تاكاپپارلىق
كۇندەردىڭ كۇنىندە، جاپىراعى جايقالعان ەڭسەلى ءبىر تەرەكتىڭ تۇبىنەن شىرماۋىق تۇقىم جارىپ بوي كوتەرە باستاپتى. كوكتەمنىڭ كەلىسىمەن اق، الگى شىرماۋىق اعاشتىڭ ورتان بەلىنە دەيىن ءوسىپ، ۇزارا ءتۇسىپتى. جاڭبىر مەن كۇن نۇرىنىڭ ارقاسىندا ازعانتاي ۋاقىتتىڭ ىشىندە شىرماۋىق تەرەكپەن بىردەي بولىپ ءوسىپ جەتىلىپتى. سودان ءبىر كۇنى، شىرماۋىق اعاشقا قاراپ؛ «اعاش اۋ، سەن قانشا ايدا وسىنداي ۇلكەن بولىپ ءوستىڭ؟» دەپتى. تەرەك بولسا؛ «ون جىلدا» دەپ جاۋاپ قاتىپتى. ونى ەستىگەن شىرماۋىق ىشەك-سىلەسى قاتىپ، ماقتانا كۇلىپ «ون جىلدا ما؟ مىنا مەن كوپ بولسا ەكى اق ايدا سەنىمەن بويىم بىردەي بولدى قاراشى» دەپ ماسايراپتى. تەرەك بولسا «دۇرىس ايتاسىڭ» دەپتى دە قويىپتى.
ۋاقىتتىڭ اعىسىمەن، جازدىڭ ىستىق كۇندەرىن، قوڭىر كۇز باسىپ، اۋا-رايى سالقىنداي ءتۇسىپتى. كۇزدىڭ سالقىن جەلىنەن شىرماۋىقتىڭ جاپىراقتارى ءۇزىلىپ، شىرماۋىق قالتىراي باستايدى. سودان كەيىن شىرماۋىق، اقىرىن-اقىرىن بۇگىلىپ ءبىر ۋىس بولىپ جەرگە جاپىرىلىپ قالىپتى. بۇل حالىنە تاڭ قالىپ، تەرەككە قاراپ؛ «ۋا اعاش اۋ! ماعان نە بولىپ بارادى؟» دەپ سۇراپتى. سوندا تەرەك وعان؛ «مەنىڭ ون جىلدا شىققان شىڭىما سەن ەكى ايدا شىعۋعا تىرىستىڭ» دەپ قانا جاۋاپ قاتقان ەكەن.
عالىمنان نادان ارتپاس ۇققانمەنەن،
تاعدىر كورمەي قويمايدى بۇققانمەنەن.
و-داعى قالىبىنان اسا المايدى،
جاۋقازىنان ەرتە كوكتەپ شىققانمەنەن.
اباي قۇنانباي ۇلى
You Might Also Like
-
كەلەر جىلى ۇبت تاپسىرۋ فورماتى سول كۇيىندە قالادى، دەگەنمەن ءبىرقاتار قوسىمشا وزگەرىستەر بار.
