تاربيە ساعاتى
ستۋدەنت مۇعالىمدىك تاجىريبەدەن وتۋگە كەلگەن سىنىپتا سىنىپقا ورىس ءتىلى مەن ادەبيەتىنەن ساباق بەرىپ، وزدەرى دە مۇعالىمدىك تاجىريبەدەن ءوتىپ جۇرگەن ەكى ستۋدەنت قىز بار ەدى. بۇلاردىڭ ۇشەۋىنە دە ورتاق ءبىر مىندەتتەرى وسى سىنىپقا اشىق تاربيە ساعاتىن وتكىزۋلەرى كەرەك بولاتىن. قىزدار بۇل تۇرعىدا سىنىپتىڭ دايىندىعىن دا وزدەرى دايىنداعان ەدى، كورنەكى قۇرالداردى دا ازىرلەپ شىقتى. ۇشەۋىنە ورتاق بولىپ ەسەپتەلەتىن بولاشاق وتكىزىلگەلى تۇرعان اشىق تاربيە ساعاتىنىڭ تاقىرىبى انا تاقىرىبىندا بولاتىن.
اشىق تاربيە ساعاتىن وتكىزۋ جونىندەگى وي قوزعالعاننان باستاپ-اق، قالاداعى وسى ءبىر مەكتەپتە مۇعالىمدىك تاجىريبەدەن ءوتىپ جۇرگەن بارلىق ستۋدەنتتەرگە قوبالجۋ تۋعىزعان ءبىر جاعداي بولدى. ول وزدەرى وتكىزگەلى تۇرعان اشىق تاربيە ساعاتتارىن كورۋگە، باعالاۋعا كەلەتىن پەداگوگ مامان تۋرالى اڭگىمە ەدى. بۇل ماماندى وسى جەردە جۇرگەن ستۋدەنتتەردىڭ بىردە-بىرى تانىمايتىن بولىپ شىقتى. ءوزى وزگە ۇلت وكىلى ەكەن، ءبىراق ماسەلە وندا دا ەمەس ەدى. پەداگوگ مامان جايىندا ايتىلعان سوزگە قاراعاندا، بۇل ماماننىڭ بولاشاق ءمۇعالىم بولامىن دەگەن جانعا قوياتىن قاتاڭ تالابىنىڭ ۇدەسىنەن شىققاندا بارىپ قانا جوعارى باعادان ۇمىتتەنۋگە بولادى، انىعىندا ماماننىڭ ءوزى دە ساۋاتتى پەداگوگ دەگەن سوزدەر ەدى. كوپ ۇزاماي ستۋدەنتتەردى ابىرجىتىپ، وسى ويدى ناقتىلاي تۇسكەن ءبىر وقيعا بولدى. ول وسىندا جۇرگەن ءبىر توپ ستۋدەنتتىڭ وتكىزگەن
اشىق تاربيە ساعاتىنىڭ "3"-كە باعالانىپ قالۋى ەدى. بۇل وزگە ستۋدەنتتەرگە دە قاتتى اسەر ەتتى. سەبەبى وسى مەكتەپتە مۇعالىمدىك تاجىريبەدەن ءوتىپ جاتقان ستۋدەنتتەردىڭ اراسىنان "5"-كە بىردەن-بىر ۇمىتكەر دەپ تانىلعان وسى ستۋدەنتتەر ەدى. ولاردىڭ دايىندىعى مىقتى، ساباقتارى كورنەكىلىكتىڭ بارلىق تۇرىمەن دە قامتىلعان بولاتىن. ءبىراق پەداگوگ مامان ساباقتى قورىتىندىلاعاندا "ورتاشا" دەپ باعالاپتى. وسىنى كورگەن ستۋدەنتتىڭ جانىنداعى بولاشاق ورىس ءتىلى ءپانىنىڭ مۇعاليمالارى "بىزگە "5"-تىك قاجەت ەمەس، تەك "3" الىپ قالماساق بولدى" دەدى.
