتباسىسى اجىراسپايدى، ال جۇبايلار اراسىنا سالقىندىق جۇگىرگەن جاعدايدا تاراپتار ءوزارا بىتىسۋگە ۇمتىلادى. ءبىتىستىرۋ قىزمەتىن جاڭا زامان تەحنيكاسى اتقارا الادى. XXI عاسىر تەحنيكاسى - ءداستۇرلى وتباسىنا ءتان قاريالار قىزمەتىن الماستىرا الاتىن بىردەن-بىر قۇرال.

- قورىتا كەلگەندە، - دەدى ەرەكەڭ. - XXI عاسىر وتباسىسى جاڭا زامانعا ءتان بەيىمدەلىپ ءومىر سۇرە الاتىن، ايرىقشا سيپاتتاعى قوعامدىق ينستيتۋت بولىپ تابىلماق.

- وسىنى اپارىپ قىزىڭنىڭ سومكەسىنىڭ جانىنا قويا عوي، - دەدى ەرەكەڭ. - تاڭەرتەڭ ءوزى سالىپ الىپ كەتەر.

ەرتەڭىنە قىزى:

- اكە، "وتە جاقسى" دەگەن باعا قويىلدى دەدى جايراڭداپ.

ەرەكەڭ قىزىنا كۇلىمسىرەي قارادى:

- ءاي، قىزىم-اي، XXI عاسىردىڭ قىزى دەگەن سەن عوي...

قىزى جىميدى.
 

---