InfoHub Logo

بىردە بۇل كىسى (تورەمۇرات) تالدىترۋبا دەگەن جەرگە جولاۋشى بولىپ بارىپ، ءبىر ۇيگە تۇسە قالسا، سول ۇيدە ءبىر توپ اۋىل اقساقالدارى مەن جىگىتتەرى ءسوز جارىستىرىپ وتىر ەكەن.

سوندا سول ۇيدە الاشا نايمان رۋىنان ءبىر اقساقال سوزگە شەشەن، تىلگە جۇيرىك، ياكي باسقالارعا قاراعاندا سول ۇيدە سول كىسىنىڭ ءسوزى باسىم بولىپ، ءبىر ءوزى جۇرتتى اۋزىنا قاراتىپ وتىر ەكەن.

الگى تورەمۇرات دەگەن كىسى دە بارىپ، ۇيگە كىرىپ وتىرا قالادى. بۇل كىسى ءوزى ءىرى بولىپ كەلگەن، كەڭ جاۋىرىندى سارى كىسى بولعانىمەن، ەشقايسىسى ەلەمەيدى. سوندا تۇرىپ الگى اقساقال بىلاي دەپ اڭگىمەنى بايانداي باستايدى:

— ءبىز مۇندا سىر بويىنا وتكەن جىلى بارعانىمىزدا مىناداي ءبىر قىزىق كوردىك، — دەيدى، — ول جاقتىڭ جىگىتتەرى وتە ءىرى بولادى. ىرىلىگى سونشالىق — التى جاستا اتانعا مىنگەندە اياقتارى جەرگە ءتۇسىپ، جەر تىرەپ، سالبىراپ جۇرەدى ەكەن، — دەگەندە، سول ۇيدەگى كىسىلەر نە دەرىن بىلمەي، بىر-بىرىنە قاراپ تاڭدانىپ قالادى. سوندا الگى كەلگەن تورەمۇرات دەگەن كىسى ەسىك جاقتا وتىرىپ بىلاي دەيدى:

— ءيا، ول راس، اقساقال دۇرىس ايتادى. مىنا ءبىز وتكەن جىلى كۇز ايىندا سول سىر بويىنا تويعا كوكپار تارتۋعا باراتىن بولىپ، ون اتتىلى اتتاندىق. سوندا جولدا بارا جاتقان كەزدە ءبىر جەرگە قوناعا جاتاتىن بولىپ، اتتاردى شىدەرلەپ، ەلسىز جەردە قوندىق. ءبىر كەزدە ءتۇن جارىم بولعان ەكەن، جاۋىن جاۋىپ، كيىمدەرىم سۋ بولىپتى. ۇستىمدە [كيىمىم] جۇقا ەدى. ال سول كەزدە قاراسام، وڭ جاعىمدا ءبىر ۇلكەن ءىن تۇر ەكەن. سوعان باردىم دا جاتىپ، راحاتتانىپ ۇيىقتاپ، دەم الدىم. تاڭەرتەڭ قاراسام، بىرەۋ مەنى جەرگە شالپ ەتكىزىپ الىپ ۇردى. ورنىمنان تۇرىپ قاراسام، تۇندەگى ءىن دەپ جۇرگەنىم ءورىسباي دەگەن اعامنىڭ ەتىگى ەكەن، — دەپتى.

سوندا تۇرىپ الگى اقساقال قاريا شال بىلاي دەپتى:

— ءتۇۋ، ءىشىڭ جارىلعىر، بالام، وتىرىكتى ادام ەپتەپ ايتادى. ال مىنا سەن سىقىلدى ءداۋ سارى جىگىت ادامنىڭ ەتىگىنىڭ قونىشىنا سيا ما؟ — دەگەندە، الگى تۇرىپ:

— ءىشىڭىز جارىلسا، قاق ءبولىنسىن. نەشەبىر ۇلكەن جىگىت بولعانمەن، التى جاسار اتاننان اياعىم جەرگە تيمەيدى، — دەپ الگى كىسىنى سوزدەن توقتاتقان ەكەن. ءۇي ىشىندەگىلەر ەندى بارىپ، بۇل كىسىگە سىي-قۇرمەت كورسەتىپ، وزدەرى ۇيالىس تاۋىپتى.

---