مەجەلى كۇن دە كەلىپ جەتتى. سول كۇنى ەكى ستۋدەنت قىزدىڭ ءبىرى ساباققا كەلە الماي قالدى. قۇربىسىنىڭ ايتۋىنشا، ول تۇرمىس قۇرعان، كىشكەنە ءسابيى اۋىرىپ قالىپتى. ەكىنشى قىز وسى اشىق تاربيە ساعاتىن جۇرگىزۋدى ۇشەۋىنىڭ اراسىنان مىندەتىنە العان ەدى. كەنەت ول ستۋدەنتكە كەلىپ: "اشىق تاربيە ساعاتىن سەن جۇرگىزەسىڭ بە؟ مەن قاتتى ابىرجىپ تۇرمىن" دەدى. ستۋدەنت جەمە-جەمگە كەلگەندە جاۋاپكەرشىلىكتىڭ تىزگىنى وزىنە قاراي بۇرىلىپ كەتەر دەپ ويلاماعان ەدى. ءبىراق ارىپتەس قىزدىڭ تۇرىنەن، شىنىندا دا، قاتتى ابىرجىپ تۇرعاندىعى بايقالدى. ستۋدەنت سەنارييمەن جەتكىلىكتى جاعدايدا تانىس ەمەس جانە كورنەكىلىكتەردىڭ مازمۇنىن دا تياناقتاپ الۋى كەرەك بولاتىن. ول سەنارييگە كوز جۇگىرتە باستادى. دەگەنمەن ساباق ونىڭ ءوز سوزىمەن ايتىلۋى كەرەك ەدى. سوسىن كورنەكىلىكتەرىنە بۇرىلدى. شىنىندا دا، بۇلاردىڭ كورنەكىلىكتەرى
از ءارى قارابايىرلاۋ ەدى. مۇنى "5"-تىك باعا الامىن دەپ تۇرىپ، "3"-كە باعالانىپ قالعان ساباقتىڭ كورنەكىلىكتەرىمەن سالىستىرۋعا مۇلدە كەلمەيتىن. كەنەت مەكتەپتىڭ قوڭىراۋى بەرىلە باستادى. سونان سوڭ باسپالداقپەن جوعارى قاراي اسىعىس جۇگىرگەن وقۋشىلاردىڭ اياق دىبىستارى مەن سىنىپ ەسىكتەرىنىڭ سارت-سۇرت اشىلىپ-جابىلعانى ەستىلدى دە، سالدەن كەيىن-اق ءبارى تىنشي بەرگەن ساتتە بۇلاردىڭ سىنىبىنىڭ ەسىگى اشىلىپ، الگى پەداگوگ ۇستاز كىرىپ كەلدى. ەۋروپالىق بيكەلەر سەكىلدى، تالعاممەن كيىنگەن ايەل ادام ەشكىمگە دە نازار اۋدارماعان كۇيى سىنىپتىڭ ارتقى بولىگىنە قاراي ءوتىپ بارا جاتتى دا، ونىڭ سوڭىنان اشىق قالعان ەسىكتەن بولاشاق اعىلشىن ءتىلى ءپانىنىڭ مۇعاليماسى بولعالى جۇرگەن ءبىر توپ ستۋدەنت قىز كىرىپ كەلىپ، ولار دا ۇستازدىڭ سوڭىنان سىنىپتىڭ ارتقى بولىگىنە قاراي ءوتىپ بارا جاتتى. ساباق باستالىپ كەتتى...
ساباقتىڭ سوڭىندا وقۋشىلاردىڭ كەلگەن قوناقتارعا قۇرمەت ءبىلدىرىپ ورنىنان كوتەرىلۋىمەن بىرگە پەداگوگ ۇستاز وسى سىنىپقا قالاي كىرسە، ءدال سولاي ەشكىمگە دە نازار اۋدارماعان كۇيى سىنىپتان شىعىپ بارا جاتتى دا، ونىڭ سوڭىنان ىلە-شالا كوتەرىلگەن اعىلشىن ءتىلىنىڭ ءبىر توپ بولاشاق مۇعاليمالارى دا سىنىپتان شىعىپ كەتتى. اشىق تاربيە ساعاتىنا جاۋاپتى ەكى ستۋدەنت الگى توپتىڭ سوڭىنان ىلەستى.
ءبىر بولمەگە جينالا قالعان توپتىڭ شاعىن جيىنىن پەداگوگ ۇستاز ءبىر اۋىز سوزبەن ءوزى باستادى دا، اعىلشىن ءتىلىنىڭ بولاشاق مۇعاليمالارىنا يەك قاقتى:
- سويلەڭدەر، تالداڭدار، باعا بەرىڭدەر.
اعىلشىن ءتىلىنىڭ بولاشاق مۇعاليمالارى بىرىنەن سوڭ ءبىرى الگىندە عانا بولىپ وتكەن اشىق تاربيە ساعاتىنىڭ كورنەكىلىكتەرىن سىنعا الا باستادى. ءبىراق ماسەلەنى ەڭ سوڭىندا كورنەكىلىكتەر شەشكەن جوق ەدى. پەداگوگ ماماننىڭ ءوزى ساباقتى قورىتىندىلاي كەلدى دە، وتىلگەن ساباقتى "5"-كە باعالادى.
- ەڭ باستى ماسەلە ساباقتىڭ ىشكى مازمۇنىندا، - دەدى ول. - بۇل ساباقتا انانىڭ ومىردەگى ورنى شاكىرتتەرگە جان-جاقتى اشىلدى. انانىڭ قوعامداعى جانە وتباسىنداعى ءرولى قاتارلاستىرا الىنىپ وتىردى. بۇلاردىڭ كورنەكىلىكتەرى از بولدى، ءبىراق سول از كورنەكىلىكپەن جۇمىس ىستەلدى. ساباق - ءوزىنىڭ ءاۋ باستاعى تاڭداپ الىنعان تاقىرىبى بويىنشا ماقساتىنا تولىق جەتكەن ساباق. سوندىقتان ول "5" دەپ باعالانۋى ءتيىس.
وسى كەزدە بولاشاق ورىس ءتىلى ءپانىنىڭ مۇعاليماسىنىڭ كوز جاسىنا ەرىك بەرگەنى. ول سىنىپقا كەلىپ تە جىلاپ تۇردى. "مەن "5" تۋرالى ءتىپتى دە ويلاماعان ەدىم" دەدى ول. ونى 7 "ءا" سىنىبىنىڭ شاكىرت قىزدارى قورشالاي الىپ، اپايلارىن قۇتتىقتاپ جاتتى.
You Might Also Like
