InfoHub Logo

ءبىر سوقىر، ءبىر تاز، ءبىر جالاق ۇشەۋى جولداس بولىپتى. بۇلار جولاۋشىلاپ ءبىر جات ەلگەن كەلە جاتىپ: «جات ەلگە سىرىمىزدى بىلدىرمەيىك» دەپ ۋادە قىلىپتى. ءبىر ۇيگە ءتۇسىپ وتىرعاندا تازدىڭ باسى قىشىپ شىداتپاپتى. تاز قانشا سابىر ساقتاسا دا، شىداي الماي، سىلتاۋراتىپ اڭگىمە باستاپتى:

— اكەمىز اسقان باتىر، ات ۇستىندە مىقتى بولعان ەكەن. قامشىداي قايىڭ سويىلدى قارىنا ءىلىپ الىپ، بۇرشاق بوركىن ەكى شەكەسىنە قىرىنداتا بىلاي-بىلاي اۋىستىرىپ كيىپ الادى ەكەن، — دەپ باسىن ولاي-بۇلاي قاسىپ-قاسىپ الىپتى. مۇنى سوقىر ءبىلىپ قالىپ، وزىنە لايىق اڭگىمەسىن باستاپتى.

— مەنىڭ دە اكەم وتە مەرگەن ەدى، سالا قۇلاش ساداقپەن قارا كوزدى قۇرالايدى، كوزدەمەي اتىپ ءتۇسىرۋشى ەدى، — دەپ كوزىن ۇقالاپ-ۇقالاپ الىپتى.

بۇلاردىڭ مۇنداي قۋلىعىن جالاق تا سەزىپ:

— سىرلارىڭدى ءبىلدىم-بىلدىم، ءالدۋ-بالدۋ ءبارى وتىرىك، ياپىراي، ياپىراي، — دەپ ەرنىن جالاپ-جالاپ الىپتى.

---